ಬಾಂಬೆ ಹೈಕೋರ್ಟ್​​ ಮೆಟ್ಟಿಲೇರಿದ ಗಂಗೂಲಿ... ಯಾವ ಕಾರಣಕ್ಕಾಗಿ?

ಬಡ್ಡಿ ಸಮೇತವಾಗಿ ತಮಗೆ 36 ಕೋಟಿ ರೂ. ಬರಬೇಕಾಗಿದ್ದು, ಎರಡು ಕಂಪನಿಗಳು ಈ ಹಣ ಪಾವತಿ ಮಾಡುವವರೆಗೆ ಯಾವುದೇ ರೀತಿಯ ವಹಿವಾಟು ನಡೆಸದಂತೆ ನಿರ್ಬಂಧ ಹಾಕಬೇಕೆಂದು ಗಂಗೂಲಿ ಮನವಿ ಮಾಡಿದ್ದಾರೆ.

ನವದೆಹಲಿ: ಭಾರತೀಯ ಕ್ರಿಕೆಟ್​ ಮಂಡಳಿ(ಬಿಸಿಸಿಐ) ಅಧ್ಯಕ್ಷ ಸೌರವ್​ ಗಂಗೂಲಿ ಬಾಂಬೆ ಹೈಕೋರ್ಟ್ ಮೆಟ್ಟಿಲೇರಿದ್ದಾರೆ. ತಮ್ಮ ವ್ಯವಸ್ಥಾಪನಾ ಕಂಪನಿಗಳು ನೀಡಬೇಕಾಗಿರುವ ಪರಿಹಾರ ಮೊತ್ತ ಬಿಡುಗಡೆ ಮಾಡುವಂತೆ ಅವರು ಕೇಳಿಕೊಂಡಿದ್ದಾರೆ.

ಈ ಹಿಂದೆ ಅವರು ತಮ್ಮ ನಿರ್ವಹಣಾ ಕಂಪನಿಗಳಾಗಿದ್ದ ಪರ್ಸೆಪ್ಟ್​​ ಟ್ಯಾಲೆಂಟ್​ ಮ್ಯಾನೇಜ್​ಮೆಂಟ್​ ಮತ್ತು ಪರ್ಸೆಪ್ಟ್​ ಡಿ ಮಾರ್ಕ್​ ಇಂಡಿಯಾ ಲಿಮಿಟೆಡ್​​​ ಗಂಗೂಲಿಗೆ ಪರಿಹಾರ ನೀಡುವಂತೆ ನ್ಯಾಯಮಂಡಳಿ 2018ರಲ್ಲಿ ಆದೇಶ ನೀಡಿತ್ತು. ಆದರೆ ಇಲ್ಲಿಯವರೆಗೆ ಪರಿಹಾರ ಸಿಗದ ಕಾರಣ ಇದೀಗ ಬಾಂಬೆ ಹೈಕೋರ್ಟ್ ಮೊರೆಹೋಗಿದ್ದಾರೆ. ಜೊತೆಗೆ ಎರಡು ಕಂಪನಿಗಳು ತಮ್ಮ ಆಸ್ತಿ ಬಹಿರಂಗಪಡಿಸುವಂತೆ ಕೋರಿದ್ದಾರೆ.

ಎರಡು ಕಂಪನಿಗಳಿಂದ ತಮಗೆ ಬಡ್ಡಿ ಸಮೇತವಾಗಿ 36 ಕೋಟಿ ರೂ ಬರಬೇಕಾಗಿದ್ದು, ಒಟ್ಟು ಪರಿಹಾರದ ಮೊತ್ತ ನೀಡುವಂತೆ ಸೂಚಿಸಬೇಕು ಎಂದು ತಿಳಿಸಿದ್ದಾರೆ. ಬಿಸಿಸಿಐ ಅಧ್ಯಕ್ಷರು ಸಲ್ಲಿಕೆ ಮಾಡಿರುವ ಅರ್ಜಿ ವಿಚಾರಣೆಯನ್ನ ಬಾಂಬೆ ಹೈಕೋರ್ಟ್​​ ಜುಲೈ 26ರಂದು ಕೈಗೆತ್ತಿಕೊಳ್ಳಲಿದೆ. ಇದರ ಬೆನ್ನಲ್ಲೇ ಮಾತನಾಡಿರುವ ಕಂಪನಿಗಳ ಪರ ವಕೀಲ ಶಾರ್ದೂಲ್​ ಸಿಂಗ್​, ಇದೇ 20ರೊಳಗಾಗಿ ಎರಡು ಕಂಪನಿ ತಮ್ಮ ಆಸ್ತಿ ಬಹಿರಂಗಪಡಿಸಲಿವೆ ಎಂದಿದ್ದಾರೆ.