ಟೀಂ ಇಂಡಿಯಾಗೆ ಮತ್ತೊಂದು ಆಘಾತ: ಅಭ್ಯಾಸದ ವೇಳೆ ವಿಜಯ್​ ಶಂಕರ್​ಗೆ ಗಾಯ

ಟೀಂ ಇಂಡಿಯಾ ಆಟಗಾರ ವಿಜಯ್​ ಶಂಕರ್​ ನೆಟ್​ನಲ್ಲಿ ಅಭ್ಯಾಸ ಮಾಡುವ ವೇಳೆ ಗಾಯಕ್ಕೆ ತುತ್ತಾಗಿದ್ದಾರೆ.

ಇಂಗ್ಲೆಂಡ್: ಟೀಂ ಇಂಡಿಯಾ ಆರಂಭಿಕ ಆಟಗಾರ ಶಿಖರ್​ ಧವನ್​ ಗಾಯದ ಸಮಸ್ಯೆಯಿಂದ ವಿಶ್ವಕಪ್​ ಟೂರ್ನಿಯಿಂದಲೇ ಹೊರಬಿದ್ದ ಬೆನ್ನಲ್ಲೆ, ಮತ್ತೊಂದು ಆಘಾತ ಎದುರಾಗಿದೆ.

ನಾಲ್ಕನೇ ಕ್ರಮಾಂಕಕ್ಕೆ ಆಯ್ಕೆಯಾಗಿದ್ದ ಆಲ್​ ರೌಂಡ್​ ಆಟಗಾರ ವಿಜಯ್​ ಶಂಕರ್​ ಇದೀಗ ಗಾಯಕ್ಕೆ ತುತ್ತಾಗಿದ್ದಾರೆ. ಅಫ್ಘಾನಿಸ್ತಾನ ವಿರುದ್ಧದ ಪಂದ್ಯಕ್ಕಾಗಿ ಭಾರತ ತಂಡದ ಆಟಗಾರರು ನೆಟ್​ನಲ್ಲಿ ಅಭ್ಯಾಸ ಮಾಡುತ್ತಿದ್ದರು. ಈ ವೇಳೆ ಬುಮ್ರಾ ಎಸೆದ ಯಾರ್ಕರ್​ ವಿಜಯ್​ ಶಂಕರ್​ ಕಾಲಿಗೆ ಬಡಿದಿದೆ.

ಕೂಡಲೆ ವಿಜಯ್​ ಶಂಕರ್​ಗೆ ಚಿಕಿತ್ಸೆ ನೀಡಲಾಗಿದ್ದು ಗಂಭೀರ ಸ್ವರೂಪದ ಗಾಯವೇನು ಆಗಿಲ್ಲ ಎಂದು ವೈದ್ಯರು ತಿಳಿಸಿದ್ದಾರೆ. ಸ್ವಲ್ಪ ನೋವಿದೆ ಅಷ್ಟೆ, ಭಯ ಪಡುವ ಅಗತ್ಯವಿಲ್ಲ ಎಂದಿದ್ದಾರೆ ಎಂದು ಟೀಂ ಇಂಡಿಯಾ ಮೂಲಗಳು ತಿಳಿಸಿವೆ.

ಈಗಾಗಲೆ ಶಿಖರ್​ ಧವನ್​ ಟೂರ್ನಿಯಿಂದ ಔಟ್​ ಆಗಿದ್ದು, ಪಾಕ್​ ವಿರುದ್ಧದ ಪಂದ್ಯದಲ್ಲಿ ಎಡಗಾಲಿನ ಹ್ಯಾಮ್​ಸ್ಟ್ರಿಂಗ್​ಗೆ ತುತ್ತಾಗಿದ್ದ ಸ್ವಿಂಗ್​ ಸ್ಟಾರ್​​ ಭುವನೇಶ್ವರ್​ ಕುಮಾರ್ ಕೂಡ ಯಾವಾಗ ತಂಡಕ್ಕೆ ಮರಳುತ್ತಾರೆ ಎಂದು ಬಿಸಿಸಿಐ ಇನ್ನೂ ಸ್ಪಷ್ಟಪಡಿಸಿಲ್ಲ.

ಪಾಕ್​ ವಿರುದ್ಧ ಅದ್ಭುತ ಪ್ರದರ್ಶನ ನೀಡಿದ್ದ ವಿಜಯ್ ಶಂಕರ್​ ಎರಡು ವಿಕೆಟ್​ ಪಡೆದು ಮಿಂಚಿದ್ರು. ಇದೀಗ ಅವರ ಗಾಯದ ಸಮಸ್ಯೆ ಅಭಿಮಾನಿಗಳಲ್ಲಿ ಆತಂಕವನ್ನುಂಟು ಮಾಡಿದೆ.