ಮುಂಬೈ: ಭಾರತ ತಂಡದ ದಂತಕತೆ ಸುನಿಲ್ ಗವಾಸ್ಕರ್ರವರನ್ನು ನೆಟ್ಸ್ನಲ್ಲಿ ನಾನು ನೋಡಿದ ಅತ್ಯಂತ ಕೆಟ್ಟ ಆಟಗಾರ. ಆದರೆ, ಪಂದ್ಯದಲ್ಲೇ ಅವರ ಆಟ ಅದ್ಭುತವಾಗಿರುತ್ತಿತ್ತು ಎಂದು ಮಾಜಿ ವಿಕೆಟ್ ಕೀಪರ್ ಕಿರಣ್ ಮೋರೆ ಹೇಳಿದ್ದಾರೆ.
ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಮೊದಲ ಬಾರಿಗೆ ಹತ್ತು ಸಾವಿರ ರನ್ಗಳಿಸಿದ ದಾಖಲೆ ಹೊಂದಿರುವ ಸುನಿಲ್ ಗವಾಸ್ಕರ್ ಕುರಿತು ಮಾಜಿ ವಿಕೆಟ್ ಕೀಪರ್ ಮೋರೆ ಅಚ್ಚರಿಯ ಹೇಳಿಕೆ ನೀಡಿದ್ದಾರೆ. ಸುನಿಲ್ ಗವಾಸ್ಕರ್ ಅವರ ಜೊತೆ ಕೆಲವ ವರ್ಷಗಳ ಕಾಲ ಜೊತೆಯಾಗಿ ಆಡಿರುವ ಮೋರೆ ನೆಟ್ನಲ್ಲಿ ಸುನಿಲ್ ಗವಾಸ್ಕರ್ ಅವರು ಅತ್ಯಂತ ಕೆಟ್ಟ ರೀತಿ ಬ್ಯಾಟಿಂಗ್ ಮಾಡುತ್ತಿದ್ದರು ಎಂದಿದ್ದಾರೆ.
'ಬಲಿಷ್ಠ ಬೌಲರ್ಗಳ ಮುಂದೆ ಸರಾಗವಾಗಿ ರನ್ಗಳಿಸುತ್ತಿದ್ದ ಅವರು ನೆಟ್ಸ್ನಲ್ಲಿ ಮಾತ್ರ ಬೌಲರ್ಗಳನ್ನು ಎದುರಿಸಲು ಗವಾಸ್ಕರ್ ಪರದಾಡುತ್ತಿದ್ದರು ಎಂದು ಬಹಿರಂಪಡಿಸಿದ್ದಾರೆ. ಆದರೂ ಸುನಿಲ್ ಗವಾಸ್ಕರ್ ಅವರನ್ನು ಹೊಗಳಿರುವ ಮೋರೆ, ಗವಾಸ್ಕರ್ ನೆಟ್ಸ್ನಲ್ಲಿ ಆಡುವುದಕ್ಕಿಂತ ಪಂದ್ಯದಲ್ಲಿ 99.9ರಷ್ಟು ವಿಭಿನ್ನವಾಗಿ ಆಡುತ್ತಿದ್ದರು. ಅವರ ಆಟ ನಿಜಕ್ಕೂ ಅದ್ಭುತವಾಗಿರುತ್ತಿತ್ತು.'
ಹೆಲ್ಮೆಟ್ ಇಲ್ಲದೆ ಡೆನಿಸ್ ಲಿಲ್ಲಿ, ಜೆಫ್ ಥಾಮಸ್ರಂತಹ ಮಾರಕ ವೇಗಿಗಳನ್ನೇ ಎದುರಿಸುತ್ತಿದ್ದ ಗವಾಸ್ಕರ್ಗೆ ಏಕಾಗ್ರತೆ ಎಂಬುದು ದೇವರು ಕೊಟ್ಟ ಉಡುಗೊರೆಯಾಗಿತ್ತು. ಅವರ ಏಕಾಗ್ರತೆ ನಿಜಕ್ಕೂ ನಂಬಲಸಾಧ್ಯವಾದಂತಿತ್ತು. ಅವರ ಪಕ್ಕದಲ್ಲಿ ನಿಂತು ಮಾತನಾಡಿದ್ರೂ, ನೃತ್ಯ ಮಾಡುತ್ತಿದ್ದರೂ ಅವರು ಅವರದ್ದೇ ಲೋಕದಲ್ಲಿರುತ್ತಿದ್ದರು. ಯಾವಾಗಲೂ ಕ್ರಿಕೆಟ್ ಬಗ್ಗೆಯೇ ಆಲೋಚಿಸುತ್ತಿದ್ದರು ಎಂದು 57 ವರ್ಷದ ಕಿರಣ್ ಮೋರೆ ತಿಳಿಸಿದ್ದಾರೆ.
ಸುನಿಲ್ ಗವಾಸ್ಕರ್ 1971ರಲ್ಲಿ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ್ದರು. 1987ರಲ್ಲಿ ವಿದಾಯ ಹೇಳುವ ಮುನ್ನ ಭಾರತದ ಪರ 233 ಅಂತಾರಾಷ್ಟ್ರೀಯ ಪಂದ್ಯಗಳನ್ನಾಡಿದ್ದರು. 125 ಟೆಸ್ಟ್ ಪಂದ್ಯಗಳನ್ನಾಡಿದ್ದ ಅವರು, 34 ಶತಗಳೊಡನೆ 10,122 ರನ್ಗಳಿಸಿದ್ದರು. ಅಂತಾರಾಷ್ಟ್ರೀಯ(ಟೆಸ್ಟ್ ಅಥವಾ ಏಕದಿನ) ಕ್ರಿಕೆಟ್ ಮಾದರಿಯಲ್ಲಿ ಮೊದಲ ಬಾರಿಗೆ 10 ಸಾವಿರ ಗಡಿದಾಟಿದ ಬ್ಯಾಟ್ಸ್ಮನ್ ಎಂಬ ದಾಖಲೆ ಕೂಡ ಲಿಟ್ಲ್ ಮಾಸ್ಟರ್ಗೆ ಸಲ್ಲುತ್ತದೆ.
