ಮುಂಬೈ: ಕ್ರಿಕೆಟ್ ಜಗತ್ತು ಕಂಡ ಶ್ರೇಷ್ಠ ಆಟಗಾರರ ಸಾಲಿನಲ್ಲಿ ನಿಲ್ಲುವ ವೆಸ್ಟ್ ಇಂಡೀಸ್ ತಂಡದ ಮಾಜಿ ನಾಯಕ ಬ್ರಿಯಾನ್ ಲಾರಾ ವಿರಾಟ್ ಕೊಹ್ಲಿಯನ್ನು ಫುಟ್ಬಾಲ್ ದಿಗ್ಗಜ ಕ್ರಿಶ್ಚಿಯಾನೋ ರೋನಾಲ್ಡೊಗೆ ಹೋಲಿಕೆ ಮಾಡಿದ್ದಾರೆ.
ತಮ್ಮ 400 ರನ್ಗಳ ದಾಖಲೆಯನ್ನು ಯಾರು ಮುರಿಯಬಹುದು ಎಂಬ ಮಾತಿಗೆ ಪ್ರತಿಕ್ರಿಯಿಸುತ್ತಾ, ರಾಹುಲ್, ಕೊಹ್ಲಿ ಅಥವಾ ರೋಹಿತ್ರಿಂದ ಸಾಧ್ಯವಾಗಬಹುದು. ಆದ್ರೆ ಆಟದ ಬದ್ಧತೆಯಲ್ಲಿ ವಿರಾಟ್ ಕೊಹ್ಲಿ ಉತ್ತಮರಾಗಿದ್ದಾರೆ. ಅವರು ಕೆ ಎಲ್ ರಾಹುಲ್ ಹಾಗೂ ರೋಹಿತ್ ಶರ್ಮಾಗಿಂತ ಅತ್ಯುತ್ತಮ ಎಂದೂ ಹೇಳುತ್ತಿಲ್ಲ. ಆಟದ ಬದ್ಧತೆಯಲ್ಲಿ ನೋಡುವುದಾದರೆ ಫುಟ್ಬಾಲ್ ಲೆಜೆಂಡ್ ಕ್ರಿಶ್ಚಿಯಾನೊ ರೋನಾಲ್ಡೊ ಅವರಿಗೆ ಸರಿಸಮನಾಗಿ ವಿರಾಟ್ ಕೊಹ್ಲಿ ನಿಲ್ಲುತ್ತಾರೆ ಎಂದು ಲಾರಾ ತಿಳಿಸಿದ್ದಾರೆ.
ವಿರಾಟ್ ಕೊಹ್ಲಿ ಫಿಟ್ನೆಸ್, ಅವರ ಮಾನಸಿಕ ಸದೃಢತೆ ನಂಬಲಸಾಧ್ಯವಾದದ್ದು. ಅವರ ಬ್ಯಾಟಿಂಗ್ ಸ್ಕಿಲ್ ಅತ್ಯದ್ಭುತ. ನೀವೂ ಕ್ರಿಕೆಟ್ನ ಯಾವುದೇ ಯುಗದಲ್ಲಾದರೂ ಕೊಹ್ಲಿಯನ್ನು ಕಡೆಗಣಿಸಲಾಗುವುದಿಲ್ಲ. ಎಲ್ಲಾ ಮಾದರಿಯ ಕ್ರಿಕೆಟ್ನಲ್ಲೂ 50ರ ಸರಾಸರಿ ಹೊಂದಿದ್ದಾನೆಂದರೆ ಅವನಲ್ಲಿ ಏನೋ ವಿಶೇಷ ಶಕ್ತಿ ಇದೆ ಎಂದರ್ಥ ಎಂದು ಮುಕ್ತಕಂಠದಿಂದ ಭಾರತ ತಂಡದ ನಾಯಕನನ್ನು ಶ್ಲಾಘಿಸಿದ್ದಾರೆ.
ಲಾರಾ ಹೇಳಿದಂತೆಯೇ ಕೊಹ್ಲಿ ಕೂಡ ರೋನಾಲ್ಡೊ ಫಾಲೋವರ್, ಅವರಂತೆಯೇ ಸ್ವಂತ ಟೆಕ್ನಿಕ್ ಕಂಡುಕೊಂಡಿದ್ದಾರೆ. ಅವರಂತೆಯೇ ಫಿಟ್ನೆಸ್ ಬಗ್ಗೆ ಕಾಳಜಿ ವಹಿಸುತ್ತಾರೆ. ಹಾಗಾಗಿ ಬ್ರಿಯಾನ್ ಲಾರಾ ಹೇಳಿದಂತೆ ಕೊಹ್ಲಿ ನಿಜಕ್ಕೂ ಕ್ರಿಕೆಟ್ನ ರೋನಾಲ್ಡೊ ಎಂದರೆ ತಪ್ಪಾಗಲಾರದು.
