ಹೈದರಾಬಾದ್: ಕಾಶ್ಮೀರ ಸಮಸ್ಯೆ ದಿನದಿಂದ ದಿನಕ್ಕೆ ಉಲ್ಬಣಿಸುತ್ತಿದ್ದು, ಇದೇ ಬಿಸಿ ಇದೀಗ ದೂರದ ವಿಂಡೀಸ್ ಪ್ರವಾಸದಲ್ಲಿರುವ ಟೀಂ ಇಂಡಿಯಾ ಆಟಗಾರರಿಗೂ ತಟ್ಟಿದೆ.
ಪಾಕಿಸ್ತಾನ ಕ್ರಿಕೆಟ್ ಬೋರ್ಡ್(ಪಿಸಿಬಿ)ಗೆ ಅನಾಮಧೇಯ ವ್ಯಕ್ತಿಯೋರ್ವ ವಿರಾಟ್ ಕೊಹ್ಲಿ ಬಳಗದ ಮೇಲೆ ಉಗ್ರ ದಾಳಿ ಸಾಧ್ಯತೆ ಇದೆ ಎಂದು ಮೇಲ್ ಮಾಡಿದ್ದ. ಪಿಸಿಬಿ ಈ ಮಾಹಿತಿಯನ್ನು ಐಸಿಸಿ ಮೂಲಕ ಬಿಸಿಸಿಐಗೆ ರವಾನಿಸಿತ್ತು.
ಮೇಲ್ ಸತ್ಯಾಸತ್ಯತೆ ಪರಿಶೀಲಿಸಿದ ಬಳಿಕ ಅದೊಂದು ಹುಸಿ ಮೇಲ್ ಎನ್ನುವುದು ಸ್ಪಷ್ಟವಾಗಿದೆ. ಆದರೆ ಈ ಸಂದೇಶ ತಲುಪಿದ ಬಳಿಕ ಟೀಂ ಇಂಡಿಯಾ ಆಟಗಾರರಿಗೆ ಭದ್ರತೆ ಹೆಚ್ಚಿಸಲಾಗಿದೆ.
ಪಿಸಿಬಿಗೆ ಬಂದ ಮೇಲ್ ಕುರಿತಂತೆ ಸ್ಪಷ್ಟನೆ ನೀಡಿರುವ ಬಿಸಿಸಿಐ ಮೂಲಗಳು, ಇದೊಂದು ಹುಸಿ ಮೇಲ್ ಆಗಿದ್ದು, ಆಟಗಾರರ ಮೇಲೆ ಯಾವುದೇ ದಾಳಿ ಸಾಧ್ಯತೆ ಇಲ್ಲ. ಆದರೆ ಸದ್ಯ ಆಟಗಾರರ ಭದ್ರತೆಯನ್ನು ಹೆಚ್ಚು ಮಾಡಲಾಗಿದೆ ಎಂದು ತಿಳಿಸಿದೆ.
ಟಿ-20 ಹಾಗೂ ಏಕದಿನ ಸರಣಿಯನ್ನು ಕೈವಶ ಮಾಡಿಕೊಂಡಿರುವ ಕೊಹ್ಲಿ ಪಡೆ, ಪ್ರವಾಸದ ಕೊನೆಯ ಭಾಗವಾದ ಟೆಸ್ಟ್ ಸರಣಿಯನ್ನು ಆಗಸ್ಟ್ 22ರಿಂದ ಆರಂಭಿಸಲಿದೆ. ಸೆಪ್ಟೆಂಬರ್ 3ರಂದು ವಿಂಡೀಸ್ ಪ್ರವಾಸ ಕೊನೆಗೊಳ್ಳಲಿದೆ.
