ಮತ್ತೊಬ್ಬ ಸುನಿಲ್​ ಗವಾಸ್ಕರ್​, ಸಚಿನ್​ ಸೃಷ್ಟಿಸುವುದು ಅಸಾಧ್ಯ: ಜಾವೇದ್​​​ ಮಿಯಾಂದಾದ್​

ಪ್ರಸ್ತುತ ಕ್ರಿಕೆಟರ್ಸ್​ಗಳನ್ನು ತಮ್ಮ ಜನರೇಸನ್​ ಕ್ರಿಕೆಟಿಗರ ಜೊತೆ ಹೋಲಿಕೆ ಮಾಡುವುದು ಸರಿಯಾದ ಕ್ರಮವಲ್ಲ ಎಂದು ಮಿಯಾಂದಾದ್​ ತಿಳಿಸಿದ್ದಾರೆ.

ನವದೆಹಲಿ: ಭಾರತದ ಲೆಜೆಂಡರಿ ಕ್ರಿಕೆಟಿಗರಾದ ಸುನಿಲ್​ ಗವಾಸ್ಕರ್​ ಮತ್ತು ಸಚಿನ್​ ತೆಂಡೂಲ್ಕರ್ ಅವರಂತಹ ಶ್ರೇಷ್ಠ ಆಟಗಾರರನ್ನು ಮತ್ತೆ ಸೃಷ್ಟಿಸುವುದು ಕಷ್ಟ ಎಂದು ಪಾಕಿಸ್ತಾನ ಲೆಜೆಂಡ್​ ಜಾವೇದ್​​​ ಮಿಯಾಂದಾದ್​ ಅಭಿಪ್ರಾಯ ಪಟ್ಟಿದ್ದಾರೆ.

1987ರಲ್ಲಿ ಭಾರತ ತಂಡದ ಅವಿಭಾಜ್ಯ ಅಂಗದಂತಿದ್ದ ಸುನಿಲ್​ ಗವಾಸ್ಕರ್​ ಕ್ರಿಕೆಟ್‌ ವೃತ್ತಿ ಜೀವನಕ್ಕೆ ವಿದಾಯ ಹೇಳಿದ್ದರು. ಈ ಸಂದರ್ಭದಲ್ಲಿ ಭಾರತೀಯ ಅಭಿಮಾನಿಗಳು ಒಬ್ಬ ಅದ್ಭುತ ಆಟಗಾರನನ್ನು ಕಳೆದುಕೊಳ್ಳುತ್ತಿದ್ದೇವೆಂದು ದುಃಖಿತರಾಗಿದ್ದರು. ಅಲ್ಲದೇ ಸಚಿನ್​ ತೆಂಡೂಲ್ಕರ್​ ಬರುವವರೆಗೂ ಶ್ರೇಷ್ಠ ಬ್ಯಾಟ್ಸ್​ಮನ್​ ಕೊರತೆ ಕಾಡುತ್ತಿತ್ತು.

1989ರಲ್ಲಿ ಸಚಿನ್ ಕ್ರಿಕೆಟ್​ಗೆ ಪದಾರ್ಪಣ ಮಾಡಿದ ಬಳಿಕ ನಿಧಾನವಾಗಿ ಕ್ರಿಕೆಟ್​ನಲ್ಲಿ ಆಧಿಪತ್ಯ ಸಾಧಿಸಿ 2 ದಶಕಗಳ ಕಾಲ ಕ್ರಿಕೆಟ್​ ಜಗತ್ತನ್ನು ಆಳಿದರು. ಇವರನ್ನು ಆರಂಭದಲ್ಲಿ ಗವಾಸ್ಕರ್​ಗೆ ಹೋಲಿಸಲಾಗುತ್ತಿತ್ತು. ಇವರ ನಂತರ ಪ್ರಸ್ತುತ ಭಾರತ ತಂಡದ ನಾಯಕ ವಿರಾಟ್​ ಕೊಹ್ಲಿ ಕೂಡ ಸಚಿನ್​ರ ಹಾದಿಯನ್ನು ಹಿಡಿದಿದ್ದು, ಕ್ರಿಕೆಟ್ ದಿಗ್ಗಜರೆಲ್ಲರೂ ಸಚಿನ್​ಗೆ ಹೋಲಿಕೆ ಮಾಡುತ್ತಿದ್ದಾರೆ.

ಆದರೆ, ಪ್ರಸ್ತುತ ಕ್ರಿಕೆಟರ್ಸ್​ಗಳನ್ನು ತಮ್ಮ ಜನರೇಸನ್​ ಕ್ರಿಕೆಟಿಗರ ಜೊತೆ ಹೋಲಿಕೆ ಮಾಡುವುದು ಸರಿಯಾದ ಕ್ರಮವಲ್ಲ ಎಂದು ಮಿಯಾಂದಾದ್​ ತಿಳಿಸಿದ್ದಾರೆ.

ಇತ್ತೀಚೆಗೆ ಪಾಕಿಸ್ತಾನದ ಮಾಜಿ ಬ್ಯಾಟ್ಸ್​,ಮನ್​ ಅಮಿರ್​ ಸೊಹೈಲ್​ ವಿರಾಟ್​ ಕೊಹ್ಲಿ ಮತ್ತು ಮಿಯಾಂದಾದ್​​ ಹೇಗೆ ತಂಡಕ್ಕಾಗಿ ಪ್ರದರ್ಶನ ನೀಡುತ್ತಾರೆ ಎಂದು ಇಬ್ಬರನ್ನು ಹೋಲಿಕೆ ಮಾಡಿ ಮಾತನಾಡಿದ್ದರು. ಇದಕ್ಕೆ ಸಂದರ್ಶನವೊಂದರಲ್ಲಿ ಪ್ರತಿಕ್ರಿಯಿಸಿರುವ ಮಿಯಂದಾದ್​, ಆಧುನಿಕ ಕ್ರಿಕೆಟಿಗರನ್ನು ತಮ್ಮ ಕಾಲದ ಕ್ರಿಕಟಿಗರ ಜೊತೆ ಹೋಲಿಕೆ ಮಾಡುವುದು ಕಷ್ಟ. ನಮ್ಮ ಕಾಲದಲ್ಲಿ ರನ್​ಗಳಿಸುವುದು ಸುಲಭದ ಮಾತಾಗಿರಲಿಲ್ಲ ಎಂದು ಹೇಳಿದ್ದಾರೆ.

ಹಾಗೆಯೇ ಮಿಯಾಂದಾದ್​ ಪ್ರಕಾರ ಮತ್ತೊಬ್ಬ ಸುನಿಲ್ ಗವಾಸ್ಕರ್​, ಸಚಿನ್​ ತೆಂಡೂಲ್ಕರ್​ ಕಾಣುವುದು ಅಸಾಧ್ಯ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ನಮ್ಮ ಕಾಲದ ಯಾವ ಒಬ್ಬ ಆಟಗಾರನನ್ನು ಈಗಿನ ಪೀಳಿಗೆಯ ಆಟಗಾರರೊಂದಿಗೆ ಹೋಲಿಸಬಹುದು ಎಂದು ನಾನು ಭಾವಿಸುವುದಿಲ್ಲ. ನೀವು ಇನ್ನೊಬ್ಬ ಸುನಿಲ್​ ಗವಾಸ್ಕರ್​ ಅಥವಾ ಸಚಿನ್ ತೆಂಡೂಲ್ಕರ್​ ತಯಾರು ಮಾಡಲು ಸಾಧ್ಯವಿಲ್ಲ. ನೀವು ಯಾರನ್ನಾದೂ ಆರಾಧಿಸಬಹುದು. ಆದರೆ ನೀವು ವೈಯಕ್ತಿಕ ಗುಣ ಮತ್ತು ವರ್ಗವನ್ನು ಬದಲಾಯಿಸುವುದಿಲ್ಲ. ವಿವಿಧ ತಲೆಮಾರಿನ ಆಟಗಾರರನ್ನು ಹೋಲಿಸಲಾಗುವುದಿಲ್ಲ ಎಂದು ತಮ್ಮ ಮತ್ತು ವಿರಾಟ್​ ಕೊಹ್ಲಿ ನಡುವಿನ ಹೋಲಿಕೆಯನ್ನು ಮಿಯಾಂದಾದ್​ ತಿರಸ್ಕರಿಸಿದ್ದಾರೆ.

ನಮ್ಮ ಕಾಲಘಟ್ಟದಲ್ಲಿ ಮಾಲ್ಕಮ್​ ಮಾರ್ಷಲ್, ರಿಚರ್ಡ್​ ಹ್ಯಾಡ್ಲಿ, ಡೇನಿಸ್​ ಲಿಲ್ಲಿ ಮತ್ತು ಜೆಫ್​ ಥಾಮ್ಸನ್​ ಅವರಂತಹ ಕಠಿಣ ಬೌಲರ್​ಗಳನ್ನು ಎದುರಿಸುತ್ತಿದ್ದೆವು. ಆಗಿನ ಬೌಲರ್​ಗಳಿಗೂ ಈಗಿನ ಬೌಲರ್​ಗಳಿಗೂ ಬ್ಯಾಟಿಂಗ್​ ನಡೆಸುವುದಕ್ಕೆ ತುಂಬಾ ವ್ಯತ್ಯಾಸವಿದೆ ಎಂದಿದ್ದಾರೆ.

ಮಿಯಾಂದಾದ್​ ಪಾಕಿಸ್ತಾನದ ಪರ 124 ಟೆಸ್ಟ್​ ಹಾಗೂ 233 ಏಕದಿನ ಪಂದ್ಯಗಳನ್ನಾಡಿದ್ದಾರೆ. ಟೆಸ್ಟ್​ ಕ್ರಿಕೆಟ್​​ನಲ್ಲಿ 8,832 ರನ್, ಏಕದಿನ ಕ್ರಿಕೆಟ್​ನಲ್ಲಿ 7381 ರನ್​ಗಳಿಸಿದ್ದಾರೆ.