ಧರ್ಮಶಾಲಾ (ಹಿಮಾಚಲ ಪ್ರದೇಶ): ದೆಹಲಿ ಮೈದಾನದಲ್ಲಿ ಇಂಗ್ಲೆಂಡ್ ತಂಡ ಅಫ್ಘಾನಿಸ್ತಾನಕ್ಕೆ ಮಣಿದರೆ, ನೆದರ್ಲೆಂಡ್ ಎದುರು ಬೃಹತ್ ಹ್ಯಾಟ್ರಿಕ್ ಜಯದ ಆಸೆಯಲ್ಲಿದ್ದ ದಕ್ಷಿಣ ಆಫ್ರಿಕಾ ಹೀನಾಯ ಸೋಲು ಕಂಡಿತು. ಡಚ್ಚರ ಕರಾರುವಾಕ್ ದಾಳಿಗೆ ಹರಿಣಗಳು ತತ್ತರಿಸಿ ಹೋದರು. ನೆದರ್ಲೆಂಡ್ ನೀಡಿದ್ದ 246 ರನ್ ಗುರಿ ಬೆನ್ನತ್ತಿದ ಬವುಮಾ ಪಡೆ 42.5 ಓವರ್ಗಳಲ್ಲಿ 207 ರನ್ಗಳಿಗೆ ಸರ್ವಪತನ ಕಂಡಿತು. ಇದರಿಂದ ಡಚ್ಚರು 38 ರನ್‌ಗಳಿಂದ ರೋಚಕ ಗೆಲುವು ದಾಖಲಿಸಿದರು. 2023ರ ವಿಶ್ವಕಪ್‌ನಲ್ಲಿದು ಎರಡನೇ ಅಚ್ಚರಿಯ ಫಲಿತಾಂಶವಾಗಿದೆ.
ಮಳೆ ಬಂದ ಕಾರಣ ಎರಡು ಗಂಟೆ ತಡವಾಗಿ ಪಂದ್ಯ ಆರಂಭವಾದ ಕಾರಣ ಡಿಎಲ್ಎಸ್ ನಿಯಮದನ್ವಯ 43 ಓವರ್‌ಗಳಿಗೆ ಪಂದ್ಯವನ್ನು ಕಡಿತ ಮಾಡಲಾಯಿತು. ಟಾಸ್ ಸೋತು ಮೊದಲು ಬ್ಯಾಟಿಂಗ್‌ ಮಾಡಿದ ನೆದರ್ಲೆಂಡ್ ನಾಯಕ ಸ್ಕಾಟ್ ಎಡ್ವರ್ಡ್ಸ್ ಅವರ ಅರ್ಧಶತಕ ಮತ್ತು ಕೆಳ ಕ್ರಮಾಂಕದ ಬ್ಯಾಟರ್ಗಳ ನೆರವಿನಿಂದ ನಿಗದಿತ ಓವರ್‌ಗಳ ಅಂತ್ಯದ ವೇಳೆಗೆ 8 ವಿಕೆಟ್ ನಷ್ಟಕ್ಕೆ ತಂಡ 245 ರನ್ ಕಲೆಹಾಕಿತು.
ಇದನ್ನು ಬೆನ್ನತ್ತಿದ್ದ ದಕ್ಷಿಣ ಆಫ್ರಿಕಾಕ್ಕೆ ಆರಂಭಿಕ ಆಘಾತದ ಜೊತೆ ಸರಣಿ ಆಘಾತವೂ ಆಯಿತು. ಕಳೆದ ಎರಡು ಪಂದ್ಯಗಳಲ್ಲಿ ಅಬ್ಬರದ ಇನ್ನಿಂಗ್ಸ್ ಆಡಿದ್ದ ಆಟಗಾರರು ಬಾಲ ಮುದುರಿಕೊಂಡು ಪೆವಿಲಿಯನ್ಗೆ ತೆರಳಿದರು. ಎರಡು ಪಂದ್ಯದಲ್ಲಿ ಶತಕದ ಇನ್ನಿಂಗ್ಸ್ ಆಡಿದ್ದ ಆರಂಭಿಕ ಆಟಗಾರ ಕ್ವಿಂಟನ್ ಡಿ ಕಾಕ್ ಇಂದು 20 ರನ್ಗೆ ಸುಸ್ತಾಗಿದ್ದರು. ಸತತ ಎರಡು ಪಂದ್ಯಗಳಲ್ಲಿ ವಿಫಲತೆ ಕಂಡಿರುವ ಹರಿಣಗಳ ನಾಯಕ ತೆಂಬಾ ಬವುಮಾ (16) ಇಂದು ಸಹ ದೊಡ್ಡ ಇನ್ನಿಂಗ್ಸ್ ಕಟ್ಟಲಿಲ್ಲ.
ಐಸಿಸಿ 3ನೇ ಶ್ರೇಯಾಂಕಿತ ಆಟಗಾರ ರಾಸ್ಸಿ ವ್ಯಾನ್ ಡೆರ್ ಡುಸ್ಸೆನ್ (4) ಡಚ್ಚರ ಬೌಲಿಂಗ್ ಮುಂದೆ ಮಂಕಾದರು. ಲಂಕಾ ವಿರುದ್ಧ 54 ಬಾಲ್ನಲ್ಲಿ ಶತಕ ದಾಖಲಿಸಿ ದಾಖಲೆ ಬರೆದಿದ್ದ ಐಡೆನ್ ಮಾರ್ಕ್ರಾಮ್ 1 ರನ್ ವಿಕೆಟ್ ಒಪ್ಪಿಸಿದರು. 5ನೇ ವಿಕೆಟ್ಗೆ ಹೆನ್ರಿಚ್ ಕ್ಲಾಸೆನ್ ಮತ್ತು ಡೇವಿಡ್ ಮಿಲ್ಲರ್ 45 ರನ್ನ ಜೊತೆಯಾಟ ಮಾಡಿದರು. ಇದು ತಂಡಕ್ಕೆ ಗೆಲುವಿನ ಆಸರೆ ನೀಡಿತಾದರೂ, 28 ರನ್ ಗಳಿಸಿದ್ದ ಕ್ಲಾಸೆನ್ ವಿಕೆಟ್ ಪತನದಿಂದ ಭರವಸೆಯೂ ಕುಸಿಯಿತು.
ಮಿಲ್ಲರ್ ಏಕಾಂಗಿ ಹೋರಾಟ ವ್ಯರ್ಥ: ಮಾರ್ಕೊ ಜಾನ್ಸೆನ್ 25 ಬಾಲ್ ಆಡಿ ವಿಕೆಟ್ ನಿಲ್ಲಿಸಲು ಪ್ರಯತ್ನಿಸಿದರಾದರೂ 9 ರನ್ಗೆ ವಿಕೆಟ್ ಕೊಟ್ಟರು. ಇನ್ನೊಂದೆಡೆ ಮಾರ್ಕ್ರಾಮ್ ನಿಧಾನ ಗತಿಯಲ್ಲಿ ಇನ್ನಿಂಗ್ಸ್ ಕಟ್ಟುತ್ತಾ ಸಾಗಿದರು. ಜೆರಾಲ್ಡ್ ಕೋಟ್ಜಿ ಮಾರ್ಕ್ರಾಮ್ಗೆ ಬೆಂಬಲ ನೀಡಿದರು. ಆದರೆ 43 ರನ್ ಗಳಿಸಿದ್ದ ಮಾರ್ಕ್ರಾಮ್ ಕ್ಲೀನ್ ಬೌಲ್ಡ್ ಆದರು. 22 ರನ್ ಗಳಿಸಿ ಜೆರಾಲ್ಡ್ ಕೋಟ್ಜಿ ವಿಕೆಟ್ ಕೊಟ್ಟರೆ, 9 ರನ್ಗೆ ರಬಾಡಾ ಪೆವಿಲಿಯನ್ಗೆ ಮರಳಿದರು. ಕೊನೆಯಲ್ಲಿ ಕೇಶವ್ ಮಹಾರಾಜ್ ಮತ್ತು ಲುಂಗಿ ಎನ್‌ಗಿಡಿ ತಂಡವನ್ನು ಗೆಲ್ಲಿಸಲು ಸಕಲ ಪ್ರಯತ್ನವನ್ನು ಮಾಡಿದರಾದರೂ ಜಯ ದಾಖಲಿಸಲಿಲ್ಲ.
ಇದನ್ನೂ ಓದಿ: ವಿಶ್ವಕಪ್ ಕ್ರಿಕೆಟ್: ಹ್ಯಾಟ್ರಿಕ್ ಜಯ ದಾಖಲಿಸಿದ ಭಾರತಕ್ಕೆ ಪುಣೆಯಲ್ಲಿ ಬಾಂಗ್ಲಾ ಸವಾಲು.. ಈ ಆಟಗಾರರ ಮೇಲಿದೆ ಎಲ್ಲರ ಕಣ್ಣು!
