ಸಿಡ್ನಿ: ಚೊಚ್ಚಲ ಟಿ20 ವಿಶ್ವಕಪ್ ಕನಸಿನಲ್ಲಿರುವ ಭಾರತದ ಮಹಿಳಾ ತಂಡ ಗುರುವಾರ ನಡೆಯಲಿರುವ ಸೆಮಿಫೈನಲ್ ಪಂದ್ಯದಲ್ಲಿ ಬಲಿಷ್ಠ ಇಂಗ್ಲೆಂಡ್ ತಂಡವನ್ನು ಎದುರಿಸಲಿದೆ.
ಭಾರತ ತಂಡ ಈಗಾಗಲೆ ಲೀಗ್ ಪಂದ್ಯಗಳಲ್ಲಿ ಆಸ್ಟ್ರೇಲಿಯಾ ವಿರುದ್ಧ 17, ಬಾಂಗ್ಲಾದೇಶದ ವಿರುದ್ಧ 18, ನ್ಯೂಜಿಲ್ಯಾಂಡ್ ವಿರುದ್ಧ 3 ರನ್ ಹಾಗೂ ಶ್ರೀಲಂಕಾ ವಿರುದ್ಧ 7 ವಿಕೆಟ್ಗಳ ಜಯ ಸಾಧಿಸಿ ಸೆಮಿಫೈನಲ್ ಪ್ರವೇಶಿಸಿದೆ.
ಇತ್ತ ಇಂಗ್ಲೆಂಡ್ ತನ್ನ ಮೊದಲ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 6 ವಿಕೆಟ್ಗಳ ಸೋಲನುಭವಿಸಿದ ನಂತರ ಸತತ ಮೂರು ಪಂದ್ಯಗಳಲ್ಲಿ ಥಾಯ್ಲೆಂಡ್ ವಿರುದ್ಧ 98 ರನ್, ಪಾಕಿಸ್ತಾನ ವಿರುದ್ಧ 42 ರನ್ ಹಾಗೂ ವಿಂಡೀಸ್ ವಿರುದ್ಧ 46 ರನ್ಗಳ ಜಯ ಸಾಧಿಸಿ ಬಿ ಗುಂಪಿನಲ್ಲಿ 2ನೇ ಸ್ಥಾನ ಪಡೆದು ಸೆಮಿಫೈನಲ್ ಪ್ರವೇಶಿಸಿದೆ.
ಆಸ್ಟ್ರೇಲಿಯಾ ಹೊರೆತು ಪಡಿಸಿದರೆ ವಿಶ್ವದ ಅತ್ಯುತ್ತಮ ತಂಡವಾಗಿರುವ ಇಂಗ್ಲೆಂಡ್ ಮೊದಲ ಆವೃತ್ತಿಯಲ್ಲಿ ವಿಶ್ವಚಾಂಪಿಯನ್ ಆಗಿತ್ತು. ಇಂಗ್ಲೆಂಡ್ ಭಾರತ ತಂಡದ ವಿರುದ್ಧ ಟಿ20ಯಲ್ಲಿ 16-4 ರ ಗೆಲುವಿನ ಅಂತರ ಹೊಂದಿದೆ, ಮೇಲುನೋಟಕ್ಕೆ ಭಾರತಕ್ಕಿಂತ ಬಲಿಷ್ಠವಾಗಿದೆ. ಕಳೆದ ಟಿ20 ವಿಶ್ವಕಪ್ನಲ್ಲೂ ಭಾರತದ ವಿರುದ್ಧ 8 ವಿಕೆಟ್ಗಳ ಜಯ ಸಾಧಿಸಿ ಫೈನಲ್ ಪ್ರವೇಶಿಸಿತ್ತು.
ಆದರೆ ಭಾರತ ಕಳೆದ ವಿಶ್ವಕಪ್ ಬಳಿಕ ತಂಡದಲ್ಲಿ ಹಲವು ಬದಲಾವಣೆ ಮಾಡಿಕೊಂಡಿದ್ದು, ವಿಶ್ವದ ಬಲಿಷ್ಠ ತಂಡಗಳಲ್ಲಿ ಒಂದಾಗಿ ಮಾರ್ಪಟ್ಟಿದೆ. ಇತ್ತೀಚೆಗೆ ಆಸ್ಟ್ರೇಲಿಯಾದಲ್ಲೆ ನಡೆದ ಟಿ20 ತ್ರಿಕೋನ ಸರಣಿಯಲ್ಲಿ ಇಂಗ್ಲೆಂಡ್ ತಂಡವನ್ನು ಹಿಂದಿಕ್ಕಿ ಫೈನಲ್ ಪ್ರವೇಶಿಸಿತ್ತು.
ಭಾರತಕ್ಕೆ ಶೆಫಾಲಿ ವರ್ಮಾ ಪ್ರಮುಖ ಅಸ್ತ್ರವಾಗಿದ್ದಾರೆ. ಕಳೆದ ನಾಲ್ಕು ಪಂದ್ಯಗಳಿಂದ 161 ರನ್ಗಳಿಸಿ ಅತ್ಯುತ್ತಮ ಫಾರ್ಮ್ನಲ್ಲಿದ್ದಾರೆ. ಅಲ್ಲದೆ ಟಿ20 ಕ್ರಿಕೆಟ್ನಲ್ಲಿ ನಂಬರ್ ಒನ್ ಬ್ಯಾಟ್ಸ್ವುಮನ್ ಆಗಿದ್ದಾರೆ. ಇವರ ಜೊತೆಗೆ ಮಂದಾನ, ಕೌರ್, ದೀಪ್ತಿ ಶರ್ಮಾ, ವೇದ ಕೃಷ್ಣಮೂರ್ತಿಯಂತಹ ಬ್ಯಾಟರ್ಗಳಿದ್ದು, ಇಂಗ್ಲೆಂಡ್ಗೆ ಸವಾಲೆಸೆಯಲು ಸಿದ್ದರಾಗಿದ್ದಾರೆ.
ಇನ್ನು ವೇಗಿ ಶೀಖಾ ಪಾಂಡೆ ಜೊತೆಗೆ ಗರಿಷ್ಟ ವಿಕೆಟ್ ಪಡೆದಿರುವ ಟೂರ್ನಿಯಲ್ಲಿ ಪೂನಮ್ ಯಾದವ್ ಜೊತೆಗೆ ರಾಧ ಯಾದವ್ ಕೂಡ ಉತ್ತಮ ಫಾರ್ಮ್ನಲ್ಲಿ ಭಾರತ ತಂಡಕ್ಕೆ ಪ್ಲಸ್ ಪಾಯಿಂಟ್ ಆಗಿದೆ.
