ಅಹಮದಾಬಾದ್: ಫೀಲ್ಡಿಂಗ್ನಲ್ಲಿ ತಪ್ಪುಗಳಾಗದಿದ್ದರೆ ನಾವು ಡೆಲ್ಲಿ ವಿರುದ್ಧ ಇನ್ನೂ ಅದ್ಭುತ ಗೆಲುವು ಸಾಧಿಸಬಹುದಾಗಿತ್ತು ಎಂದು ಆರ್ಸಿಬಿ ನಾಯಕ ವಿರಾಟ್ ಕೊಹ್ಲಿ ಹೇಳಿದ್ದಾರೆ.
ಪಂದ್ಯದ ಬಳಿಕ ಈ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ಒಂದು ಹಂತದಲ್ಲಿ ಪಂದ್ಯ ನಮ್ಮಿಂದ ಕೈಜಾರಿತೆಂದು ಅನ್ನಿಸಿತು. ಆದರೆ ಅಂತಿಮವಾಗಿ ಸಿರಾಜ್ ತೋರಿದ ಬೌಲಿಂಗ್ ದಾಳಿ, ಅವರು ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿರ್ವಹಿಸುತ್ತಾರೆ ಎಂಬ ಆತ್ಮವಿಶ್ವಾಸ ಮೂಡಿಸಿತು. ಫೀಲ್ಡಿಂಗ್ ಚೆನ್ನಾಗಿ ಮಾಡಿದ್ದರೆ ಪಂದ್ಯವು ಇಷ್ಟೊಂದು ಒತ್ತಡ ಬೀರುತ್ತಿರಲಿಲ್ಲ. ವಿಕೆಟ್ ಕಳೆದುಕೊಂಡರೂ ಕೊನೆಯ ಓವರ್ಗಳಲ್ಲಿ ಎಬಿ ಡಿವಿಲಿಯರ್ಸ್ ಭರ್ಜರಿ ಬ್ಯಾಟಿಂಗ್ ತೋರಿದರು. ಬಳಿಕ ಹೆಟ್ಮೇರ್ ಅಬ್ಬರಿಸಿದರೂ ಕೂಡ ನಾವು ಪಂದ್ಯದ ಮೇಲೆ ನಿಯಂತ್ರಣ ಹೊಂದಿದ್ದೆವು ಎಂದು ತಿಳಿಸಿದರು.
ಈ ಪಂದ್ಯದ ವೇಳೆ ಮೈದಾನದಲ್ಲಿ ಇಬ್ಬನಿ ಇರಲಿಲ್ಲ. ಇದೂ ಕೂಡ ನಮ್ಮ ಬೌಲರ್ಗಳಿಗೆ ಸಹಕಾರಿಯಾಯಿತು. ಮ್ಯಾಕ್ಸ್ವೆಲ್ ನಮಗೆ 7ನೇ ಬೌಲರ್ ಆಗಿದ್ದು, ಹೀಗಾಗಿ ನಮಗೆ ಬಹಳಷ್ಟು ಆಯ್ಕೆಗಳಿವೆ. ದೀರ್ಘವಾದ ಬ್ಯಾಟಿಂಗ್ ಸರದಿ ಹೊಂದಿರುವ ನಾವು ಬೌಲಿಂಗ್ನಲ್ಲೂ ಇನ್ನಷ್ಟು ಬಲ ಹೊಂದಬೇಕಿದೆ ಎಂದು ಕೊಹ್ಲಿ ಹೇಳಿದರು.
ಇದನ್ನೂ ಓದಿ: ಎಬಿಡಿ ನಿವೃತ್ತರಾಗಿದ್ದಾರೆ ಅನ್ನಿಸುವುದಿಲ್ಲ: ವಿರಾಟ್ ಕೊಹ್ಲಿ
ಡೆಲ್ಲಿ ವಿರುದ್ಧ ಅಂತಿಮ ಎಸೆತದಲ್ಲಿ 1 ರನ್ಗಳ ರೋಚಕ ಜಯ ಸಾಧಿಸಿದ ಆರ್ಸಿಬಿ ಪಾಯಿಂಟ್ ಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. ಮುಂದಿನ ಪಂದ್ಯದಲ್ಲಿ ಏಪ್ರಿಲ್ 30ರಂದು ಪಂಜಾಬ್ ಕಿಂಗ್ಸ್ ತಂಡವನ್ನು ಎದುರಿಸಲಿದೆ.
