ದುಬೈ: 19ನೇ ಓವರ್ನಲ್ಲಿ ಪಂದ್ಯ ಜಯಿಸಿದ್ದು ಸಂತೋಷ ತರಿಸಿದೆ ಎಂದು ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ನಾಯಕ ಕೆ.ಎಲ್.ರಾಹುಲ್ ಹೇಳಿದ್ದಾರೆ.
ಆರ್ಸಿಬಿ ವಿರುದ್ಧದ ಪಂದ್ಯದ ಕೊನೆಯ ಎಸೆತದಲ್ಲಿ ಜಯ ಸಾಧಿಸಿದ್ದ ಪಂಜಾಬ್, ಮುಂಬೈ ವಿರುದ್ಧ 2ನೇ ಸೂಪರ್ ಓವರ್ನಲ್ಲಿ ಜಯ ಸಾಧಿಸಿತ್ತು.
ಪಂದ್ಯ ಮುಗಿದ ಬಳಿಕ ಮಾತನಾಡಿದ ಪಂಜಾಬ್ ತಂಡದ ನಾಯಕ ಕೆ.ಎಲ್.ರಾಹುಲ್, "ಒಮ್ಮೆಯಾದರೂ 19ನೇ ಓವರ್ನಲ್ಲಿ ಪಂದ್ಯ ಮುಗಿಸಿದ್ದು ಸಂತೋಷ ತರಿಸಿದೆ" ಎಂದಿದ್ದಾರೆ. "ವಿಶೇಷವಾಗಿ ಆರು ಬ್ಯಾಟ್ಸ್ಮನ್ಗಳು ಮತ್ತು ಒಬ್ಬ ಆಲ್‌ರೌಂಡರ್‌ನೊಂದಿಗೆ ಆಡುವಾಗ, ಅಗ್ರ ನಾಲ್ಕರಲ್ಲಿ ಒಬ್ಬರು ಕಡೆಯವರೆಗೂ ಇದ್ದು ಪಂದ್ಯ ಮುಗಿಸುವುದು ಮುಖ್ಯವಾಗಿದೆ" ಎಂದಿದ್ದಾರೆ.
ಬೌಲಿಂಗ್ನಲ್ಲಿ ಉತ್ತಮ ಪ್ರದರ್ಶನ ತೋರಿದ ಮೊಹಮ್ಮದ್ ಶಮಿ ಬಗ್ಗೆ ಮಾತನಾಡಿದ ರಾಹುಲ್, "ಶಮಿ ನಮ್ಮ ತಂಡದ ಹಿರಿಯ ಆಟಗಾರರಲ್ಲಿ ಒಬ್ಬರು. ಪಂದ್ಯದಿಂದ ಪಂದ್ಯಕ್ಕೆ ಉತ್ತಮ ಪ್ರದರ್ಶನ ತೋರುತ್ತಿದ್ದಾರೆ" ಎಂದರು. ಅಲ್ಲದೆ ಮತ್ತೊಬ್ಬ ವೇಗಿ "ಅರ್ಷ್‌ದೀಪ್ ಸಿಂಗ್ ಪವರ್ ಪ್ಲೇನಲ್ಲಿ ಎರಡು ಓವರ್ ಬೌಲಿಂಗ್ ನಡೆಸಿದ್ರು ಮತ್ತು 19ನೇ ಓವರ್ ಉತ್ತಮ ಸ್ಪೆಲ್ ಮಾಡಿದ್ರು. ಪ್ರತೀ ಬಾರಿಯೂ ಯಾರ್ಕರ್ ಎಸೆಯಲು ಪ್ರಯತ್ನಿಸಿದ್ರು. ಇದು ನಮ್ಮ ಬೌಲರ್ಗಳ ಪರಿಶ್ರಮವನ್ನು ತೋರಿಸುತ್ತದೆ" ಎಂದು ಬೌಲರ್ಗಳ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಮೊದಲು ಬ್ಯಾಟಿಂಗ್ ನಡೆಸಿದ ಡೆಲ್ಲಿ ತಂಡ ಶಿಖರ್ ಧವನ್(106) ಸಿಡಿಸಿದ ಅದ್ಭುತ ಶತಕದ ನೆರವಿನಿಂದ 20 ಓವರ್ಗಳಲ್ಲಿ 164 ರನ್ ಗಳಿಸಿತ್ತು. 165 ರನ್ಗಳ ಗುರಿ ಪಡೆದಿದ್ದ ಪಂಜಾಬ್ 20 ಓವರ್ಗಳಲ್ಲಿ ಇನ್ನು ಒಂದು ಓವರ್ ಬಾಕಿ ಉಳಿದಿರುವಂತೆ 5 ವಿಕೆಟ್ ಕಳೆಂದುಕೊಂಡು ಗುರಿ ತಲುಪಿತು.
