ಮುಂಬೈ: ಲಾರ್ಡ್ಸ್ ಅಂಗಳದಲ್ಲಿ ತಮ್ಮ ಪದಾರ್ಪಣೆ ಪಂದ್ಯದಲ್ಲೇ ಇಂಗ್ಲೆಂಡ್ ತಂಡಕ್ಕೆ ತಮ್ಮ ತೋಳ್ಬಲ ಪ್ರದರ್ಶನ ತೋರಿಸಿದ್ದ ಗಂಗೂಲಿ ಹಾಗೂ ದ್ರಾವಿಡ್ ಕ್ರಿಕೆಟ್ ಜಗತ್ತಿಗೆ ಕಾಲಿಟ್ಟು ಇಂದಿಗೆ 23 ವರ್ಷಗಳು ಕಳೆದಿವೆ.
ಭಾರತ ಕ್ರಿಕೆಟ್ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಈ ಇಬ್ಬರು 15ಕ್ಕೂ ಹೆಚ್ಚು ವರ್ಷಗಳ ಕಾಲ ಭಾರತ ತಂಡದಲ್ಲಿ ಜೊತೆಯಾಗಿ ಆಡಿ ಹಲವು ಪ್ರತಿಭೆಗಳನ್ನು ಹುಟ್ಟು ಹಾಕಿದ್ದಲ್ಲದೇ, ಇಂದು ವಿಶ್ವದಲ್ಲಿ ಭಾರತ ತಂಡ ಬಲಿಷ್ಠವಾಗಿ ಬೆಳೆಯಲು ಕಾರಣವಾಗಿದ್ದಾರೆ.
ಜೂನ್ 20 1996 ರಂದು ಇಬ್ಬರು ಜೊತೆಯಾಗಿಯೇ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಕಾಲಿಟ್ಟರು. ಮೊದಲ ಪಂದ್ಯದಲ್ಲಿಯೇ ಕ್ರಿಕೆಟ್ ಜನಕರನ್ನು ಕಾಡಿದ್ದ ಗಂಗೂಲಿ 131 ರನ್ಗಳಿಸಿದರೆ, ದ್ರಾವಿಡ್ 95 ರನ್ಗಳಿಸಿದ್ದರು.
ಭಾರತ ಕ್ರಿಕೆಟ್ ತಂಡದ ಅತ್ಯುತ್ತಮ ನಾಯಕರೆಂದು ಹೆಸರು ಮಾಡಿರುವ ಸೌರವ್ ಗಂಗೂಲಿ, 1999ರಲ್ಲಿ ತಂಡ ಫಿಕ್ಸಿಂಗ್ ಅಪಖ್ಯಾತಿಗೆ ಒಳಗಾಗಿದ್ದ ಸಂದರ್ಭದಲ್ಲಿ ಭಾರತ ತಂಡದ ಜವಾಬ್ದಾರಿ ವಹಿಸಿಕೊಂಡಿದ್ದರು. ಅಷ್ಟೇ ಅಲ್ಲ ಬಲಿಷ್ಠ ತಂಡ ಕಟ್ಟಿದ ಹಿರಿಮೆ ಹೊಂದಿದ್ದಾರೆ. ಭಾರತ ತಂಡಕ್ಕೆ ಧೋನಿ,ಯುವರಾಜ್, ಜಹೀರ್ ಖಾನ್, ಹರ್ಭಜನ್ ಸಿಂಗ್ರಂತಹ ಹಲವಾರು ಪ್ರತಿಭೆಗಳಿಗೆ ಸೂಕ್ತ ಅವಕಾಶ ಕಲ್ಪಿಸಿ ಭಾರತ ತಂಡವನ್ನು ಎಲ್ಲ ಮಾದರಿಯಲ್ಲೂ ಬಲಿಷ್ಠಗೊಳಿಸಿದ್ದರು.
ಇನ್ನು ಜಂಟಲ್ ಮ್ಯಾನ್ ಖ್ಯಾತಿಯ ದ್ರಾವಿಡ್ ಗಂಗೂಲಿ ಬೆನ್ನಿಗೆ ನಿಂತು ತಂಡದ ಉಪನಾಯಕನ ಜವಾಬ್ದಾರಿ ನಿರ್ವಹಿಸಿದ್ದರು. ಭಾರತ ತಂಡದ ಪರ 16 ಕ್ಕೂ ಹೆಚ್ಚು ವರ್ಷಗಳ ಕಾಲ ಕ್ರಿಕೆಟ್ ಆಡಿರುವ ದ್ರಾವಿಡ್, ದಿ ವಾಲ್ ಎಂದು ಹೆಸರು ಪಡೆದಿದ್ದಾರೆ. ಇವರು ಟೆಸ್ಟ್ ಕ್ರಿಕೆಟ್ನಲ್ಲಿ ಭಾರತ ಕಂಡ ಶ್ರೇಷ್ಠ ಆಟಗಾರರಲ್ಲಿ ಒಬ್ಬರಾಗಿದ್ದಾರೆ. ಇನ್ನು ದಿ ವಾಲ್ ಖ್ಯಾತಿಯ ದ್ರಾವಿಡ್ ಪ್ರಸ್ತುತ ಅಂಡರ್ 19 ವಿಭಾಗದ ಕೋಚ್ ಆಗಿದ್ದು, ಭವಿಷ್ಯದ ಭಾರತ ತಂಡಕ್ಕೆ ಯುವ ಪೀಳಿಗೆಯನ್ನು ಸಜ್ಜುಗೊಳಿಸುತ್ತಿದ್ದಾರೆ.
ಒಟ್ಟಿನಲ್ಲಿ ದ್ರಾವಿಡ್ - ಗಂಗೂಲಿ ತಮ್ಮ ವೃತ್ತಿ ಬದುಕು ಮುಗಿಸಿದ್ದಾರೆ. ಆದರೆ ಅವರು ಹಾದು ಹೋದ ಹಾದಿ ಮಾತ್ರ ಇನ್ನು ಅಳಿಸಿಹೋಗದೆ ಹಾಗೆ ಉಳಿದಿದೆ.
