ಮುಂಬೈ(ಮಹಾರಾಷ್ಟ್ರ): ಭಾರತ, ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ ತಂಡಗಳು ಏಕದಿನ ವಿಶ್ವಕಪ್ ಕ್ರಿಕೆಟ್‌ನಲ್ಲಿ ಸೆಮಿ ಫೈನಲ್ ಘಟ್ಟ ತಲುಪಿವೆ. ಟೀಂ ಇಂಡಿಯಾ ಲೀಗ್ ಹಂತದಲ್ಲಿ 8 ಪಂದ್ಯಗಳನ್ನಾಡಿದ್ದು, ಎಲ್ಲವನ್ನೂ ಗೆದ್ದು ಅಗ್ರಸ್ಥಾನದಲ್ಲಿದೆ. ಭಾರತಕ್ಕೆ ಸೆಮಿಸ್ನಲ್ಲಿ ಪ್ರತಿಸ್ಪರ್ಧಿ ಯಾರು? ಎಂಬುದು ಈಗಿನ ಕುತೂಹಲ. ಏಕೆಂದರೆ, ಇನ್ನೊಂದು ಸೆಮಿಫೈನಲ್‌ ಸ್ಥಾನಕ್ಕಾಗಿ ಮೂರು ತಂಡಗಳು ಪೈಪೋಟಿ ನಡೆಸುತ್ತಿವೆ.
ಅಫ್ಘಾನಿಸ್ತಾನ ವಿರುದ್ಧ ರೋಚಕ ಜಯ ಸಾಧಿಸುವ ಮೂಲಕ ಆಸ್ಟ್ರೇಲಿಯಾ ಸೆಮಿಸ್ನಲ್ಲಿ ತಮ್ಮ ಸ್ಥಾನವನ್ನು ಭದ್ರಪಡಿಸಿಕೊಂಡಿದೆ. ಆದರೆ ಸೆಮಿಸ್ನಲ್ಲಿ ಅವರು ಯಾವ ಸ್ಥಾನ ಅಲಂಕರಿಸುವರು ಎಂಬುದು ಮುಂದಿನ ದಿನಗಳಲ್ಲಿ ತಿಳಿದುಬರಬೇಕಿದೆ. 8 ಪಂದ್ಯಗಳಲ್ಲಿ 6 ಗೆಲುವಿನೊಂದಿಗೆ 12 ಅಂಕ ಪಡೆದಿರುವ ಆಸ್ಟ್ರೇಲಿಯಾ ರನ್‌ರೇಟ್ ಆಧಾರದ ಮೇಲೆ ಪಾಯಿಂಟ್ ಪಟ್ಟಿಯಲ್ಲಿ 3ನೇ ಸ್ಥಾನದಲ್ಲಿದೆ. ಆಸೀಸ್ ತಂಡಕ್ಕೆ ಇನ್ನೊಂದು ಪಂದ್ಯ ಬಾಕಿ ಇದೆ. ನವೆಂಬರ್ 11ರಂದು ಬಾಂಗ್ಲಾದೇಶವನ್ನು ಎದುರಿಸಲಿದೆ.
ನ್ಯೂಜಿಲೆಂಡ್‌ಗೆ ಸಂಕಷ್ಟ: ಕಿವೀಸ್ ಸತತ ನಾಲ್ಕು ಪಂದ್ಯಗಳನ್ನು ಗೆದ್ದು ಸೆಮಿಯತ್ತ ಸಾಗಿತ್ತು. ಆದರೆ ನಂತರ ದಿಢೀರ್ ಕುಸಿಯಿತು. ಸತತ ನಾಲ್ಕು ಪಂದ್ಯಗಳಲ್ಲಿ ಸೋಲುಂಡು ಇದೀಗ ಸೆಮಿಸ್‌ಗಾಗಿ ಸಾಕಷ್ಟು ಸೆಣಸಾಡಬೇಕಿದೆ. 8 ಪಂದ್ಯಗಳಲ್ಲಿ ನಾಲ್ಕು ಗೆಲುವು ಹಾಗೂ ಸೋಲುಗಳೊಂದಿಗೆ ಎಂಟು ಅಂಕ ಪಡೆದು ನಾಲ್ಕನೇ ಸ್ಥಾನದಲ್ಲಿದೆ. ನವೆಂಬರ್ 9ರಂದು ಶ್ರೀಲಂಕಾ ವಿರುದ್ಧ ನ್ಯೂಜಿಲೆಂಡ್ ಕೊನೆಯ ಪಂದ್ಯ ಆಡಲಿದೆ. ಈ ಪಂದ್ಯದಲ್ಲಿ ಗೆದ್ದರೂ ಸೆಮಿ ತಲುಪುವ ಭರವಸೆ ಕಡಿಮೆ. ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನ ತಮ್ಮ ಅಂತಿಮ ಪಂದ್ಯಗಳಲ್ಲಿ ಸೋತರೆ ಮಾತ್ರ ಕಿವೀಸ್ ನಾಕೌಟ್ ತಲುಪುತ್ತದೆ. ಒಂದು ವೇಳೆ ಕಿವೀಸ್ ಸೋಲನುಭವಿಸಿದರೆ ಸೆಮೀಸ್ ಭರವಸೆ ಕೈಬಿಡಬೇಕು. ನೆಟ್ ರನ್‌ರೇಟ್ ಪ್ರಕಾರ ಸೆಮಿಸ್ನಲ್ಲಿ ಸ್ಥಾನ ಪಡೆಯುವ ಸಾಧ್ಯತೆ ಕಡಿಮೆ.
ಪಾಕಿಸ್ತಾನಕ್ಕಿದೆ ಅವಕಾಶ: ಪಾಕಿಸ್ತಾನ ತಂಡಕ್ಕೆ ಸೆಮಿಸ್ ತಲುಪುವ ಅವಕಾಶ ಇನ್ನೂ ಇದೆ. ಇದುವರೆಗೆ 8 ಪಂದ್ಯಗಳಲ್ಲಿ 4 ಗೆಲುವು ಹಾಗೂ 4 ಸೋಲಿನೊಂದಿಗೆ 8 ಅಂಕ ಗಳಿಸಿ ಐದನೇ ಸ್ಥಾನದಲ್ಲಿದೆ. ಕಳೆದ ಪಂದ್ಯದಲ್ಲಿ ಕಿವೀಸ್ ವಿರುದ್ಧದ ಅಧಿಕಾರಯುತ ಜಯದೊಂದಿಗೆ ತಮ್ಮ ನೆಟ್ ರನ್‌ರೇಟ್ ಸುಧಾರಿಸಿದ್ದಾರೆ. ಪಾಕಿಸ್ತಾನ ಕೊನೆಯ ಪಂದ್ಯದಲ್ಲಿ (ನವೆಂಬರ್ 11) ಇಂಗ್ಲೆಂಡ್ ವಿರುದ್ಧ ಆಡಲಿದೆ. ಈ ವಿಶ್ವಕಪ್ನಲ್ಲಿ ಹಾಲಿ ಚಾಂಪಿಯನ್ ಇಂಗ್ಲೆಂಡ್ ತಂಡ ಅಂದುಕೊಂಡ ರೀತಿಯ ಫಾರ್ಮ್‌ನಲ್ಲಿಲ್ಲ. ಪಾಕ್ ಗೆಲುವಿನ ನಗೆ ಬೀರಿದರೆ ಸೆಮಿಸ್ಗೆ ತಲುಪುವುದು ಬಹುತೇಕ ಖಚಿತ. ಒಂದು ವೇಳೆ ಸೋತರೂ ಅವಕಾಶಗಳು ಕಡಿಮೆ. ಇತರ ತಂಡಗಳ ಫಲಿತಾಂಶಗಳು ಮತ್ತು ರನ್‌ರೇಟ್ ನಿರ್ಣಾಯಕವಾಗಲಿದೆ.
ಅಫ್ಘಾನಿಸ್ತಾನಕ್ಕೆ ಕೊನೆಯ ಚಾನ್ಸ್: ಭರ್ಜರಿ ಜಯದೊಂದಿಗೆ ವಿಶ್ವಕಪ್ ಸೆಮಿಸ್ ರೇಸ್ ಅನ್ನು ರಸಭರಿತವಾಗಿ ಬದಲಾಯಿಸಿದ ತಂಡ ಅಂದರೆ ಅದು ಅಫ್ಘಾನಿಸ್ತಾನ. ಇಂಗ್ಲೆಂಡ್ ಸೋಲಿಸಿ ನಂತರ ಕಿವೀಸ್ ಕೈಯಲ್ಲಿ ಭಾರಿ ಸೋಲು ಅನುಭವಿಸಿತು ಅಫ್ಘಾನ್. ನಂತರ ಚೇತರಿಸಿಕೊಂಡ ರೀತಿ ಅದ್ಭುತವಾಗಿತ್ತು. ಪಾಕಿಸ್ತಾನ, ಶ್ರೀಲಂಕಾ ಮತ್ತು ನೆದರ್ಲೆಂಡ್ಸ್ ತಂಡವನ್ನು ಸೋಲಿಸಿ ಸೆಮಿಸ್ ರೇಸ್‌ನಲ್ಲಿದ್ದಾರೆ. ಆದ್ರೆ ಆಸೀಸ್ ವಿರುದ್ಧ ಸೋಲುಂಡ ಅಫ್ಘಾನಿಸ್ತಾನ ತಂಡಕ್ಕೆ ಸೆಮಿಸ್ ತಲುಪಲು ಮತ್ತೊಂದು ಕೊನೆಯ ಅವಕಾಶವಿದೆ. ಆ ಪಂದ್ಯದಲ್ಲಿ ಗೆದ್ದರೂಸಹಿತ ಸೆಮಿಸ್ ತಲುಪುವ ಅವಕಾಶ ತೀರಾ ಕಡಿಮೆಯೇ. ಏಕೆಂದರೆ ಸದ್ಯ 8 ಪಂದ್ಯಗಳಲ್ಲಿ 4 ಗೆಲುವು ಹಾಗೂ 4 ಸೋಲಿನೊಂದಿಗೆ 8 ಅಂಕ ಹೊಂದಿರುವ ಅಫ್ಘಾನಿಸ್ತಾನ ರನ್‌ ರೇಟ್ ಮೈನಸ್ ಆಗಿದೆ.
ಅಫ್ಘಾನಿಸ್ತಾನ, ನ್ಯೂಜಿಲೆಂಡ್ ಮತ್ತು ಪಾಕಿಸ್ತಾನ ತಂಡಗಳು ಸೆಮಿಸ್ನಲ್ಲಿ ಸ್ಥಾನ ಪಡೆಯಲು ತೀವ್ರ ಪೈಪೋಟಿ ನಡೆಸಲಿವೆ. ಆದರೆ ತಮ್ಮ ಕೊನೆಯ ಪಂದ್ಯದಲ್ಲಿ ಬಲಿಷ್ಠ ತಂಡವನ್ನು ಎದುರಿಸಬೇಕಾಗಿರುವುದು ಅಫ್ಘಾನಿಸ್ತಾನಕ್ಕೆ ಸವಾಲಿನ ವಿಷಯವೇ. ಅಫ್ಘಾನಿಸ್ತಾನ ನವೆಂಬರ್ 10ರಂದು ದಕ್ಷಿಣ ಆಫ್ರಿಕಾವನ್ನು ಎದುರಿಸಲಿದೆ. ಈಗಾಗಲೇ ರೋಚಕ ಪಂದ್ಯದಲ್ಲಿ ಸೋಲು ಕಂಡಿರುವ ಅಫ್ಘಾನಿಸ್ತಾನ ಕೊನೆಯ ಪಂದ್ಯ ಗೆದ್ದರೂ ಸೆಮೀಸ್ ತಲುಪುವ ಸಾಧ್ಯತೆ ಕಡಿಮೆ. ಅಫ್ಘಾನಿಸ್ತಾನ ಸೆಮಿಸ್ ಫೈನಲ್ನಲ್ಲಿ ಸ್ಥಾನ ಗಿಟ್ಟಿಸಿಕೊಳ್ಳಬೇಕಾದರೆ ಕಿವೀಸ್ ಮತ್ತು ಪಾಕ್ ತಂಡಗಳು ಕೊನೆಯ ಪಂದ್ಯದಲ್ಲಿ ಸೋಲು ಕಾಣಬೇಕು.
ನೆದರ್ಲೆಂಡ್ಸ್ ತಂಡಕ್ಕೆ ಅವಕಾಶಗಳು ಬಹಳ ಕಡಿಮೆ. ಇದುವರೆಗೆ ಆಡಿರುವ 7 ಪಂದ್ಯಗಳಲ್ಲಿ 2 ಗೆಲುವು ಹಾಗೂ 5 ಸೋಲಿನೊಂದಿಗೆ 4 ಅಂಕ ಗಳಿಸಿ 9 ಸ್ಥಾನದಲ್ಲಿದೆ. ಈ ತಂಡದ ರನ್‌ರೇಟ್ ಮೈನಲ್ 1ರಲ್ಲಿದೆ. ಹೀಗಾಗಿ ಉಳಿದ ಎರಡು ಪಂದ್ಯಗಳಲ್ಲಿ ಗೆಲುವು ದಾಖಲಿಸಿದರೂ ಸೆಮಿಸ್ಗೆ ಹಾದಿ ಕಠಿಣವೇ.
ಪಾಯಿಂಟ್ ಪಟ್ಟಿಯಲ್ಲಿ ಭಾರತದ ಮೊದಲ ಸ್ಥಾನವನ್ನು ಯಾರೂ ಆಕ್ರಮಿಸಲು ಸಾಧ್ಯವಿಲ್ಲ. ಎರಡು ಮತ್ತು ಮೂರನೇ ಸ್ಥಾನಕ್ಕಾಗಿ ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ ತಂಡಗಳ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟಿದೆ. ನಾಲ್ಕನೇ ಸ್ಥಾನಕ್ಕೆ ಯಾರು ಎಂಬುದು ಈಗಿನ ಕುತೂಹಲ. ಸೆಮಿಸ್ನಲ್ಲಿ ಮೊದಲ ಸ್ಥಾನ ಪಡೆದ ತಂಡ ನಾಲ್ಕನೇ ಸ್ಥಾನ ಪಡೆದ ತಂಡವನ್ನು ಎದುರಿಸಲಿದೆ. ಎರಡನೇ ಸ್ಥಾನ ಪಡೆದ ತಂಡ ಮೂರನೇ ಸ್ಥಾನ ಪಡೆದ ತಂಡದೊಂದಿಗೆ ಆಡಲಿದೆ.
ಇದನ್ನೂ ಓದಿ: ವಿಶ್ವಕಪ್ ಕ್ರಿಕೆಟ್: ಮ್ಯಾಕ್ಸ್ವೆಲ್ ಭರ್ಜರಿ ದ್ವಿಶತಕ.. ಅಫ್ಘಾನ್ ವಿರುದ್ಧ ಆಸ್ಟ್ರೇಲಿಯಾಕ್ಕೆ ಊಹೆಗೂ ಮೀರಿದ ಜಯ
