ಬೆಂಗಳೂರು : ಮೊಹಮದ್ ಸಿರಾಜ್.. ಸದ್ಯ ಭಾರತ ಕ್ರಿಕೆಟ್ ತಂಡದ ಮುಂಚೂಣಿ ವೇಗದ ಬೌಲರ್. ಐಪಿಎಲ್ನಲ್ಲಿ ಬೆಂಗಳೂರು ರಾಯಲ್ ಚಾಲೆಂಜರ್ಸ್ ತಂಡದ ಪ್ರಮುಖ ಬೌಲರ್ ಆಗಿರುವ ಸಿರಾಜ್, ಈ ಬಾರಿಯ ಹರಾಜಿಗೂ ಮುನ್ನವೇ ತಂಡ ಅವರನ್ನು ರೀಟೇನ್ ಮಾಡಿಕೊಂಡಿದೆ.
ಇಂತಿಪ್ಪ ಮೊಹಮದ್ ಸಿರಾಜ್, ತಮ್ಮ ಹಳೆಯ ದಿನಗಳನ್ನು ಮೆಲುಕು ಹಾಕಿದ್ದಾರೆ. ತಾವು ಈ ಹಿಂದೆ ಹೈದರಾಬಾದ್ನ ಉಪ್ಪಲ್ ಕ್ರೀಡಾಂಗಣಕ್ಕೆ ಅಭ್ಯಾಸಕ್ಕೆ ಹೋಗುವಾಗ ತಮ್ಮ ತಂದೆ ಕೇವಲ 60 ರೂಪಾಯಿ ಮಾತ್ರ ನೀಡುತ್ತಿದ್ದರು. ಇದರಲ್ಲಿಯೇ ನಾನು ಕ್ರಿಕೆಟ್ ಅಭ್ಯಾಸ ಮುಗಿಸಿ ಬರಬೇಕಿತ್ತು ಎಂದು ತಮ್ಮ ಕಷ್ಟದ ದಿನಗಳನ್ನು ನೆನೆದಿದ್ದಾರೆ.
ಐಪಿಎಲ್, ಭಾರತ ತಂಡದಲ್ಲಿ ಆಡುವ ಮುನ್ನ ನನ್ನ ಬಳಿ ಪ್ಲಾಟಿನಾ ಬೈಕ್ ಇತ್ತು. ನನ್ನ ಮನೆಯಿಂದ ದೂರವಿದ್ದ ಉಪ್ಪಲ್ ಕ್ರೀಡಾಂಗಣಕ್ಕೆ ಹೋಗಲು ಭಾರಿ ಕಷ್ಟ ಪಡುತ್ತಿದ್ದೆ. ಆಟೋ ಚಾಲಕರಾಗಿದ್ದ ನನ್ನ ತಂದೆ ನೀಡುತ್ತಿದ್ದ 60 ರೂಪಾಯಿಯಲ್ಲಿ ಪೆಟ್ರೋಲ್ ಹಾಕಿಸಿಕೊಂಡು ಕ್ರಿಕೆಟ್ ಅಭ್ಯಾಸಕ್ಕೆಂದು ಕ್ರೀಡಾಂಗಣಕ್ಕೆ ಬರುತ್ತಿದ್ದೆ ಎಂದು ನೆನಪಿಸಿಕೊಂಡಿದ್ದಾರೆ.
ಬಳಿಕ ಐಪಿಎಲ್ ಸೇರಿದ ಮೇಲೆ ನನ್ನೆಲ್ಲಾ ಕಷ್ಟಗಳು ಕರಗುತ್ತಾ ಬಂದವು. ತಂದೆ ಆಟೋ ಓಡಿಸುವುದು, ತಾಯಿ ಮನೆಗೆಲಸ ಮಾಡುವುದನ್ನು ನಿಲ್ಲಿಸಿದರು. ಬಾಡಿಗೆ ಮನೆ ಬಿಟ್ಟು ಸ್ವಂತ ಮನೆ ಮಾಡಿಕೊಂಡೆವು. ನನ್ನ ಕುಟುಂಬವನ್ನು ಖುಷಿಯಾಗಿಡಬೇಕೆಂಬ ನನ್ನ ಆಸೆಗೆ ಐಪಿಎಲ್ ನೀರೆರೆಯಿತು. ಐಪಿಎಲ್ನಿಂದ ನಾನು ಎಲ್ಲವನ್ನೂ ಕಲಿತಿದ್ದೇನೆ. ಹಲವಾರು ಗೆಳೆಯರನ್ನೂ ನೀಡಿದೆ ಎಂದು ಸಂತಸ ಹಂಚಿಕೊಂಡಿದ್ದಾರೆ.
ಸಿರಾಜ್ಗೆ ಶಾಕ್ ನೀಡಿದ್ದ ವಿರಾಟ್ ಕೊಹ್ಲಿ : ಆರ್ಸಿಬಿ ತಂಡದ ಮಾಜಿ ನಾಯಕ ವಿರಾಟ್ ಕೊಹ್ಲಿ ತಮಗೆ ಶಾಕ್ ನೀಡಿದ ಬಗ್ಗೆಯೂ ಮಾತನಾಡಿರುವ ಸಿರಾಜ್, ನನ್ನ ಮನೆಯಲ್ಲಿ ಔತಣಕೂಟ ನೀಡಲು ಇಚ್ಚಿಸಿ ತಂಡದ ಆಟಗಾರರನ್ನುಆಹ್ವಾನಿಸಿದ್ದೆ.
ಅದರಂತೆ ವಿರಾಟ್ ಕೊಹ್ಲಿಯನ್ನು ಕರೆದಾಗ, ನನಗೆ ಬೆನ್ನು ನೋವಿದೆ ಬರಲಾಗಲ್ಲ ಎಂದಿದ್ದರು. ಪಾರ್ಥಿವ್ ಪಟೇಲ್, ಯಜ್ವೇಂದ್ರ ಚಾಹಲ್ ಸೇರಿದಂತೆ ಎಲ್ಲರೂ ಬಂದಿದ್ದರು. ಈ ವೇಳೆ ವಿರಾಟ್ ಕೊಹ್ಲಿ ಕೂಡ ದಿಢೀರನೇ ಕಾರಿಳಿದು ಬಂದಿದ್ದು, ಎಲ್ಲರಲ್ಲೂ ಅತ್ಯಾಶ್ಚರ್ಯ ಮೂಡಿಸಿತ್ತು ಎಂದು ಸ್ಮರಿಸಿಕೊಂಡಿದ್ದಾರೆ.
