ಮುಂಬೈ: ಭಾರತ ತಂಡ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಮತ್ತು ಇಂಗ್ಲೆಂಡ್ ವಿರುದ್ಧ 5 ಪಂದ್ಯಗಳ ಟೆಸ್ಟ್ ಸರಣಿಗಾಗಿ ಎರಡೂವರೆ ತಿಂಗಳ ಪ್ರವಾಸ ಕೈಗೊಳ್ಳಲಿದೆ. ಈ ಪ್ರವಾಸಕ್ಕೂ ಮುನ್ನ ಆಯ್ಕೆ ಯಾಗಿರುವ ಆಟಗಾರರಿಗೆ ಕೊರೊನಾ ಕಾಣಿಸಿಕೊಂಡರೆ ಅವರನ್ನು ಸರಣಿಯಿಂದಲೇ ಕೈಬಿಡಲಾಗುವುದು ಎಂದು ಬಿಸಿಸಿಐ ಎಚ್ಚರಿಕೆ ನೀಡಿದೆ.
ಈಗಾಗಲೇ ಪ್ರವಾಸಕ್ಕಾಗಿ 20 ಸದಸ್ಯರ ತಂಡ ಮತ್ತು ಹೆಚ್ಚುವರಿ ಆಟಗಾರರ ಹೆಸರನ್ನು ಬಿಸಿಸಿಐ ಘೋಷಣೆ ಮಾಡಿದೆ. ಭಾರತದಲ್ಲಿ ಕೋವಿಡ್ 19 ಸೋಂಕಿತರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಹಾಗಾಗಿ ಇಂಗ್ಲೆಂಡ್ ಪ್ರವಾಸ ಕೈಗೊಳ್ಳುವವರು ಬಹಳ ಎಚ್ಚರಿಕೆಯಿಂದಿರಲು ಬಿಸಿಸಿಐ ಕಟ್ಟುನಿಟ್ಟಿನ ಕ್ರಮಕ್ಕೆ ಮುಂದಾಗಿದೆ.
ವರದಿಯ ಪ್ರಕಾರ, ವೈರಸ್ನಿಂದ ದೂರವಿರುವುದಕ್ಕಾಗಿ ಮನೆಯಲ್ಲೇ ಇರಬೇಕೆಂದು ಬಿಸಿಸಿಐ ತಿಳಿಸಿದೆ. ಒಂದು ವೇಳೆ ಯಾರಿಗಾದರೂ ಕೋವಿಡ್ ಸೋಂಕು ತಗುಲಿದರೆ ಅವರು ಚೇತರಿಸಿಕೊಂಡ ನಂತರ ಪ್ರತ್ಯೇಕ ಚಾರ್ಟರ್ ಫ್ಲೈಟ್ ಒದಗಿಸಿಕೊಡಲು ಸಾಧ್ಯವಿಲ್ಲ ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.
" ಇಂಗ್ಲೆಂಡ್ ಪ್ರವಾಸಕ್ಕಾಗಿ ವಿಮಾನವೇರಲು ಮುಂಬೈಗೆ ಆಗಮಿಸಿದಾಗ ಪಾಸಿಟಿವ್ ಬಂದರೆ ಅವರಿಗಾಗಿ ಪ್ರತ್ಯೇಕ ಚಾರ್ಟರ್ ಫ್ಲೈಟ್ ಏರ್ಪಡಿಸಲಾಗುವುದಿಲ್ಲ" ಎಂದು ಬೋರ್ಡ್ ತಿಳಿಸಿದೆ.
ಮುಂಬೈ ಬಿಡುವ ಮುನ್ನ ಎಲ್ಲ ಆಟಗಾರರು, ಸಹಾಯಕ ಸಿಬ್ಬಂದಿಗಳು ಮತ್ತು ಕುಟುಂಬಸ್ಥರು ನೆಗೆಟಿವ್ ವರದಿಯನ್ನು ಪಡೆಯಬೇಕಿರುತ್ತದೆ. ಬಯೋಬಬಲ್ಗೆ ಸೋಂಕುರಹಿತವಾಗಿ ಸೇರಬೇಕಾಗುತ್ತದೆ. ಅಲ್ಲದೇ ಈಗಾಗಲೆ ಲಸಿಕೆ ಪಡೆದಿರುವ ಆಟಗಾರರಿಗೆ ಇಂಗ್ಲೆಂಡ್ನಲ್ಲಿ ಕೋವಿಶೀಲ್ಡ್ ಮಾತ್ರ ಕೊವಾಕ್ಸಿನ್ ದೊರೆಯುವುದಿಲ್ಲ ಎಂದು ತಿಳಿಸಿದ್ದೇವೆ. ಎರಡನೇ ಲಸಿಕೆ ಅಲ್ಲೆ ನೀಡಲಾಗುತ್ತದೆ ಎಂದು ಬಿಸಿಸಿಐ ದೃಢಪಡಿಸಿದೆ.
ಇದನ್ನು ಓದಿ:IPL-2021 ಮುಂದುವರೆದರೂ ಇಂಗ್ಲೆಂಡ್ ಆಟಗಾರರು ಆಡುವುದು ಡೌಟ್
