ಮುಂಬೈ: ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಪ್ರಸ್ತುತ ಭಾರತ ತಂಡದ ಐವರು ಆಟಗಾರರನ್ನು ತಮ್ಮ ತಂಡದಲ್ಲಿ ಸೇರಿಸಿಕೊಳ್ಳಲು ಬಯಸಿರುವುದಾಗಿ ಬಿಸಿಸಿಐ ಪೇಜ್ನಲ್ಲಿ ಮಯಾಂಕ್ ಅಗರ್ವಾಲ್ ಜೊತೆಗಿನ ಸಂವಾದ ಕಾರ್ಯಕ್ರಮದಲ್ಲಿ ಹೇಳಿದ್ದಾರೆ.
ಭಾರತೀಯ ಕ್ರಿಕೆಟ್ ತಂಡ ಕಂಡ ಅತ್ಯುತ್ತಮ ನಾಯಕರಲ್ಲಿ ಗಂಗೂಲಿ ಒಬ್ಬರು. ಇವರ ನಾಯಕತ್ವದಲ್ಲೇ ಭಾರತೀಯ ಕ್ರಿಕೆಟ್ ತಂಡ ವಿದೇಶದಲ್ಲಿ ಟೆಸ್ಟ್ ಪಂದ್ಯಗಳನ್ನು ಗೆಲ್ಲುವ ಅಭಿಯಾನ ಶುರುವಿಟ್ಟುಕೊಂಡಿತ್ತು. 2000ರಲ್ಲಿ ಭಾರತೀಯ ಕ್ರಿಕೆಟ್ ಮ್ಯಾಚ್ ಫಿಕ್ಸಿಂಗ್ನಲ್ಲಿ ಸಿಲುಕಿ ನಲುಗುತ್ತಿದ್ದ ವೇಳೆ ತಂಡದ ಚುಕ್ಕಾಣಿ ಹಿಡಿದ ದಾದಾ, ಭಾರತ ತಂಡ ಶಕ್ತಿ ಹೆಚ್ಚಿಸಿದ್ದರು.
ಮಯಾಂಕ್ ತನ್ನ ತಂಡದಲ್ಲಿ ಬೇಡ ಎಂದು ಗಂಗೂಲಿ ಹೇಳಿದ್ದೇಕೆ?
ಮಯಾಂಕ್ ಅಗರ್ವಾಲ್ ಸಂದರ್ಶನದ ವೇಳೆ ಪ್ರಸ್ತುತ ಭಾರತ ತಂಡದಲ್ಲಿ ಯಾವ 5 ಆಟಗಾರರನ್ನು ನೀವು ನಿಮ್ಮ ತಂಡಕ್ಕೆ ಆಯ್ಕೆ ಮಾಡಿಕೊಳ್ಳುವಿರಿ? ಎಂಬ ಪ್ರಶ್ನೆಗೆ ಉತ್ತರಿಸುತ್ತಾ, "ಇದು ಕಠಿಣವಾದ ಪ್ರಶ್ನೆ. ಎಲ್ಲಾ ಜನರೇಶನ್‌ನಲ್ಲಿ ಆಟಗಾರರು ವಿಭಿನ್ನವಾಗಿರುತ್ತಾರೆ. ಈಗಿರುವ ನಿಮ್ಮ ತಂಡದಲ್ಲಿ ನಾನು ವಿರಾಟ್ ಕೊಹ್ಲಿ ಹಾಗೂ ರೋಹಿತ್ರನ್ನು ಆಯ್ಕೆ ಮಾಡಿಕೊಳ್ಳುತ್ತೇನೆ. ಆದರೆ ನಿಮ್ಮನ್ನು(ಮಯಾಂಕ್) ಆಯ್ಕೆ ಮಾಡಿಕೊಳ್ಳುವುದಿಲ್ಲ!
ಏಕೆಂದರೆ, ನಮ್ಮ ಬಳಿ ಸೆಹ್ವಾಗ್ ಇದ್ದಾರೆ. ನಾನು ಬುಮ್ರಾರನ್ನು ಆಯ್ಕೆ ಮಾಡಿಕೊಳ್ಳುತ್ತೇನೆ, ಅವರ ಜೊತೆಗೆ ಜಹೀರ್ ಇರಲಿದ್ದಾರೆ. ಶಮಿಯನ್ನು ಜಾವಗಲ್ ಶ್ರೀನಾಥ್ರ ನಿವೃತ್ತಿಯ ನಂತರ ಆಯ್ಕೆ ಮಾಡಿಕೊಳ್ಳುತ್ತೇನೆ. ಸ್ಪಿನ್ನರ್ ವಿಭಾಗದಲ್ಲಿ ಅನಿಲ್, ಭಜ್ಜಿ ನನ್ನ ತಂಡದಲ್ಲಿದ್ದಾರೆ. ಹಾಗಾಗಿ, ಮೂರನೇ ಸ್ಪಿನ್ನರ್ ಆಗಿ ಅಶ್ವಿನ್‌ರನ್ನು ತೆಗೆದುಕೊಳ್ಳುತ್ತೇನೆ. ಇನ್ನು ರವೀಂದ್ರ ಜಡೇಜಾರನ್ನು ಹೊಂದಲು ಕೂಡ ಆಸೆ ಪಡುತ್ತೇನೆ ಎಂದಿದ್ದಾರೆ.
