ಸಿಡ್ನಿ: ಗುರುವಾರ ಭಾರತದ ವಿರುದ್ಧ ಟೆಸ್ಟ್ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ ಆಸ್ಟ್ರೇಲಿಯಾದ ಯುವ ಬ್ಯಾಟ್ಸ್ಮನ್ ವಿಲ್ ಪುಕೋವ್ಸ್ಕಿ, ಮೊದಲ ದಿನ ತಾವು ಎದುರಿಸಿದ ಬೌಲರ್ಗಳಲ್ಲಿ ರವಿಚಂದ್ರನ್ ಅಶ್ವಿನ್ ಅತ್ಯಂತ ವಿಶಿಷ್ಠ ಬೌಲರ್ ಆಗಿದ್ದರು ಎಂದು ತಿಳಿಸಿದ್ದಾರೆ.
22 ವರ್ಷದ ಆಟಗಾರ ಇಂದು ಆರಂಭಿಕನಾಗಿ ಕಣಕ್ಕಿಳಿದಿದ್ದರು. ತಮ್ಮ ಜೊತೆಗಾರ ಡೇವಿಡ್ ವಾರ್ನರ್ ಕೇವಲ 5 ರನ್ಗಳಿಗೆ ವಿಕೆಟ್ ಒಪ್ಪಿಸಿದರೂ ಎದೆಗುಂದದೆ ಭಾರತೀಯ ಬ್ಯಾಟ್ಸ್ಮನ್ಗಳ ದಾಳಿಯನ್ನು ಕೆಚ್ಚೆದೆಯಿಂದ ಎದುರಿಸಿದ್ದಾರೆ. ಮೊದಲ ದಿನದಾಟದಲ್ಲಿ 62 ರನ್ಗಳಿಸಿ ಮೊದಲ ಪಂದ್ಯವನ್ನೇ ಸ್ಮರಣೀಯ ಮಾಡಿಕೊಂಡರು.
ಪ್ರಾಮಾಣಿಕವಾಗಿ ಹೇಳಬೇಕೆಂದರೆ ಈ ದಿನ ಸಂಪೂರ್ಣ ನಂಬಲಾಗದ ಅನುಭವವಾಗಿದೆ. ರಾಷ್ಟ್ರೀಯ ತಂಡಕ್ಕೆ ಪದಾರ್ಪಣೆ ಮಾಡಿದ್ದರಿಂದ ನಾನು ಮೈದಾನದ ಹೊರಗೆ ಮತ್ತು ಒಳಗೆ ಬಹಳ ಕಠಿಣ ಸವಾಲುಗಳನ್ನು ಎದುರಿಸುತ್ತಿದ್ದೇನೆ ಎಂದು ಪಂದ್ಯದ ನಂತರ ನಡೆದ ವರ್ಚುವಲ್ ಮಾಧ್ಯಮಗೋಷ್ಠಿಯಲ್ಲಿ ಅನುಭವ ಹಂಚಿಕೊಂಡಿದ್ದಾರೆ.
"ಅವರೆಲ್ಲರೂ(ಭಾರತೀಯ ಬೌಲರ್ಗಳು) ಅತ್ಯುತ್ತಮ ಬೌಲರ್ಗಳು. ಮೊದಲ ಪಂದ್ಯವನ್ನಾಡಿದ ನನಗೆ ಅಶ್ವಿನ್ ಬೌಲಿಂಗ್ ಅತ್ಯಂತ ವಿಶಿಷ್ಟವಾಗಿ ಕಂಡುಬಂತು. ಬುಮ್ರಾ ಅವರದ್ದೂ ವಿಶಿಷ್ಠ ಆ್ಯಕ್ಷನ್ ಆಗಿದೆ. ಆದರೆ ಅಶ್ವಿನ್ ವಿಭಿನ್ನ ಶೈಲಿಯನ್ನು ಹೊರತುಪಡಿಸಿಯೂ ನನಗೆ ವಿಶಿಷ್ಟವೆನಿಸಿದರು. ಏಕೆಂದರೆ ಅವರು ಶಾರ್ಟ್ ಬೌಲ್ ಮಾಡುವಾಗಲೂ ಕೂಡ ವಿಭಿನ್ನ ಮಾರ್ಪಾಡುಗಳೊಂದಿಗೆ ಎಸೆಯುತ್ತಿದ್ದರು" ಎಂದು ಪುಕೋವ್ಸ್ಕಿ ಭಾರತೀಯ ಬೌಲರ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಇದನ್ನು ಓದಿ: ರಾಷ್ಟ್ರಗೀತೆ ಹಾಡುವ ವೇಳೆ ಭಾವುಕರಾಗಿದ್ದಕ್ಕೆ ಕಾರಣ ತಿಳಿಸಿದ ಸಿರಾಜ್
