ಮೆಲ್ಬೋರ್ನ್ : ಆಸ್ಟ್ರೇಲಿಯಾ ಎದುರಿನ ಬಾಕ್ಸಿಂಗ್ ಡೇ ಟೆಸ್ಟ್‌ನಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ಮಾಡಲು ನಿರ್ಧರಿಸಿದ ಟಿಮ್ ಪೈನ್‌ ಬಳಗಕ್ಕೆ ರಹಾನೆ ಹುಡುಗರು ಶಾಕ್ ಕೊಟ್ಟಿದ್ದು ಮೊದಲ ದಿನವೇ 195 ರನ್ಗಳಿಗೆ ಸರ್ವ ಪತನ ಕಂಡಿತು.
ಆದರೆ, ಭಾರತ ತಂಡವೂ ತನ್ನ ಮೊದಲ ಇನ್ನಿಂಗ್ಸ್ ಆರಂಭದಲ್ಲೇ ಆಘಾತ ಅನುಭವಿಸಿದೆ. ಓಪನರ್ ಆಗಿ ಕಣಕ್ಕಿಳಿದ ಮಯಾಂಕ್ ಅಗರವಾಲ್ ಮತ್ತು ಶುಭಮನ್ ಗಿಲ್ ಉತ್ತಮ ಆರಂಭ ನೀಡುವಲ್ಲಿ ವಿಫಲರಾದರು.
ಮಯಾಂಕ್ ಅಗರವಾಲ್, ಮಿಚಲ್ ಸ್ಟಾರ್ಕ್ ಅವರ ಮೊದಲನೇ ಓವರ್ನಲ್ಲಿ ಶೂನ್ಯಕ್ಕೆ ಎಲ್ಬಿಡಬ್ಲ್ಯೂ ಆದರು. ಈ ಮೂಲಕ ಮೊದಲ ದಿನದಂತ್ಯಕ್ಕೆ ಭಾರತ ಒಂದು ವಿಕೆಟ್ ಕಳೆದುಕೊಂಡು 36 ರನ್ ಗಳಿಸಿತು. ಶುಭಮನ್ ಗಿಲ್ 28 ಹಾಗೂ ಚೇತೇಶ್ವರ ಪೂಜಾರ 7 ರನ್ಗಳಿಸಿ ನಾಳೆ ಆಟ ಮುಂದುವರೆಸಲಿದ್ದಾರೆ. ಆಸ್ಟೇಲಿಯಾ ಪರ ಸ್ಟಾರ್ಕ್ ಒಂದು ವಿಕೆಟ್ ಪಡೆದರು.
ಆಸೀಸ್ ಮೊದಲ ಇನ್ನಿಂಗ್ಸ್ ಹೀಗಿತ್ತು..: ಆರಂಭಿಕನಾಗಿ ಕಣಕ್ಕಿಳಿದ ಜೋ ಬರ್ನ್ಸ್ ಹಾಗೂ ಮ್ಯಾಥ್ಯೂ ವೇಡ್ ನಿರೀಕ್ಷಿತ ಪ್ರದರ್ಶನ ನೀಡಲಿಲ್ಲ. ಬರ್ನ್ಸ್ ಅವರನ್ನು ಶೂನ್ಯಕ್ಕೆ ಔಟ್ ಮಾಡಿದ ಬುಮ್ರಾ ಮೊದಲ ವಿಕೆಟ್ ಉರುಳಿಸಿದರು.
ನಂತರ ಕ್ರೀಸಿಗೆ ಬಂದ ಮಾರ್ನಸ್ ಲಾಬುಶೇನ್, ವೇಡ್ ಜೊತೆ ಸೇರಿ ಕೆಲ ಹೊತ್ತು ಭಾರತದ ಬೌಲರ್‌ಗಳನ್ನು ದಂಡಿಸಿದರು. ಆದರೆ, ಇದಕ್ಕೆ ಕಡಿವಾಣ ಹಾಕಿದ ಅಶ್ವಿನ್, ವೇಡ್ ವಿಕೆಟ್ ಕಬಳಿಸಿದರು. ಜಡೇಜಾ ಅದ್ಭುತ ಕ್ಯಾಚ್ಗೆ ವೇಡ್ ಬಲಿಯಾದರು.
ನಂತರ ಬಂದ ಸ್ಟೀವ್ ಸ್ಮಿತ್ ಕೂಡ ಅಶ್ವಿನ್ ಅವರ ಕೈಚಳಕಕ್ಕೆ ಯಾವುದೇ ರನ್ಗಳಿಸದೆ ಬೌಲ್ಡ್ ಆಗಿ ಪೆವಿಲಿಯನ್ ಸೇರಿದರು. ಇದಾದ ಬಳಿಕ ಬಂದ ಟ್ರಾವಿಸ್ ಹೆಡ್, ಮಾರ್ನಸ್ ಲಾಬುಶೇನ್ ಜೊತೆ ಸೇರಿ ಅರ್ಧಶತಕದ ಜೊತೆಯಾಟವಾಡಿದರು. ಈ ಜೋಡಿಯನ್ನು ಬುಮ್ರಾ ಬೇರ್ಪಡಿಸಿದರು.
ಟ್ರಾವಿಸ್ ಹೆಡ್ (38) ರನ್ಗಳಿಸಿದಾಗ ನಾಯಕ ರಹಾನೆ ಕ್ಯಾಚಿತ್ತರು. ಇದಾದ ಕೆಲವೇ ಹೊತ್ತಿನಲ್ಲಿ ಟೀಂ ಇಂಡಿಯಾ ಪರ ಪದಾರ್ಪಣೆ ಟೆಸ್ಟ್ ಆಡುತ್ತಿರುವ ಮೊಹಮ್ಮದ್ ಸಿರಾಜ್ ಮತ್ತೊಮ್ಮೆ ತಂಡಕ್ಕೆ ಆಸರೆಯಾದರು. ಇದೇ ಪಂದ್ಯದಲ್ಲಿ ಪದಾರ್ಪಣೆ ಮಾಡಿದ ಮತ್ತೊಬ್ಬ ಆಟಗಾರ ಶುಭಮನ್ ಗಿಲ್ ಕ್ಯಾಚ್ಗೆ ಮಾರ್ನಸ್ ಲಾಬುಶೇನ್ (48) ಪೆವಿಲಿಯನ್ ಹಾದಿ ಹಿಡಿದರು.
ಓದಿ: ಆಸೀಸ್ ವಿರುದ್ಧ ಭಾರತದ ಬಿಗಿ ಹಿಡಿತ: ಬುಮ್ರಾ, ಅಶ್ವಿನ್ ದಾಳಿಗೆ ಬೆದರಿದ ಪೈನ್‌ ಪಡೆ
ನಾಯಕ ಟಿಮ್ ಪೈನ್‌ (13) ರನ್ಗಳಿಸಿ ಅಶ್ವಿನ್ಗೆ ವಿಕೆಟ್ ಒಪ್ಪಿಸಿದರು. ಕ್ಯಾಮರೂನ್ ಗ್ರೀನ್ (12) ರನ್ ಗಳಿಸಿದಾಗ ಸಿರಾಜ್ ಬೌಲಿಂಗ್ನಲ್ಲಿ ಎಲ್ಬಿಗೆ ಬಲಿಯಾದರು. ಕಮಿನ್ಸ್ 9, ಸ್ಟಾರ್ಕ್ 7, ನಾಥನ್ ಲಯಾನ್ 20, ಹೆಜಲ್ವುಡ್ 4* ರನ್ ಗಳಿಸಿದರು. ಟೀಂ ಇಂಡಿಯಾ ಪರ ಬುಮ್ರಾ 4 ವಿಕೆಟ್ ಪಡೆದು ಮಿಂಚಿದ್ರೆ, ಅಶ್ವಿನ್ 3 ಹಾಗೂ ಸಿರಾಜ್ 2, ಜಡೇಜಾ ಒಂದು ವಿಕೆಟ್ ಪಡೆದು ಮಿಂಚಿದರು.
