ಹೈದರಾಬಾದ್: ಬಾಂಗ್ಲಾದೇಶ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಭಾರತ ಫೀಲ್ಡಿಂಗ್ ವೈಫಲ್ಯದಿಂದ ಮ್ಯಾಚ್ ಕೈಚೆಲ್ಲಿತು. ಶಕೀಬ್ ದಾಳಿಗೆ ಮಂಕಾದ ಭಾರತದ ಬ್ಯಾಟರ್ಗಳು 186ಕ್ಕೆ ಎಲ್ಲಾ ವಿಕೆಟ್ಗಳನ್ನು ಬಿಟ್ಟುಕೊಟ್ಟರು. ಆದರೆ ರನ್ ಚೇಸಿಂಗ್ ಆರಂಭಿಸಿದ ಬಾಂಗ್ಲಾ ಪಡೆಯು ಬೇಗ ವಿಕೆಟ್ ಒಪ್ಪಿಸಿತು. 10 ನೇ ವಿಕೆಟ್ನ 50 ರನ್ನ ಜೊತೆಯಾಟ ಭಾರತಕ್ಕೆ ಗೆಲುವಿಗೆ ಮುಳುವಾಯಿತು. ಕಡಿಮೆ ಮೊತ್ತದ ಪಂದ್ಯದ ಕಳಪೆ ಕ್ಷೇತ್ರ ರಕ್ಷಣೆಯಿಂದ ಭಾರತ ತಂಡ ಟೀಕೆಗೆ ಗುರಿಯಾಗುತ್ತಿದೆ.
ಮೆಹಿದಿ ಹಸನ್ ಮಿರಾಜ್ಗೆ 43 ನೇ ಓವರ್ನಲ್ಲಿ ಸಿಕ್ಕ ಎರಡು ಜೀವದಾನಗಳು ಸಹ ಭಾರತದ ಸೋಲುಗೆ ಕಾರಣವಾಯಿತು. ಶಾರ್ದೂಲ್ ಠಾಕೂರ್ ಎಸೆದ 43.4ನೇ ಬಾಲ್ ಮೆಹಿದಿ ಬ್ಯಾಟ್ಗೆ ಟಾಪ್ ಎಡ್ಜ್ ಆಗಿ ಕೀಪರ್ಗೆ ಸುಲಭ ಕ್ಯಾಚ್ ಆಗುವ ರೀತಿ ಇತ್ತು. ಕೆ ಎಲ್ ರಾಹುಲ್ ಸುಲಭ ಕ್ಯಾಚನ್ನು ಕೈಚೆಲ್ಲಿದರು. ಇದು ಭಾರಿ ಟೀಕೆಗೆ ಗುರಿಯಾಗಿದೆ. ಏಕದಿನ ಪಂದ್ಯಗಳಿಂದ ಪಂತ್ರನ್ನು ಕೈ ಬಿಡಲಾಗಿದ್ದು, ಟೆಸ್ಟ್ ತಂಡಕ್ಕೆ ಸೇರಿಕೊಳ್ಳಲಿದ್ದಾರೆ ಎನ್ನಲಾಗ್ತಿದೆ. ಹೀಗಾಗಿ ರಾಹುಲ್ಗೆ ಕೀಪಿಂಗ್ ಜವಾಬ್ದಾರಿ ನೀಡಲಾಗಿತ್ತು.
ವಾಷಿಂಗ್ಟನ್ ಸುಂದರ್ ಕೈಗೆ ಬರುತ್ತಿದ್ದ ಸರಳ ಕ್ಯಾಚನ್ನು ಹಿಡಿಯುವ ಪ್ರಯತ್ನವೇ ಮಾಡದೇ ಕ್ಯಾಪ್ಟನ್ ಕೆಂಗಣ್ಣಿಗೆ ಗುರಿಯಾದರು. ಥರ್ಡ್ ಮ್ಯಾನ್ ಜಾಗದಲ್ಲಿ ವಾಷಿಂಗ್ಟನ್ ಸುಂದರನ್ನು ನಿಲ್ಲಿಸಲಾಗಿತ್ತು. ಸ್ಲೈಸ್ ಮಾಡಿದ ಶಾಟ್ ಥರ್ಡ್ ಮ್ಯಾನ್ಗೆ ಸುಲಭ ಕ್ಯಾಚ್ ಆಗಿತ್ತು. ಆದರೆ ಸುಂದರ್ ಕ್ಯಾಚ್ ಪ್ರಯತ್ನವನ್ನೂ ಮಾಡದೇ ಇದ್ದುದ್ದಕ್ಕೆ ಕ್ರಿಕೆಟ್ ಅಭಿಮಾನಿಗಳು ಟೀಕಿಸುತ್ತಿದ್ದಾರೆ.
50-50 ಫೀಲ್ಡಿಂಗ್: ಈ ಬಗ್ಗೆ ಟೀಮ್ ಇಂಡಿಯಾದ ಫಿನಿಶರ್ ಎಂದು ಕರೆಸಿಕೊಳ್ಳುತ್ತಿರುವ ಕೀಪರ್ ಕಮ್ ಬ್ಯಾಟರ್ ದಿನೇಶ್ ಕಾರ್ತಿಕ್ ಕೂಡಾ ಮಾತನಾಡಿದ್ದು, ರಾಹುಲ್ ಮತ್ತು ಸುಂದರ್ ಕ್ಯಾಚ್ ಕೈಚೆಲ್ಲದಿದ್ದರೆ ಪಂದ್ಯದ ಗೆಲುವು ಸಾಧ್ಯವಾಗುತ್ತಿತ್ತು. ರಾಹುಲ್ ಮತ್ತು ಸುಂದರ್ಗೆ ಲೈಟ್ನಿಂದ ಸಮಸ್ಯೆ ಆಗಿದೆ ಎಂದು ನನಗೆ ಅನಿಸುತ್ತಿಲ್ಲ. ಅವರು ನೂರು ಪ್ರತಿಶತ ಪ್ರಯತ್ನ ಪಟ್ಟಿಲ್ಲ. ಪಂದ್ಯ ಉತ್ತಮವಾಗಿತ್ತು. ಆದರೆ ಕ್ಷೇತ್ರ ರಕ್ಷಣೆ 50-50 ಇತ್ತು. ಗೆಲ್ಲುವ ಸಾಧ್ಯತೆ ಇದ್ದಾಗ ಕೆಲವು ಸರಳ ಬೌಂಡರಿಗಳನ್ನು ಬಿಟ್ಟುಕೊಟ್ಟಿದ್ದು ಸೋಲಿಗೆ ಕಾರಣವಾಯಿತು ಎಂದಿದ್ದಾರೆ.
ಇದನ್ನೂ ಓದಿ: ಕಳಪೆ ಪ್ರದರ್ಶನ: ಬಾಂಗ್ಲಾ ವಿರುದ್ಧ ಟೀಂ ಇಂಡಿಯಾಗೆ ಹೀನಾಯ ಸೋಲು
