ಟಿ 20 ಕ್ರಿಕೆಟ್ನಲ್ಲಿ ಅಚ್ಚರಿಯ ಫಲಿತಾಂಶಗಳಿಗೆ ಕೊರತೆಯಿಲ್ಲ. ಅದು ಚಾಲ್ತಿಯಲ್ಲಿರುವ ಟಿ20 ವಿಶ್ವಕಪ್ನಲ್ಲೂ ಸಾಗಿದೆ. ಸೆಮೀಸ್ ಸೇರುವ ತಂಡಗಳಲ್ಲಿ ಒಂದಾಗಿದ್ದ ದಕ್ಷಿಣ ಆಫ್ರಿಕಾವನ್ನು ಚೆಂಡಾಡಿದ ಕ್ರಿಕೆಟ್ ಶಿಶು ನೆದರ್ಲ್ಯಾಂಡ್ ಹರಿಣಗಳನ್ನು ಟೂರ್ನಿಯಿಂದಲೇ ಹೊರದಬ್ಬಿತು. ದಕ್ಷಿಣ ಆಫ್ರಿಕಾಗೆ ಈ ಸೋಲು ಎಂದಿಗೂ ಮಾಸದ ಗಾಯ. ಇದಕ್ಕೂ ಮೊದಲು ಇಂಗ್ಲೆಂಡ್ಗೆ ಐರ್ಲೆಂಡ್ ತಂಡ ಶಾಕ್ ನೀಡಿತ್ತು. ಪಾಕಿಸ್ತಾನಕ್ಕೆ ಜಿಂಬಾಬ್ವೆ ಸೋಲಿನ ಬರೆ ಎಳೆದಿತ್ತು.
ಇದೇ ರೀತಿ ಹಿಂದಿನ ಆವೃತ್ತಿಗಳಲ್ಲೂ ಕ್ರಿಕೆಟ್ ಶಿಶುಗಳು ಬಲಿಷ್ಠ ತಂಡಗಳನ್ನು ಕೆಡವಿದ ಉದಾಹರಣೆಗಳಿವೆ. ಪ್ರಮುಖ ಘಟ್ಟದಲ್ಲಿ ತಂಡಗಳನ್ನು ಸೋಲಿಸುವ ಮೂಲಕ ಕೆಲ ತಂಡಗಳಿಗೆ ಟೂರ್ನಿಯಿಂದಲೇ ಗೇಟ್ ಪಾಸ್ ಕೊಡಿಸಿದರೆ, ಇನ್ನೂ ಕೆಲವಕ್ಕೆ ಅಂಕಪಟ್ಟಿಯಲ್ಲಿ ಅಡ್ಡಿಯುಂಟು ಮಾಡಿವೆ. ವಿಶ್ವಕಪ್ನಲ್ಲಿ ಯಾವೆಲ್ಲಾ ತಂಡಗಳು ಬಲಿಷ್ಠ ತಂಡಗಳಿಗೆ ಸೋಲುಣಿಸಿವೆ ಎಂಬುದರ ಮಾಹಿತಿ ಇಲ್ಲಿದೆ.
ಆಸ್ಟ್ರೇಲಿಯಾಗೆ ಕಾಡಿದ್ದ ಜಿಂಬಾಬ್ವೆ: 2007 ರ ವಿಶ್ವಕಪ್ನಲ್ಲಿ ಆಸ್ಟ್ರೇಲಿಯಾ ಜಿಂಬಾಬ್ವೆ ವಿರುದ್ಧ ಸೋಲು ಕಂಡಿತ್ತು. ಎಲ್ಟನ್ ಚಿಗುಂಬರಾ ದಾಳಿಗೆ ನಲುಗಿದ್ದ ಆಸೀಸ್ ಪಡೆ 138 ರನ್ಗೆ ಆಲೌಟ್ ಆಗಿತ್ತು. ಚಿಗುಂಬರಾ 3 ವಿಕೆಟ್ ಕಿತ್ತಿದ್ದರು. ಬ್ಯಾಟಿಂಗ್ನಲ್ಲಿ ಮಿಂಚಿದ್ದ ಬ್ರೆಂಡೆನ್ ಟೈಲರ್ 45 ಎಸೆತಗಳಲ್ಲಿ 60 ರನ್ ಮಾಡಿದ್ದರು.
ಇಂಗ್ಲೆಂಡ್ಗೆ ನೆದರ್ಲ್ಯಾಂಡ್ಸ್ ಸ್ಟ್ರೈಕ್: 2009 ರ ವಿಶ್ವಪ್ನಲ್ಲಿ ಮೊದಲ ಬಾರಿಗೆ ವಿಶ್ವಕಪ್ನಲ್ಲಿ ಸ್ಥಾನ ಪಡೆದಿದ್ದ ನೆದರ್ಲ್ಯಾಂಡ್ ಇಂಗ್ಲೆಂಡ್ಗೆ ಸೋಲಿನ ಕಹಿ ತೋರಿಸಿತ್ತು. ಮಳೆಯ ಕಾಟದ ಮಧ್ಯೆಯೂ 162 ರನ್ ಗುರಿಯನ್ನು ನೆದರ್ಲ್ಯಾಂಡ್ಸ್ ದಾಟಿತ್ತು. ಇದು ಆ ತಂಡಕ್ಕೆ ವಿಶ್ವಕಪ್ನಲ್ಲಿ ದಾಖಲಾದ ಮೊದಲ ಜಯವಾಗಿತ್ತು.
ಐರ್ಲೆಂಡ್ನಿಂದ ಸೋತಿದ್ದ ಬಾಂಗ್ಲಾ-2009: ವಿಶ್ವಕಪ್ನಲ್ಲಿ ಅತಿ ಹೆಚ್ಚು ಬಾರಿ ಶಾಕಿಂಗ್ ಫಲಿತಾಂಶಕ್ಕೆ ಒಳಗಾದ ತಂಡ ಬಾಂಗ್ಲಾದೇಶ. 2009 ರ ಆವೃತ್ತಿಯಲ್ಲಿ ಐರ್ಲೆಂಡ್ ತಂಡದೆದುರು ಸೋತು ಭಾರಿ ಮುಖಭಂಗಕ್ಕೆ ಒಳಗಾಗಿತ್ತು. ಐರ್ಲೆಂಡ್ ಪಡೆ ನೀಡಿದ್ದ 137 ರನ್ ಸಾಧಾರಣ ಮೊತ್ತ ಭೇದಸಲಾಗದೇ 90 ರನ್ಗೆ ಸೋಲು ಕಂಡಿತ್ತು.
ಇಂಗ್ಲೆಂಡ್ ಗರ್ವ ಮುರಿದಿದ್ದ ನೆದರ್ಲ್ಯಾಂಡ್ಸ್-2014: 2009 ರ ವಿಶ್ವಕಪ್ನಲ್ಲಿ ಇಂಗ್ಲೆಂಡ್ಗೆ ಸೋಲುಣಿಸಿದ್ದ ನೆದರ್ಲ್ಯಾಂಡ್ಸ್ ತಂಡ 5 ವರ್ಷಗಳ ಬಳಿಕ 2014 ರ ಚುಟುಕು ವಿಶ್ವಕಪ್ನಕಲ್ಲೂ ಶಾಕ್ ನೀಡಿತು. ಟೂರ್ನಿಯಿಂದ ಹೊರಬಿದ್ದು ನಿರಾಸೆ ಅನುಭವಿಸಿದ್ದ ಇಂಗ್ಲೆಂಡ್ ಆಡಿದ ಔಪಚಾರಿಕ ಪಂದ್ಯದಲ್ಲೂ ಸೋಲು ಕಾಣುವಂತಾಯಿತು. 133 ರನ್ಗೆ ಡಚ್ ಪಡೆಯನ್ನು ಕಟ್ಟಿಹಾಕಿದ್ದರೂ, 110 ರನ್ ಗಳಿಸಲು ಮಾತ್ರ ಶಕ್ತವಾಗಿ ಬ್ರಿಟಿಷರು ಸೋತಿದ್ದರು.
ಹಾಂಕಾಂಗ್ ಕೈಯಲ್ಲಿ ಬಾಂಗ್ಲಾಗೆ ಮುಖಭಂಗ: 2014 ರ ಟೂರ್ನಿಯಲ್ಲಿ ಮತ್ತೊಂದು ಅಚ್ಚರಿಯ ಫಲಿತಾಂಶ ನೀಡಿದ್ದು ಕ್ರಿಕೆಟ್ ಶಿಶು ಹಾಂಕಾಂಗ್ ಪಡೆ. ಬಾಂಗ್ಲಾದೇಶವನ್ನು 108 ರನ್ಗೆ ತಡೆದಿದ್ದ ಹಾಂಕಾಂಗ್ ಕೊನೆಯ ಓವರ್ನಲ್ಲಿ ವಿಕ್ಟರಿ ಸಾಧಿಸಿತ್ತು. ಈ ಸೋಲು ಬಾಂಗ್ಲಾಗೆ ಮುಳ್ಳಾಗಿ ಕಾಡಿತ್ತು.
ವಿಂಡೀಸ್ ದೈತ್ಯರಿಗೆ ಆಫ್ಘನ್ ಗುಮ್ಮ: 2016 ರಲ್ಲಿ ಗುಂಪು ಹಂತದಲ್ಲಿನ ಪಂದ್ಯದಲ್ಲಿ ಕ್ರಿಕೆಟ್ನಲ್ಲಿ ಬೆಳೆಯುತ್ತಿದ್ದ ಆಫ್ಘಾನಿಸ್ತಾನ ತಂಡ ದೈತ್ಯ ಬ್ಯಾಟರ್ಗಳನ್ನು ಹೊಂದಿದ್ದ ವೆಸ್ಟ್ ಇಂಡೀಸ್ಗೆ ಕೊನೆ ಓವರ್ನಲ್ಲಿ ಸೋಲುಣಿಸಿತ್ತು. ಇದು ವಿಂಡೀಸ್ ತಂಡಕ್ಕೆ ಮುಂದಿನ ಹಂತಕ್ಕೆ ತೆರಳಲು ಅಡ್ಡಿ ಉಂಟು ಮಾಡಿತ್ತು. ಪಂದ್ಯದಲ್ಲಿ ರಶೀದ್ ಖಾನ್ ಸ್ಪಿನ್ ದಾಳಿ ನಡೆಸಿದ್ದರು.
ಬಾಂಗ್ಲಾದೇಶಕ್ಕೆ ಸ್ಕಾಟ್ಲೆಂಡ್ ಬಿಗ್ ಶಾಕ್-2021: ಕಳೆದ ವರ್ಷದ ವಿಶ್ವಕಪ್ನಲ್ಲಿ ಅಚ್ಚರಿಯ ಫಲಿತಾಂಶ ನೀಡಿದ ಪಂದ್ಯವೆಂದರೆ ಅದು ಬಾಂಗ್ಲಾದೇಶ ಮತ್ತು ಸ್ಕಾಟ್ಲೆಂಡ್ ನಡುವಿನ ಸೆಣಸಾಟ. 140 ರನ್ಗೆ ಪತನಗೊಂಡಿದ್ದ ಸ್ಕಾಟ್ಲೆಂಡ್ ಮರು ಹೋರಾಟ ಮಾಡಿ ಬಾಂಗ್ಲಾದೇಶವನ್ನು 134 ರನ್ಗಳಿಗೆ ಕಟ್ಟಿಹಾಕಿ ವಿಜಯ ಸಾಧಿಸಿತ್ತು.
ಹರಿಣಗಳಿಗೆ ಗುದ್ದಿದ ಡಚ್ ಪಡೆ-2022: ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್ ಕೂಡ ಅಚ್ಚರಿಯ ಫಲಿತಾಂಶಗಳಿಗೆ ಕಾರಣವಾಗಿದೆ. ಸೆಮೀಸ್ ಸೇರುವ ಹಾದಿಯಲ್ಲಿದ್ದ ದಕ್ಷಿಣ ಆಫ್ರಿಕಾ ನೆದರ್ಲ್ಯಾಂಡ್ಸ್ ವಿರುದ್ಧ ಹೀನಾಯ ಸೋಲು ಕಂಡು ಮನೆಯ ಹಾದಿ ಹಿಡಿಯಿತು. ಡಚ್ಚರು ನೀಡಿದ 158 ರನ್ಗಳನ್ನು ಮೀರಲಾಗದ ಹರಿಣಗಳು 145 ರನ್ಗೆ ಗಂಟುಮೂಟೆ ಕಟ್ಟಿದ್ದವು.
ಶ್ರೀಲಂಕಾಗೆ ನಮೀಬಿಯಾ ಪೆಟ್ಟು-2022: ಏಷ್ಯಾಕಪ್ ವಿಜೇತ ತಂಡವಾದ ಶ್ರೀಲಂಕಾ ವಿಶ್ವಕಪ್ನಲ್ಲಿ ಆಡಿದ ಅರ್ಹತಾ ಪಂದ್ಯದಲ್ಲಿ ಕ್ರಿಕೆಟ್ ಅಕ್ಷರ ಕಲಿಯುತ್ತಿರುವ ನಮೀಬಿಯಾ ವಿರುದ್ಧ ಮುಖಭಂಗ ಅನುಭವಿಸಿತ್ತು. ನಮೀಬಿಯಾ ನೀಡಿದ್ದ 164 ರನ್ಗಳ ಗುರಿಗೆ ಲಂಕಾ ಪಡೆ ಕೇವಲ 108 ರನ್ಗೆ ಸರ್ವಪತನ ಕಂಡು ಹೀನಾಯ ಸೋಲು ಅನುಭವಿಸಿತು.
ಪಾಕಿಸ್ತಾನಕ್ಕೆ ಜಿಂಬಾಬ್ವೆ ಮರ್ಮಾಘಾತ-2022: ಟಿ20 ವಿಶ್ವಕಪ್ನಲ್ಲಿ ಪಾಕಿಸ್ತಾನ ತಾನಾಡಿದ 2 ನೇ ಪಂದ್ಯದಲ್ಲಿ ಜಿಂಬಾಬ್ವೆ ವಿರುದ್ಧ ಸೋತು ಭಾರಿ ಟೀಕೆಗೆ ಗುರಿಯಾಗಿತ್ತು. ಇದು ಆ ತಂಡದ ಸೆಮೀಸ್ಗೂ ಮುಳ್ಳಾಗಿತ್ತು. ಜಿಂಬಾಬ್ವೆ 1 ರನ್ನಿಂದ ಕೊನೆಯ ಓವರ್ನಲ್ಲಿ ಗೆದ್ದು ಇತಿಹಾಸ ನಿರ್ಮಿಸಿತ್ತು.
ಐರ್ಲೆಂಡ್ಗೆ ಶರಣಾದ ಇಂಗ್ಲೆಂಡ್-2022: ಸೆಮಿಫೈನಲ್ ತಲುಪಿರುವ ಇಂಗ್ಲೆಂಡ್ ಪಡೆ ಗುಂಪು ಹಂತದಲ್ಲಿ ಐರ್ಲೆಂಡ್ ಎದುರು ಡಕ್ವರ್ಥ್ ಲೂಯಿಸ್ ನಿಯಮದಡಿ 5 ರನ್ಗಳ ಸೋಲು ಕಂಡಿತ್ತು. ಐರ್ಲೆಂಡ್ ಪಡೆ 157 ರನ್ ಗುರಿ ನೀಡಿತ್ತು. ಇಂಗ್ಲೆಂಡ್ ಇನ್ನಿಂಗ್ಸ್ ವೇಳೆ ಮಳೆ ಬಂದು ಆಟ ನಿಂತಿತು. ನಿಗದಿಗಿಂತ 5 ರನ್ ಹಿಂದಿದ್ದ ಇಂಗ್ಲೆಂಡ್ಗೆ ಸೋಲು ಉಂಟಾಯಿತು.
ಓದಿ: ವಿರಾಟ್ ಕೊಹ್ಲಿಗೆ ಐಸಿಸಿ ಅಕ್ಟೋಬರ್ ತಿಂಗಳ ಅತ್ಯುತ್ತಮ ಕ್ರಿಕೆಟರ್ ಪ್ರಶಸ್ತಿ.. ಮಹಿಳೆಯರಲ್ಲಿ ಯಾರಿಗೆ ಅವಾರ್ಡ್?
