ನವದೆಹಲಿ: ವಿರಾಟ್ ಕೊಹ್ಲಿ ಅವರ ಕ್ಯಾಪ್ಟನ್‌ಶಿಪ್‌ ಸಂದರ್ಭದಿಂದ ಭಾರತ ಕ್ರಿಕೆಟ್ ತಂಡದಲ್ಲಿ ಯೋ-ಯೋ ಟೆಸ್ಟ್ ಆರಂಭಿಸಲಾಯಿತು. ನಂತರದಲ್ಲಿ ತಂಡ ಪ್ರತಿನಿಧಿಸುವ ಆಟಗಾರರ ಫಿಟ್ನೆಸ್ ಬಗ್ಗೆ ಹೆಚ್ಚು ಗಮನಹರಿಸಲಾಯಿತು. ಅದರಂತೆ, ತಂಡದಲ್ಲಿ ಆಡಲು ಯೋ-ಯೋ ಟೆಸ್ಟ್ ಪಾಸ್ ಆಗುವುದನ್ನು ಕಡ್ಡಾಯಗೊಳಿಸಲಾಗಿದೆ. ಆಟಗಾರರನ್ನು ಸದೃಢವಾಗಿಡಲು ಈ ನಿಯಮಗಳು ಅತಿ ಅಗತ್ಯವೆಂದು ಪರಿಗಣಿಸಲಾಗುತ್ತಿದೆ. ಇದರ ಪರಿಣಾಮ, ಭಾರತೀಯ ಆಟಗಾರರು ಫಿಟ್ನೆಸ್ ಬಗ್ಗೆ ಹೆಚ್ಚು ಗಮನ ಹರಿಸುತ್ತಾರೆ.
ಏಷ್ಯಾಕಪ್ ತಯಾರಿಯಲ್ಲಿರುವ ಭಾರತ ತಂಡದ ಆಟಗಾರರಿಗೆ ಯೋ-ಯೋ ಪರೀಕ್ಷೆ ಮಾಡಲಾಗಿದ್ದು, ಇದರಲ್ಲಿ ಶುಭ್‌ಮನ್‌ ಗಿಲ್ ಅತಿ ಹೆಚ್ಚು ಅಂಕಗಳನ್ನು ಪಡೆದಿದ್ದಾರೆ. ಈ ಟೂರ್ನಿಗೆ ಆಯ್ಕೆಯಾದ ಆಟಗಾರರೆಲ್ಲರೂ ಭಾರತೀಯ ಕ್ರಿಕೆಟ್ ಮಂಡಳಿ (ಬಿಸಿಸಿಐ) ನಿಗದಿಪಡಿಸಿದ್ದ ಅರ್ಹತಾ ಅಂಕವನ್ನು (16.5) ಸಾಧಿಸಿದ್ದಾರೆ ಎಂದು ತಿಳಿದುಬಂದಿದೆ.
ಆದರೆ, ತಂಡಕ್ಕೆ ಆಯ್ಕೆಯಾಗಿ ನಂತರ ಯೋ-ಯೋ ಪರೀಕ್ಷೆಯಲ್ಲಿ ಫೇಲ್ ಆಗುವ ಮೂಲಕ ಸ್ಥಾನ ಕಳೆದುಕೊಂಡ ಹಲವರಿದ್ದಾರೆ. ಈ ಪೈಕಿ ಕೆಲವು ಆಟಗಾರರು ದೇಶೀ ಸೀಸನ್ ಮತ್ತು ಐಪಿಎಲ್‌ನಲ್ಲಿ ಉತ್ತಮ ಪ್ರದರ್ಶನ ನೀಡಿ ತಂಡದಲ್ಲಿ ಅವಕಾಶ ಪಡೆದುಕೊಂಡಿದ್ದರು. ಆದರೆ ನಂತರ ಫಿಟ್ನೆಸ್ ಕಾಪಾಡಿಕೊಳ್ಳಲು ವಿಫಲರಾಗಿದ್ದಕ್ಕೆ ಯೋ-ಯೋ ಟೆಸ್ಟ್ನಲ್ಲಿ ಫೇಲ್ ಆಗಿ ಆಡುವ ಅವಕಾಶವನ್ನು ಕಳೆದುಕೊಂಡಿದ್ದರು. ಅಂತಹ ಆಟಗಾರರು ಇವರು.
ಅಂಬಟಿ ರಾಯುಡು: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್‌)- 2018ರಲ್ಲಿ ಅಂಬಟಿ ರಾಯುಡು ಉತ್ತಮ ಪ್ರದರ್ಶನ ನೀಡಿದ್ದರು. ಇದರಿಂದಾಗಿ ರಾಷ್ಟ್ರೀಯ ತಂಡ ಸೇರಿಕೊಳ್ಳುವ ಅವಕಾಶವೂ ಸಿಕ್ಕಿತ್ತು. ಆದರೆ ಯೋ-ಯೋ ಟೆಸ್ಟ್ನಲ್ಲಿ ವಿಫಲರಾದರು. ಹೀಗಾಗಿ ತಂಡದಿಂದ ಹೊರಗಿಡಲಾಯಿತು. ನಂತರ ಅವರ ಸ್ಥಾನಕ್ಕೆ ಸುರೇಶ್ ರೈನಾ ಆಯ್ಕೆಯಾದರು. ದೇಹ ದಂಡಿಸಿ ಯೋ-ಯೋ ಪರೀಕ್ಷೆ ಪಾಸ್ ಆದ ರಾಯುಡು 2018ರ ಏಷ್ಯಾಕಪ್ನಲ್ಲಿ ಸ್ಥಾನ ಪಡೆದುಕೊಂಡರು.
ಸಂಜು ಸ್ಯಾಮ್ಸನ್: 2018ರಲ್ಲಿ ಇಂಗ್ಲೆಂಡ್ ಪ್ರವಾಸಕ್ಕೆ ಭಾರತ ಎ ತಂಡ ಪ್ರಕಟಿಸಿದಾಗ ಸಂಜು ಸ್ಯಾಮ್ಸನ್‌ಗೆ ಅವಕಾಶ ನೀಡಲಾಗಿತ್ತು. ಸ್ಯಾಮ್ಸನ್ ಯೋ-ಯೋ ಪರೀಕ್ಷೆಯಲ್ಲಿ ವಿಫಲವಾದ್ದಕ್ಕೆ ಇಶಾನ್ ಕಿಶನ್‌ಗೆ ಅವಕಾಶ ಸಿಕ್ಕಿತು. ಒಂದು ತಿಂಗಳ ಕಠಿಣ ಪರಿಶ್ರಮದ ನಂತರ ಸ್ಯಾಮ್ಸನ್ ಯೋ-ಯೋ ಪರೀಕ್ಷೆಯಲ್ಲಿ ಪಾಸ್ ಆಗಿ ಮತ್ತೆ ಭಾರತ ಎ ತಂಡಕ್ಕೆ ಮರಳಿದ್ದರು. ಇದಾದ ಒಂದು ವರ್ಷದ ನಂತರ ಹಿರಿಯ ತಂಡ ಪ್ರತಿನಿಧಿಸಿದರು.
ಯುವರಾಜ್ ಸಿಂಗ್: 2017ರಲ್ಲಿ ಶ್ರೀಲಂಕಾ ವಿರುದ್ಧದ ಸರಣಿಗೂ ಮುನ್ನ ಯುವರಾಜ್ ಸಿಂಗ್ ಅವರನ್ನು ತಂಡದಿಂದ ಕೈಬಿಡಲಾಗಿತ್ತು. ಇವರು ಯೋ-ಯೋ ಪರೀಕ್ಷೆಯಲ್ಲಿ ವಿಫಲರಾಗಿದ್ದರು. ಇತರ ಆಟಗಾರರಂತೆ ಯುವಿ ಕೂಡ ಕಠಿಣ ಪ್ರರಿಶ್ರಮದಿಂದ ಟೆಸ್ಟ್ ಪಾಸ್ ಆಗಿ ತಂಡಕ್ಕೆ ಮರಳಿದ್ದರು.
ಮೊಹಮ್ಮದ್ ಶಮಿ: ಭಾರತದ ವೇಗದ ಬೌಲರ್ ಮೊಹಮ್ಮದ್ ಶಮಿ ಇದೇ ಟೆಸ್ಟ್ನಲ್ಲಿ ಫೇಲ್ ಆದ ಕಾರಣ ಕೊನೆಯ ಕ್ಷಣದಲ್ಲಿ ನವದೀಪ್ ಸೈನಿ ಟೀಂ ಇಂಡಿಯಾ ಸೇರಿಕೊಂಡಿದ್ದರು. ಇದರ ನಂತರ ಶಮಿ ಒಂದು ತಿಂಗಳ ನಂತರ ಯೋ-ಯೋ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ಇಂಗ್ಲೆಂಡ್ ಸರಣಿಗಾಗಿ ರಾಷ್ಟ್ರೀಯ ತಂಡಕ್ಕೆ ಮರಳಿದ್ದರು.
ವಾಷಿಂಗ್ಟನ್ ಸುಂದರ್: ಟೀಂ ಇಂಡಿಯಾದಲ್ಲಿ ಆಡಿದ್ದ ಆಫ್-ಸ್ಪಿನ್ನರ್, ಆಲ್-ರೌಂಡರ್ ವಾಷಿಂಗ್ಟನ್ ಸುಂದರ್ 2017ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಟಿ20ಗೆ ತಂಡಕ್ಕೆ ಆಯ್ಕೆಯಾಗುವ ಮೊದಲು ಯೋ-ಯೋ ಟೆಸ್ಟ್ನಲ್ಲಿ ವಿಫಲರಾಗಿದ್ದರು. ಇದರ ನಂತರ ಫಿಟ್ನೆಸ್ ಸಾಧಿಸಿ ಶ್ರೀಲಂಕಾ ವಿರುದ್ಧದ ಸರಣಿಗೆ ಆಯ್ಕೆಯಾಗಿದ್ದರು.
ಇದನ್ನೂ ಓದಿ: ಕರ್ನಾಟಕ ತೊರೆದ ಕರುಣ್ ನಾಯರ್.. ದೇಶೀಯ ಋತುವಿನಲ್ಲಿ ವಿದರ್ಭ ಪ್ರತಿನಿಧಿಸಲಿದ್ದಾರೆ ಬಲಗೈ ಬ್ಯಾಟರ್
