ಕೋಲ್ಕತ್ತಾ: ಟಿ20 ವಿಶ್ವಕಪ್ನ ಫೈನಲ್ ಪಂದ್ಯ ಮೆಲ್ಬೋರ್ನ್ ಕ್ರೀಡಾಂಗಣದಲ್ಲಿ ನಾಳೆ ನಡೆಯಲಿದ್ದು, ಪಾಕಿಸ್ತಾನ ಮತ್ತು ಇಂಗ್ಲೆಂಡ್ ತಂಡಗಳು ಪ್ರಶಸ್ತಿಗಾಗಿ ಸೆಣಸಾಡಲಿವೆ. ನ್ಯೂಜಿಲ್ಯಾಂಡ್ ಸೋಲಿಸಿ ಪಾಕಿಸ್ತಾನ ಮೊದಲ ತಂಡವಾಗಿ ಫೈನಲ್ ಪ್ರವೇಶಿಸಿದ್ದರೆ, ಭಾರತವನ್ನು ಹೀನಾಯವಾಗಿ ಸೋಲಿಸಿ ಆಂಗ್ಲರು ಪ್ರಶಸ್ತಿ ಸುತ್ತು ತಲುಪಿದ್ದಾರೆ. ಪಾಕ್ ಮತ್ತು ಇಂಗ್ಲೆಂಡ್ ನಡುವಿನ ಈ ಪಂದ್ಯ 30 ವರ್ಷಗಳ ವಿಶ್ವಕಪ್ ದಾಖಲೆಯನ್ನು ಮರುಕಳಿಸುವ ಸಾಧ್ಯತೆ ಇದೆ.
30 ವರ್ಷಗಳ ಹಿಂದೆ ಇದೇ ಮೆಲ್ಬೋರ್ನ್ ಕ್ರೀಡಾಂಗಣದಲ್ಲಿ ಪಾಕಿಸ್ತಾನ, ಇಂಗ್ಲೆಂಡ್ ತಂಡವನ್ನು ಸೋಲಿಸಿ ವಿಶ್ವಕಪ್ ಎತ್ತಿಹಿಡಿದಿತ್ತು. ಈ ದಾಖಲೆಯನ್ನು ಮತ್ತೆ ಮರುಕಳಿಸಲು ಪಾಕಿಸ್ತಾನ ಸಜ್ಜಾಗಿದ್ದರೆ, ಇಂಗ್ಲೆಂಡ್ ಎರಡನೇ ಐಸಿಸಿ ವಿಶ್ವಕಪ್ ವಶಕ್ಕೆ ತಂತ್ರ ರೂಪಿಸಿದೆ. ನಾಳಿನ ಪಂದ್ಯದ ಬಗ್ಗೆ ಪಾಕಿಸ್ತಾನ ಮಾಜಿ ಆಲ್ರೌಂಡರ್, ನಾಯಕ ಮುಷ್ತಾಕ್ ಮೊಹಮ್ಮದ್ ಈಟಿವಿ ಭಾರತ್ ಜೊತೆ ಮಾತನಾಡಿದ್ದು, ಪಂದ್ಯದ ರೋಚಕತೆಯ ಬಗ್ಗೆ ಹೇಳಿದ್ದಾರೆ.
30 ವರ್ಷಗಳ ಹಿಂದಿನ ದಾಖಲೆ ಇಲ್ಲಿ ನಿರ್ಮಾಣವಾಗುತ್ತಾ?: ಆಸ್ಟ್ರೇಲಿಯಾದ ಮೆಲ್ಬೋರ್ನ್ನಲ್ಲಿ ಇತ್ತಂಡಗಳ ಮಧ್ಯೆ ಪಂದ್ಯ ನಡೆಯಲಿದೆ. 30 ವರ್ಷಗಳ ಹಿಂದಿನ ದಾಖಲೆಯನ್ನು ತಂಡ ಮರಳಿ ಬರೆಯುವ ವಿಶ್ವಾಸವಿದೆ. ಇದೊಂದು ಉತ್ತಮ ಪಂದ್ಯವಾಗಿರಲಿದ್ದು, ರೋಚಕತೆ ನೀಡುವುದರಲ್ಲಿ ಯಾವುದೇ ಸಂದೇಹವಿಲ್ಲ.
ಇಂಗ್ಲೆಂಡ್ ಮತ್ತು ಪಾಕಿಸ್ತಾನ ತಂಡಗಳನ್ನು ಬಲಾಬಲವೇನು?: ಇಂಗ್ಲೆಂಡ್ ವಿಶ್ವದ ಬಲಿಷ್ಠ ತಂಡಗಳಲ್ಲಿ ಒಂದು ಎಂಬುದು ಸರ್ವವಿಧಿತ. ಬಲಿಷ್ಠ ಭಾರತವನ್ನು ಸದೆಬಡಿದು ಫೈನಲ್ಗೆ ಬಂದಿದೆ. ಇದು ಆ ತಂಡದ ಶಕ್ತಿ ತೋರಿಸುತ್ತದೆ. ಪಾಕಿಸ್ತಾನ ಅದೃಷ್ಟದಾಟದಲ್ಲಿ ಫೈನಲ್ಗೆ ಬಂದರೂ ಉತ್ತಮ ಪ್ರದರ್ಶನ ತೋರಿದೆ. ಅಂತಿಮ ಹಣಾಹಣಿಗೆ ಬಂದಿರುವುದು ತಂಡ ಇದೇ ಖದರ್ ಮುಂದುವರಿಸಿದಲ್ಲಿ ಪ್ರಶಸ್ತಿ ಪಡೆಯಲಿದೆ.
ಪಾಕಿಸ್ತಾನದ ಈವರೆಗಿನ ಜರ್ನಿ ಹೇಗಿತ್ತು?: ಟೂನಿರ್ಯ ಆರಂಭಿಕ ಪಂದ್ಯಗಳಲ್ಲಿನ ಹೀನಾಯ ಸೋಲು ತಂಡವನ್ನು ಕುಗ್ಗಿಸಿತ್ತು. ಬಳಿಕ ಪುಟಿದೆದ್ದ ತಂಡ ಗೆಲ್ಲುತ್ತಾ ಸಾಗಿ ಬಂದಿದ್ದು ಅದ್ಭುತವೇ ಸರಿ. ಅದರಲ್ಲೂ ನೆದರ್ಲ್ಯಾಂಡ್ ತಂಡ ಪಾಕಿಸ್ತಾನಕ್ಕೆ ಹೆಚ್ಚಿನ ಉಪಕಾರ ಮಾಡಿದೆ. ಅದೃಷ್ಟದ ಬಾಗಿಲು ತೆರೆದುಕೊಟ್ಟಿತು. ಬೌಲಿಂಗ್ ಪಡೆಯೇ ತಂಡದ ಶಕ್ತಿಯಾಗಿದೆ. ಹಿಂಬಾಗಿಲಿನಿಂದ ಬಂದ ತಂಡ ಫೈನಲ್ಗೆ ಬಂದರೂ, ಪ್ರದರ್ಶನವನ್ನು ಅಲ್ಲಗಳೆಯುವಂತಿಲ್ಲ.
ತಂಡದ ಪ್ರದರ್ಶನ 1992 ರ ವಿಶ್ವಕಪ್‌ನಂತೆಯೇ ಇದೆಯೇ?: ಹೌದು, 1992 ರ ವಿಶ್ವಕಪ್ನಲ್ಲೂ ಪಾಕಿಸ್ತಾನ ಪಂದ್ಯಾವಳಿಯಿಂದ ನಿರ್ಗಮಿಸುವ ಹಾದಿಯಲ್ಲಿ ಎದ್ದು ಫೈನಲ್ ತಲುಪಿ ಪ್ರಶಸ್ತಿ ಜಯಿಸಿತ್ತು. ಈ ಬಾರಿಯೂ ಅದೇ ತೆರನಾದ ಪರಿಸ್ಥಿತಿ ಮರುಕಳಿಸಿದೆ. ಅಂದು ಸೆಮಿಫೈನಲ್‌ನಲ್ಲಿ ನ್ಯೂಜಿಲ್ಯಾಂಡ್ ತಂಡವನ್ನು ಸೋಲಿಸಲಾಗಿತ್ತು. ಈಗಲೂ ಅದೇ ಜರುಗಿದೆ. ಬಳಿಕ ಇಂಗ್ಲೆಂಡ್ ಫೈನಲ್ನಲ್ಲಿ ಎದುರಾಗಿತ್ತು. ಬಳಿಕ ನಡೆದಿದ್ದೆಲ್ಲವೂ ಇತಿಹಾಸ. ಈ ಬಾರಿಯೂ ಪಾಕಿಸ್ತಾನ ವಿಶ್ವಕಪ್ ಗೆದ್ದು ಆ ಇತಿಹಾಸವನ್ನು ಮರಳಿ ಬರೆಯಲಿದೆ ಎಂಬ ವಿಶ್ವಾಸವಿದೆ.
ಇತ್ತಂಡಗಳ ಆಟಗಾರರಲ್ಲಿ ಯಾರ ಪಾತ್ರ ಹೆಚ್ಚಿರಲಿದೆ?: ತಂಡದ ಹನ್ನೊಂದು ಜನರೂ ತಮ್ಮ ಹೊಣೆಯನ್ನು ನಿಭಾಯಿಸಬೇಕು. ಬ್ಯಾಟ್ಸಮ್ನಗಳು ರನ್ ಗಳಿಸಿದರೆ, ಬೌಲರ್ಗಳು ವಿಕೆಟ್ ಪಡೆಯಬೇಕು. ಎರಡೂ ತಂಡಗಳ ಆಟಗಾರರೂ ಇದನ್ನು ಮಾಡಬೇಕು. ತಂಡದ ರಣತಂತ್ರ ಡ್ರೆಸ್ಸಿಂಗ್ ರೂಮಿನಲ್ಲಿ ಸಿದ್ಧವಾಗುತ್ತದೆ. ಯಾರನ್ನು ಟಾರ್ಗೆಟ್ ಮಾಡಬೇಕು ಎಂಬುದು ಅಲ್ಲಿ ನಿರ್ಧಾರವಾಗುತ್ತದೆ. ಹೀಗಾಗಿ ಮೈದಾನದಲ್ಲಿ ಯಾರು ಸಿಡಿಯಲಿದ್ದಾರೆ ಎಂಬುದು ಊಹಿಸುವುದು ತುಸು ಕಷ್ಟಕರ ಸಂಗತಿ.
ಇಂಗ್ಲೆಂಡ್- ಪಾಕಿಸ್ತಾನ ತಂಡಗಳ ಬಲ- ಲೋಪವೇನು?: ಇಂಗ್ಲೆಂಡ್ ಎಲ್ಲಾ ವಿಭಾಗಗಳಲ್ಲೂ ಬಲಿಷ್ಠವಾಗಿದೆ. ಹೆಚ್ಚು ವೃತ್ತಿಪರ ಆಟಗಾರರಿದ್ದಾರೆ. ಬ್ಯಾಟಿಂಗ್, ಬೌಲಿಂಗ್ನಲ್ಲಿ ಮಿಂಚುವ ಆಲ್ರೌಂಡರ್ಗಳಿದ್ದಾರೆ. ಹೀಗಾಗಿಯೇ ಅದು ಫೈನಲ್ನಲ್ಲಿದೆ. ಇನ್ನು ಪಾಕಿಸ್ತಾನ ಅದೃಷ್ಟದ ಆಧಾರದ ಮೇಲೆ ಫೈನಲ್ಗೆ ಬಂದರೂ ಉತ್ತಮ ಬೌಲಿಂಗ್ ಪಡೆಯನ್ನು ಹೊಂದಿದೆ. ಬ್ಯಾಟಿಂಗ್ ಪಡೆಯನ್ನು ತಂಡ ಸ್ವಲ್ಪ ಸುಧಾರಿಸಿಕೊಳ್ಳಬೇಕಿದೆ. ತಂಡ ಪ್ರಶಸ್ತಿ ಗೆಲ್ಲಲು ಎಲ್ಲ ವಿಭಾಗಗಳಲ್ಲಿ ಮಿಂಚಬೇಕಿದೆ.
ಪಾಕ್ ನಾಯಕ ಬಾಬರ್ ಆಜಂ ಬಗ್ಗೆ ನಿಮ್ಮ ಮಾತು?: ಬಾಬರ್ ಇನ್ನೂ ಬಹಳಷ್ಟು ವಿಷಯಗಳನ್ನು ಕಲಿಯಬೇಕಾಗಿದೆ. ಅವರ ಕೈಗೆ ಈಗಷ್ಟೇ ಮಹತ್ತರ ಜವಾಬ್ದಾರಿ ಸಿಕ್ಕಿದೆ. ಅದನ್ನು ನಿಭಾಯಿಸಿಕೊಂಡು ಹೋಗಬೇಕಿದೆ. ಕಾಲಾನಂತರದಲ್ಲಿ ಆತ ಉತ್ತಮ ನಾಯಕನಾಗಿ ಹೊರಹೊಮ್ಮಲಿದ್ದಾನೆ.
ಓದಿ: ಕಳಚಿತೇ ಸಾನಿಯಾ ಶೋಯೆಬ್ರ 12 ವರ್ಷಗಳ ಪ್ರೀತಿಯಬಂಧ..ಭಾರತ ಪಾಕ್ ಆಟಗಾರರ ಮಧ್ಯೆ ಪ್ರೀತಿ ಬೆಳೆದಿದ್ದೇಗೆ?
