ಚೆನ್ನೈ: ಎರಡನೇ ಟೆಸ್ಟ್ನ ಮೂರನೇ ದಿನದಾಟದಲ್ಲಿ ಪ್ರಾಬಲ್ಯ ಸಾಧಿಸಿದ ಆಂಗ್ಲರ ಬೌಲಿಂಗ್ನಿಂದಾಗಿ ಸತತ ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಭಾರತಕ್ಕೆ ನಾಯಕ ವಿರಾಟ್ ಕೊಹ್ಲಿ-ಆರ್.ಅಶ್ವಿನ್ ಆಸರೆಯಾಗಿದ್ದಾರೆ. ಈ ಮೂಲಕ 351 ರನ್ಗಳ ಮುನ್ನಡೆ ಸಾಧಿಸಿರುವ ಇಂಡಿಯಾ, ಆಂಗ್ಲರಿಗೆ ಬೃಹತ್ ಗುರಿ ನೀಡುವತ್ತ ಹೆಜ್ಜೆ ಹಾಕಿದೆ.
ಮೊದಲ ಇನ್ನಿಂಗ್ಸ್ನ ಭಾರತ ನೀಡಿದ್ದ 329 ರನ್ ಬೆನ್ನತ್ತಿದ ಆಂಗ್ಲರು ಎರಡನೇ ದಿನದಾಟದಲ್ಲಿ ಎಲ್ಲಾ ವಿಕೆಟ್ ಕಳೆದುಕೊಂಡು 134 ರನ್ ಗಳಿಸಲಷ್ಟೇ ಶಕ್ತರಾದರು. ಹೀಗಾಗಿ, 195 ರನ್ಗಳ ಮುನ್ನಡೆ ಸಾಧಿಸಿದ ಮತ್ತೆ ಕಣಕ್ಕಿಳಿದ ಭಾರತ ಎರಡನೇ ದಿನದಾಟದ ಅಂತ್ಯಕ್ಕೆ 52 ರನ್ ಗಳಿಸಿ 1 ವಿಕೆಟ್ ಕಳೆದುಕೊಂಡಿತ್ತು. ಶುಭಮನ್ ಗಿಲ್ ಔಟಾಗಿದ್ದರು.
ಇಂದು ಮೂರನೇ ದಿನದಾಟದಲ್ಲಿ ಬ್ಯಾಟಿಂಗ್ ಮುಂದುವರೆಸಿದ ಭಾರತಕ್ಕೆ, ಭೋಜನ ವಿರಾಮಕ್ಕೂ ಮೊದಲೇ ಐದು ವಿಕೆಟ್ಗಳನ್ನು ಕಬಳಿಸುವ ಮೂಲಕ ಇಂಗ್ಲೆಂಡ್ ಆಘಾತ ನೀಡಿತು. ಜಾಕ್ ಲೀಚ್ಮೂರು ವಿಕೆಟ್ ಕಿತ್ತಿದರೆ, ಮೊಯಿನ್ ಅಲಿ 2 ವಿಕೆಟ್ ಬಲಿ ಪಡೆದು ಮಿಂಚಿದರು.
ಮೂರನೇ ದಿನಕ್ಕೂ ಬ್ಯಾಟಿಂಗ್ ಕಾಯ್ದುಕೊಂಡಿದ್ದ ಪೂಜಾರ (7) ರನೌಟ್ ಆದರು. ರೋಹಿತ್ ಶರ್ಮಾ (26) ಎರಡನೇ ಇನ್ನಿಂಗ್ಸ್ನಲ್ಲಿ ರನ್ ಪೇರಿಸಲು ತಡಕಾಡಿದರು. ಲೀಚ್ ಬೌಲಿಂಗ್ನಲ್ಲಿ ಅನಗತ್ಯ ಹೊಡೆತಕ್ಕೆ ಮುಂದಾಗಿ ಚೆಂಡನ್ನು ಬೌಂಡರಿಗೆ ಕಳುಹಿಸಲು ಬಂದ ರೋಹಿತ್ ಶರ್ಮಾ ಸ್ಟಂಪ್ ಆದರು.
ಅದಾದ ನಂತರ ರಿಷಭ್ ಪಂತ್ (8) ಕೂಡ ಹೆಚ್ಚುಹೊತ್ತು ಕ್ರೀಸ್ನಲ್ಲಿ ನಿಲ್ಲದೆ ಜಾಕ್ ಲೀಚ್ಗೆ ವಿಕೆಟ್ ಒಪ್ಪಿಸಿದರು. ಹೀಗಾಗಿ, ಆಂಗ್ಲರ ಕಟ್ಟುನಿಟ್ಟಿನ ಬೌಲಿಂಗ್ ಮುಂದೆ ಪಂತ್ ಅಬ್ಬರದ ಬ್ಯಾಟಿಂಗ್ ಮಂಕಾಯಿತು. ನಂತರ ಉಪನಾಯಕ ಅಜಿಂಕ್ಯ ರಹಾನೆ (10) ಕೂಡ ಪಂತ್ ಹಿಂದೆಯೇ ಮೊಯಿನ್ ಬೌಲಿಂಗ್ನಲ್ಲಿ ಒಲಿ ಪೋಪ್ಗೆ ಕ್ಯಾಚಿ ನೀಡಿ ನಿರ್ಗಮಿಸಿದರು. ಹಾಗೆಯೇ ಅಕ್ಷರ್ ಪಟೇಲ್ ಕೂಡ ಬೇಗನೇ ಪೆವಿಲಿಯನ್ ಸೇರಿದರು.
ಇತ್ತ ಸತತ ವಿಕೆಟ್ ಕಳೆದುಕೊಂಡರೂ ಬೌಲರ್ಗಳನ್ನು ಸಮರ್ಥವಾಗಿ ಎದುರಿಸಿದ ನಾಯಕ ವಿರಾಟ್ ಕೊಹ್ಲಿ 38 ರನ್ ಮತ್ತು ಅವರಿಗೆ ಸಾಥ್ ನೀಡಿದ ಅಶ್ವಿನ್ 34 ರನ್ ಗಳಿಸಿ ಕ್ರೀಸ್ನಲ್ಲಿದ್ದಾರೆ.
