ನವದೆಹಲಿ: ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಒಂದರಲ್ಲಿ ಸೋತು, ನಿನ್ನೆ ಮುಂಬೈ ಇಂಡಿಯನ್ಸ್ ವಿರುದ್ಧ ತಮ್ಮ ಎರಡನೇ ಜಯ ದಾಖಲಿಸಿದೆ. ಈ ನಡುವೆ ಚೆನ್ನೈ ಬಳಗದಿಂದ ಶಾಕಿಂಗ್ ಸುದ್ದಿ ಹೊರಬಂದಿದ್ದು ವೇಗದ ಬೌಲರ್ ದೀಪಕ್ ಚಹಾರ್ ಮತ್ತು ಬೆನ್ ಸ್ಟೋಕ್ಸ್ ಗಾಯಕ್ಕೆ ತುತ್ತಾಗಿದ್ದಾರೆ. ನಿನ್ನೆಯ ಪಂದ್ಯದಲ್ಲಿ ಚಹಾರ್ ಗಾಯಗೊಂಡರು.
ಚಹಾರ್ ಪ್ರಸ್ತುತ ಐಪಿಎಲ್ ಆವೃತ್ತಿಯಿಂದ ಬಹಳ ಸಮಯದವರೆಗೆ ಹೊರಗುಳಿಯುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ. ನಿನ್ನೆ ಅವರು ಕೇವಲ ಒಂದು ಓವರ್ ಮಾತ್ರ ಮಾಡಿದ್ದಾರೆ. ಪಂದ್ಯದ ನಂತರ ಫಿಸಿಯೋ, ಮಂಡಿರಜ್ಜು ಗಾಯಕ್ಕೆ ತುತ್ತಾದ ಬಗ್ಗೆ ಮಾಹಿತಿ ನೀಡಿದ್ದರು.
30 ವರ್ಷದ ಚಹಾರ್ ವಾಂಖೆಡೆ ಸ್ಟೇಡಿಯಂನಲ್ಲಿ ತಮ್ಮ ಮೊದಲ ಓವರ್ನ ಐದನೇ ಎಸೆತದಲ್ಲಿ ಗಾಯಗೊಂಡರು. ಫಿಸಿಯೋ ಸಲಹೆ ಪಡೆದು ಕೊನೆಯ ಎಸೆತ ಮಾಡಿದ ನಂತರ ಫೀಲ್ಡ್ನಿಂದ ಚಹಾರ್ ಹೊರಗುಳಿದರು. "ತಂಡವು ಚೆನ್ನೈಗೆ ಮರಳಿದ ನಂತರ ಗಾಯದ ಪ್ರಮಾಣ ಗುರುತಿಸಲು ಚಾಹರ್ ಸ್ಕ್ಯಾನ್‌ಗೆ ಒಳಗಾಗುತ್ತಾರೆ. ಚೆನ್ನೈ ಸೂಪರ್ ಕಿಂಗ್ಸ್ ವೈದ್ಯಕೀಯ ಸಿಬ್ಬಂದಿ ಆಟಗಾರನನ್ನು ಗಮನಿಸುತ್ತಿದ್ದಾರೆ. ಅವರ ಚೇತರಿಕೆಗೆ ಅಗತ್ಯವಿರುವ ಎಲ್ಲ ಕ್ರಮಗಳನ್ನು ಕೈಗೊಳ್ಳಲಾಗುತ್ತದೆ" ಎಂದು ಸಿಎಸ್ಕೆ ಹೇಳಿದೆ.
ಇದನ್ನೂ ಓದಿ: GT vs KKR: ಕೆಕೆಆರ್ ಗೆಲುವಿಗೆ ಬೇಕು 205 ರನ್‌! ಹ್ಯಾಟ್ರಿಕ್‌ ಗೆಲುವು ದಾಖಲಿಸುತ್ತಾ ಗುಜರಾತ್ ಟೈಟಾನ್ಸ್?
ಚೆನ್ನೈ 14 ಕೋಟಿ ರೂ ಕೊಟ್ಟು ದೀಪಕ್ ಚಹಾರ್ ಅವರನ್ನು ತಂಡಕ್ಕೆ ಸೇರಿಸಿಕೊಂಡಿದೆ. ಕಳೆದ ವರ್ಷದ ಐಪಿಎಲ್ ವೇಳೆ ಬೆನ್ನು ನೋವಿನ ಕಾರಣ ಸೀಸನ್ನಿಂದ ಚಹಾರ್ ಹೊರಗುಳಿದಿದ್ದರು. ಅಲ್ಲದೇ ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದಲೂ ದೂರ ಉಳಿದಿದ್ದರು. ಕಳೆದ ವರ್ಷ ಫೆಬ್ರವರಿಯಲ್ಲಿ ಗಾಯಕ್ಕೆ ತುತ್ತಾದ ಚಹಾರ್ ಮತ್ತೆ ಕೆಲವು ತಿಂಗಳ ಹಿಂದೆ ಚೇತರಿಸಿಕೊಂಡಿದ್ದರು.
ಕಾಲ್ಬೆರಳು ಗಾಯದಿಂದಾಗಿ ಸಿಎಸ್ಕೆ ಸ್ಟಾರ್ ಆಲ್ರೌಂಡರ್ ಬೆನ್ ಸ್ಟೋಕ್ಸ್ ಒಂದು ವಾರದ ಕಾಲ ತಂಡದಲ್ಲಿ ಕಾಣಿಸಿಕೊಳ್ಳುವುದು ಅನುಮಾನ. ಕಾಲ್ಬೆರಳು ಗಾಯದಿಂದಾಗಿ ಸ್ಟೋಕ್ಸ್ ಮುಂಬೈ ಇಂಡಿಯನ್ಸ್ ವಿರುದ್ಧದ ಪಂದ್ಯದಲ್ಲಿ ಕಣಕ್ಕಿಳಿಯಲಿಲ್ಲ. ಏ.12 ರಂದು ಚೆನ್ನೈನಲ್ಲಿ ನಡೆಯಲಿರುವ ಪಂದ್ಯದಲ್ಲಿ ಸ್ಟೋಕ್ಸ್ ಆಡುವುದು ಅನುಮಾನ ಎನ್ನಲಾಗುತ್ತಿದ್ದು ಏಪ್ರಿಲ್ 17 ರಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧದ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಕಣಕ್ಕಿಳಿಯುವ ಸಾಧ್ಯತೆ ಇದೆ.
ಮತ್ತೊಂದೆಡೆ, ಫುಡ್ ಪಾಯ್ಸನ್ನಿಂದಾಗಿ ಆಫ್-ಸ್ಪಿನ್ನಿಂಗ್ ಆಲ್-ರೌಂಡರ್ ಮೊಯಿನ್ ಅಲಿ ಕಳೆದ ಪಂದ್ಯದಲ್ಲಿ ಆಡಿರಲಿಲ್ಲ. ಅವರು ಚೇತರಿಸಿಕೊಂಡಿದ್ದು ಮುಂದಿನ ಪಂದ್ಯಕ್ಕೆ ಲಭ್ಯವಿದ್ದಾರೆ. ಇಂದಿನ ಗುಜರಾತ್ ಮತ್ತು ಕೆಕೆಆರ್ ಪಂದ್ಯದಲ್ಲಿ ನಾಯಕ ಹಾರ್ದಿಕ್ ಪಾಂಡ್ಯ ಸಹ ಅನಾರೋಗ್ಯದ ಕಾರಣ ತಂಡದಿಂದ ಹೊರಗುಳಿದಿದ್ದರು. ಅವರ ಬದಲಿಯಾಗಿ ರಶೀದ್ ಖಾನ್ ತಂಡವನ್ನು ಮುನ್ನಡೆಸಿದ್ದರು. ಈಗಾಗಲೇ ಐಪಿಎಲ್ನಿಂದ 13 ಆಟಗಾರರು ಗಾಯದ ಸಮಸ್ಯೆಯಿಂದ ತಂಡದಿಂದ ಹೊರಹೋಗಿದ್ದಾರೆ. ಚಹಾರ್ ಸಂಪೂರ್ಣ ಐಪಿಎಲ್ನಿಂದ ಹೊರ ಬಿದ್ದರೆ 14ನೇ ಆಟಗಾರ ಆಗಲಿದ್ದಾರೆ.
ಇದನ್ನೂ ಓದಿ: ಧೋನಿ ರಿವೀವ್ ಸಿಸ್ಟಮ್: ಎಂಎಸ್ಡಿ ಕರಾರುವಾಕ್ ನಿರ್ಧಾರ ಮತ್ತೆ ಸಾಬೀತು
