ಜೈಪುರ (ರಾಜಸ್ಥಾನ): ರಾಜಸ್ಥಾನ ರಾಯಲ್ಸ್ ನೀಡಿದ್ದ ಅಲ್ಪ ಮೊತ್ತದ ಗುರಿಯನ್ನು ಗುಜರಾತ್ ಟೈಟಾನ್ಸ್ 13.5 ಓವರ್ಗಳಲ್ಲಿ 1 ವಿಕೆಟ್ ನಷ್ಟದಿಂದ ತಲುಪಿತು. ಆರಂಭಿಕರಾದ ಗಿಲ್ ಮತ್ತು ಸಹಾ 71 ರನ್ ಜೊತೆಯಾಟ ಮಾಡಿದರೆ, ಗಿಲ್ ನಂತರ ಬಂದ ನಾಯಕ ಹಾರ್ದಿಕ್ ಪಂದ್ಯವನ್ನು 6 ಓವರ್ ಬಾಕಿ ಇರುವಂತೆ 9 ವಿಕೆಟ್ನಿಂದ ಗೆದ್ದುಕೊಂಡರು.
ಟಾಸ್ ಗೆದ್ದು ಬ್ಯಾಟಿಂಗ್ ಮಾಡಿದ್ದ ರಾಜಸ್ಥಾನ ರಾಯಲ್ಸ್ 17.5 ಓವರ್ಗೆ ಆಲ್ ಔಟ್ ಆಗಿ 119 ರನ್ನ ಗುರಿಯನ್ನು ಗುಜರಾತ್ಗೆ ನೀಡಿತ್ತು. ಈ ಗುರಿಯನ್ನು ಹಾಲಿ ಚಾಂಪಿಯನ್ಗಳು ಒಂದು ವಿಕೆಟ್ ನಷ್ಟದಿಂದ ಗೆದ್ದುಕೊಂಡರು. ಆರಂಭಿಕರಾಗಿ ಕಣಕ್ಕಿಳಿದ ವೃದ್ಧಿಮಾನ್ ಸಹಾ ಮತ್ತು ಶುಭಮನ್ ಗಿಲ್ ಉತ್ತಮ ಜೊತೆಯಾಟ ಮಾಡಿದರು. ಈ ಆರಂಭಿಕ ಜೋಡಿ 10 ಓವರ್ಗಳಲ್ಲಿ 71 ರನ್ ಕಲೆಹಾಕಿತು. ರಾಜಸ್ಥಾನದ ತ್ರಿವಳಿ ಸ್ಪಿನ್ ದಾಳಿಗೆ ತಕ್ಕ ಉತ್ತರವನ್ನು ಈ ಜೋಡಿ ಕೊಟ್ಟಿತು. ಶುಭಮನ್ ಗಿಲ್ 36 ರನ್ (35 ಬಾಲ್ , 6x4) ಗಳಿಸಿದ್ದಾಗ ಮಿಸ್ಟ್ರಿ ಸ್ಪಿನ್ನರ್ ಯಜುವೇಂದ್ರ ಚಹಾಲ್ಗೆ ವಿಕೆಟ್ ಕೊಟ್ಟರು.
ಗಿಲ್ ವಿಕೆಟ್ ನಂತರ ಬಂದ ಹಾರ್ದಿಕ್ ಪಾಂಡ್ಯ ಅಬ್ಬರದ ಬ್ಯಾಟಿಂಗ್ ಮಾಡಿದರು. ಬರುತ್ತಿದ್ದಂತೆ ಬೌಂಡರಿ, ಸಿಕ್ಸ್ಗಳನ್ನು ಬಾರಿಸಿದರು. ಇದರಿಂದ ರನ್ನ ವೇಗ ಇನ್ನಷ್ಟು ಹೆಚ್ಚಾಯಿತು. ಗೆಲುವು ಬೇಗ ಸಮೀಪಿಸಿತು. ಆರಂಭಿಕ ವೃದ್ಧಿಮಾನ್ ಸಹಾ ನಿಧಾನವಾಗಿ ಹಾರ್ದಿಕ್ಗೆ ಸಾಥ್ ಕೊಟ್ಟರು.
ಈ ಜೋಡಿ ಅಜೇಯವಾಗಿ ಉಳಿದು ಪಂದ್ಯವನ್ನು ಗೆಲ್ಲಿಸಿಕೊಟ್ಟಿತು. ಹಾರ್ದಿಕ್ ಪಾಂಡ್ಯ 15 ಬಾಲ್ಗೆ 3 ಸಿಕ್ಸ್ ಮತ್ತು 3 ಬೌಂಡರಿಯಿಂದ 39 ರನ್ ಗಳಿಸಿದರು. ವೃದ್ಧಿಮಾನ್ ಸಹಾ 34 ಬಾಲ್ನಲ್ಲಿ 5 ಬೌಂಡರಿಯಿಂದ 41 ರನ್ಗಳಿಸಿದರು. ರಾಜಸ್ಥಾನ ಪರ ಚಹಾಲ್ ಒಂದು ವಿಕೆಟ್ ಪಡೆದರು.
ರಾಜಸ್ಥಾನ ಇನ್ನಿಂಗ್ಸ್: ಇದಕ್ಕೂ ಮುನ್ನ ಗುಜರಾತ್ ಟೈಟಾನ್ಸ್ನ ಸ್ಪಿನ್ನರ್ಗಳ ಕಠಿಣ ದಾಳಿಗೆ ರಾಜಸ್ಥಾನ ರಾಯಲ್ಸ್ 17.5 ಓವರ್ಗೆ 118 ರನ್ ಗಳಿಸಿ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡಿತು. ಜಿಟಿ ಬೌಲರ್ಗಳಾದ ರಶೀದ್ ಖಾನ್ ಮತ್ತು ನೂರ್ ಅಹ್ಮದ್ ರಾಜಸ್ಥಾನದ ಪ್ರಮುಖ ಬ್ಯಾಟರ್ಗಳನ್ನು ಉರುಳಿಸಿ 119 ರನ್ನ ಸಾಧಾರಣ ಗುರಿ ಪಡೆದುಕೊಂಡರು.
ಟಾಸ್ ಗೆದ್ದು ಬ್ಯಾಟಿಂಗ್ ಮಾಡುವ ನಿರ್ಧಾರ ಮಾಡಿದ ರಾಜಸ್ಥಾನ ರಾಯಲ್ಸ್ ನಾಯಕ ಸಂಜು ಯೋಜನೆ ಅಡಿಮೇಲಾಯಿತು. ರಾಜಸ್ಥಾನ ಬ್ಯಾಟರ್ಗಳು ಹೆಚ್ಚು ಕಡಿಮೆ ಪೆವಿಲಿಯನ್ ಪರೇಡ್ ಮಾಡಿದರು. ಯಾವುದೇ ಬ್ಯಾಟರ್ಗಳು ಜೊತೆಯಾಟ ಮಾಡಲಿಲ್ಲ. ನಾಯಕ ಸಂಜು ಸ್ಯಾಮ್ಸನ್ 30 ರನ್ ಗಳಿಸಿದ್ದು ಬಿಟ್ಟರೆ ಮಿಕ್ಕಂತೆ ಹೆಚ್ಚಿನವರು ಒಂದಂಕಿಗೆ ವಿಕೆಟ್ ಕೊಟ್ಟರು.
ಆರಂಭಿಕ ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದ ಇಂಗ್ಲೆಂಡ್ ಆಟಗಾರ ಜೋಸ್ ಬಟ್ಲರ್ (8) ಕಳೆದ ಕೆಲ ಪಂದ್ಯಗಳಂತೆ ಬೇಗ ವಿಕೆಟ್ ಕೊಟ್ಟರು. ನಾಯಕ ಹಾರ್ದಿಕ್ ಪಾಂಡ್ಯ, ಬಟ್ಲರ್ ವಿಕೆಟ್ ಪಡೆದು ಸಂಭ್ರಮಿಸಿದರು. ಕಳೆದ ಪಂದ್ಯದಲ್ಲಿ ಶತಕ ಗಳಿಸಿದ್ದ ಯಶಸ್ವಿ ಜೈಸ್ವಾಲ್ (14) ರನ್ ಔಟ್ಗೆ ಬಲಿಯಾದರು.
ನಂತರ ಸಂಜು ಜೊತೆ ದೇವದತ್ ಪಡಿಕ್ಕಲ್ ಸೇರಿಕೊಂಡು ಪವರ್ ಪ್ಲೇಯ ಲಾಭ ಬಳಸಿಕೊಂಡು ಸ್ಕೋರ್ನ ವೇಗ ಹೆಚ್ಚಿಸಿದರು. ಆದರೆ, ಪವರ್ ಪ್ಲೇಯ ಕೊನೆಯ ಬಾಲ್ನಲ್ಲಿ 30 ರನ್ (20ಬಾಲ್ 3x4, 1x6) ಗಳಿಸಿದ್ದ ನಾಯಕ ಸಂಜು ಜೋಶುವಾ ಲಿಟಲ್ಗೆ ವಿಕೆಟ್ ಒಪ್ಪಿಸಿದರು. ಸಂಜು ವಿಕೆಟ್ ಬೆನ್ನಲ್ಲೆ ಬಂದ ಅಶ್ವಿನ್ (2) ಮತ್ತು ರಿಯಾನ್ ಪರಾಗ್ (4) ಕ್ರೀಸ್ನಲ್ಲಿ ಹೆಚ್ಚುಹೊತ್ತು ನಿಲ್ಲಲಿಲ್ಲ.
ಇವರ ವಿಕೆಟ್ ಬೆನ್ನಲ್ಲೇ ನಿರೀಕ್ಷೆ ಹುಟ್ಟಿಸಿದ್ದ ದೇವದತ್ ಪಡಿಕ್ಕಲ್ ಸಹ 12 ರನ್ಗೆ ಔಟ್ ಆದರು. ಧ್ರುವ್ ಜುರೆಲ್ (9), ಶಿಮ್ರಾನ್ ಹೆಟ್ಮೆಯರ್ (7), ಟ್ರೆಂಟ್ ಬೌಲ್ಟ್ (15) ಸರಣಿಯಾಗಿ ವಿಕೆಟ್ ಕೊಟ್ಟರು. 17.5ನೇ ಬಾಲ್ಗೆ ಝಂಪಾ ರನ್ಔಟ್ ಆಗುವ ಮೂಲಕ 118 ರನ್ಗಳಿಗೆ ರಾಜಸ್ಥಾನ ಸರ್ವ ಪತನವಾಯಿತು.
ಗುಜರಾತ್ ಟೈಟಾನ್ಸ್ ಪರ ರಶೀದ್ ಖಾನ್ 3, ನೂರ್ ಅಹ್ಮದ್ 2 ವಿಕೆಟ್ ಪಡೆದು ಮಿಂಚಿದರೆ, ಜೋಶುವಾ ಲಿಟಲ್, ಹಾರ್ದಿಕ್ ಪಾಂಡ್ಯ, ಮೊಹಮ್ಮದ್ ಶಮಿ ತಲಾ ಒಂದು ವಿಕೆಟ್ ಕಿತ್ತರು. ಮೋಹಿತ್ ಶರ್ಮಾ 18 ಓವರ್ನ ಐದು ಬಾಲ್ ಮಾತ್ರ ಮಾಡಿದರು. ಆ ಓವರ್ನಲ್ಲಿ ರನ್ ಔಟ್ಗೆ ಝಂಪಾ ಬಲಿಯಾಗಿ ರಾಜಸ್ಥಾನ ಆಲ್ಔಟ್ ಆಯಿತು.
ಇದನ್ನೂ ಓದಿ: ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ನಿಂದ ಕೆಎಲ್ ರಾಹುಲ್ ಹೊರಕ್ಕೆ
