ಅಬುಧಾಬಿ: ಸೋಮವಾರ ನಡೆದ ಐಪಿಎಲ್-2020 ಆರ್ಸಿಬಿ ವಿರುದ್ಧದ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಜಯ ಗಳಿಸುವ ಮೂಲಕ ಪ್ಲೇಆಫ್‌ಗೆ ಎಂಟ್ರಿ ಕೊಟ್ಟಿದೆ. ಈ ಗೆಲುವಿನೊಂದಿಗೆ, ಪಾಯಿಂಟ್ಸ್ ಟೇಬಲ್‌ನಲ್ಲಿ ಎರಡನೇ ಸ್ಥಾನಕ್ಕೇರಿದೆ.
ಪಂದ್ಯದ ನಂತರ ಮಾತನಾಡಿದ ಡಿಸಿ ನಾಯಕ ಶ್ರೇಯಸ್ ಅಯ್ಯರ್, ಈ ಗೆಲುವು ನಮಗೆ ಅನಿವಾರ್ಯ ಮತ್ತು ಅವಶ್ಯಕವಾಗಿತ್ತು. "ಸತತ ನಾಲ್ಕು ಸೋಲಿನ ನಂತರ ಈ ಗೆಲುವು ನಮ್ಮ ಮುಖದಲ್ಲಿ ಮಂದಹಾಸ ಮೂಡಿಸಿದೆ. ಇಂದು ನಾವು ಆಡಿದ ರೀತಿ ನಮಗೆ ಸಂತೋಷವನ್ನುಂಟು ಮಾಡಿದೆ, ಇದು ತಂಡದ ಸಮಗ್ರ ಗೆಲುವು. ಎಲ್ಲಾ ವಿಭಾಗಗಳಲ್ಲಿ ನಮ್ಮ ಆಟಗಾರರು ಚೆನ್ನಾಗಿ ಆಡಿದ್ದಾರೆ. ಈ ಗೆಲುವು ನಮಗೆ ಮುಂದಿನ ಪಂದ್ಯಗಳಿಗೆ ಒಳ್ಳೆಯ ಬೂಸ್ಟ್ ಆಗಲಿದೆ" ಎಂದು ಹೇಳಿದರು.
"ರಹಾನೆ ಐಪಿಎಲ್‌ನಲ್ಲಿ ಸಾಕಷ್ಟು ಅನುಭವವನ್ನು ಹೊಂದಿದ್ದಾರೆ. ಅವರು ತನ್ನ ಇನ್ನಿಂಗ್ಸ್ ಅನ್ನು ಕಟ್ಟಿದ ರೀತಿ ನೋಡಿ ಆಶ್ಚರ್ಯವಾಯಿತು. ರಹಾನೆ ಲೂಸ್ ಬೌಲ್ಗಳನ್ನು ಮಾತ್ರ ಬೌಂಡಿರಿಗಟ್ಟುವ ಪ್ರಯತ್ನ ಮಾಡಿದರು. ಇನ್ನುಳಿದಂತೆ ಅಜಿಂಕ್ಯ ರಹಾನೆ ಸಿಂಗಲ್ ಮತ್ತು ಡಬಲ್ ರನ್ ತೆಗೆದುಕೊಳ್ಳಲು ಹೆಚ್ಚು ಪ್ರಯತ್ನಿಸಿದರು " ಎಂದು ಅಯ್ಯರ್ ಹೇಳಿದರು.
"ಮುಂಬೈ ಇಂಡಿಯನ್ಸ್ ಅತ್ಯುತ್ತಮ ತಂಡಗಳಲ್ಲಿ ಒಂದಾಗಿದೆ. ನಾವು ಮುಂದಿನ ಪಂದ್ಯದಲ್ಲಿ ಈ ತಂಡದ ವಿರುದ್ಧ ನಿರ್ಭೀತ ಮತ್ತು ಅದ್ಭುತವಾಗಿ ಆಡುತ್ತೇವೆ ಎಂದು ನಾನು ಭಾವಿಸುತ್ತೇನೆ. ನಿಸ್ಸಂಶಯವಾಗಿ, ಅವರು ಪ್ಲೇಆಫ್ ಹಂತಗಳಲ್ಲಿ ಸಾಕಷ್ಟು ಅನುಭವ ಹೊಂದಿದ್ದಾರೆ. ಆದರೆ, ಆ ದಿನದಂದು ನಮ್ಮ ತಂಡ ಎಲ್ಲಾ ವಿಭಾಗಗಳಲ್ಲಿ ಉತ್ತಮ ಪ್ರದರ್ಶನ ನೀಡಿ ಹಿಡಿತ ಸಾಧಿಸುವ ನಂಬಿಕೆ ಇದೆ "ಎಂದು ದೆಹಲಿ ನಾಯಕ ಹೇಳಿದರು.
ಡಿಸಿ ಮುಂದಿನ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ತಂಡವನ್ನು ಎದುರಿಸಲಿದೆ. ಐಪಿಎಲ್‌ನ 13 ನೇ ಆವೃತ್ತಿಯಲ್ಲಿ ಮುಂಬೈ ಎರಡು ಬಾರಿ ದೆಹಲಿಯನ್ನು ಸೋಲಿಸಿದೆ .
