ಚೆನ್ನೈ: ಎಂ.ಎ.ಚಿದಂಬರಂ ಕ್ರೀಡಾಂಗಣದಲ್ಲಿ ನಡೆದ ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಮುಂಬೈ ಇಂಡಿಯನ್ಸ್ ನಡುವಿನ ಪಂದ್ಯದಲ್ಲಿ ಡೆಲ್ಲಿ ತಂಡ 6 ವಿಕೆಟ್‌ಗಳ ಭರ್ಜರಿ ಗೆಲುವು ಸಾಧಿಸಿತು.
ಪಂದ್ಯದಲ್ಲಿ ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗ್ ಆರಂಭಿಸಿದ ಮುಂಬೈ ಇಂಡಿಯನ್ಸ್ ತಂಡ ನಿಗದಿತ 20 ಓವರ್‌ಗಳಲ್ಲಿ 9 ವಿಕೆಟ್‌ ನಷ್ಟಕ್ಕೆ 137 ರನ್ ಗಳಿಸಲಷ್ಟೇ ಶಕ್ತವಾಯಿತು. 138 ರನ್‌ಗಳ ಸಾಧಾರಣ ಗುರಿ ಬೆನ್ನತ್ತಿದ ಡೆಲ್ಲಿ 19.1 ಓವರ್‌ನಲ್ಲಿ ಜಯದಮಾಲೆ ಧರಿಸಿತು.
ಪಂದ್ಯದ ನಂತರ ಮಾತನಾಡಿದ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ನಾಯಕ ರಿಷಭ್ ಪಂತ್, " ಪಂದ್ಯ ಆರಂಭವಾದಾಗ ನಾವು ಸ್ವಲ್ಪ ಒತ್ತಡದಲ್ಲಿದ್ದೆವು. ಆದರೆ ಅನುಭವಿ ಲೆಗ್ ಸ್ಪಿನ್ನರ್ ಅಮಿತ್ ಮಿಶ್ರಾ ನಮ್ಮನ್ನು ಒತ್ತಡದಿಂದ ಪಾರು ಮಾಡಿದರು. ಎದುರಾಳಿ ತಂಡವನ್ನು ಕೇವಲ 138 ರನ್ಗಳಿಗೆ ನಮ್ಮ ಬೌಲರ್ಗಳು ಕಟ್ಟಿಹಾಕಿದರು. ಬ್ಯಾಟಿಂಗ್ ಮಾಡಲು ಕಷ್ಟವಾದ ಈ ಪಿಚ್ ಅನ್ನು ನಮ್ಮ ಬೌಲರ್ಗಳು ಸರಿಯಾಗಿಯೇ ಉಪಯೊಗಿಸಿಕೊಂಡರು" ಎಂದು ಗುಣಗಾನ ಮಾಡಿದರು.
"ನಾವು ಈ ಪಂದ್ಯದಲ್ಲಿ ಎದುರಾಳಿ ತಂಡವನ್ನು 140-150 ರನ್ಗಳಿಗೆ ಕಟ್ಟಿಹಾಕುವ ಯೋಜನೆ ರೂಪಿಸಿಕೊಂಡಿದ್ದೆವು. ಅದರಂತೆ ನಮ್ಮ ಬೌಲರ್ಗಳು ಉತ್ತಮ ದಾಳಿಮಾಡಿ 137 ರನ್ಗಳಿಗೆ ಮುಂಬೈ ತಂಡವನ್ನು ನಿಯಂತ್ರಿಸಿದರು. ಇದರಿಂದ ನಾವು ಸುಲಭವಾಗಿ ಚೇಸ್ ಮಾಡಿ ಗೆಲುವು ಪಡೆಯಲು ಸಾಧ್ಯವಾಯಿತು" ಎಂದು ಅವರು ಹೇಳಿದರು.
ಇದನ್ನೂ ಓದಿ : ಹಾಲಿ ಚಾಂಪಿಯನ್ಸ್‌ಗೆ ಮತ್ತೊಂದು ಸೋಲಿನ ಶಾಕ್‌; ಡೆಲ್ಲಿಗೆ 6 ವಿಕೆಟ್‌ಗಳ ಗೆಲುವು
