ಮೆಲ್ಬೋರ್ನ್( ಆಸ್ಟ್ರೇಲಿಯಾ): ಮಹಿಳಾ ಕ್ರಿಕೆಟ್ನಲ್ಲಿ ಹಾಲಿ ಚಾಂಪಿಯನ್ ಆಗಿರೋ ಆಸ್ಟ್ರೇಲಿಯಾ ಹಾಗೂ ಬಾಂಗ್ಲಾದೇಶದ ವಿರುದ್ಧ ಗೆದ್ದು ತಮ್ಮ ಸಾಮರ್ಥ್ಯ ತೋರಿರುವ ಭಾರತೀಯ ನಾರಿಮಣಿಯರು ನಾಳೆ ಮಹಿಳಾ ಕಿವೀಸ್ ಪಡೆಯನ್ನು ಮೆಲ್ಬೋರ್ನ್ನಲ್ಲಿ ಎದುರುಗೊಳ್ಳಲಿದ್ದಾರೆ. ಈ ಪಂದ್ಯದಲ್ಲಿ ಗೆದ್ದರೇ ಸೆಮೀಸ್ಗೆ ಹತ್ತಿರವಾಗಲಿದೆ. ಬಾಂಗ್ಲಾದೇಶದ ವಿರುದ್ಧದ ಪಂದ್ಯದಲ್ಲಿ ಜ್ವರದ ಕಾರಣದಿಂದ ಭಾಗವಹಿಸಲಾಗದ ಸ್ಟಾರ್ ಓಪನರ್ ಸ್ಮೃತಿ ಮಂಧಾನ ನ್ಯೂಜಿಲ್ಯಾಂಡ್ ವಿರುದ್ಧದ ಪಂದ್ಯದಲ್ಲಿ ಲಭ್ಯವಿದ್ದು ಭಾರತೀಯ ತಂಡ ಬ್ಯಾಟಿಂಗ್ ಹಾಗೂ ಫೀಲ್ಡಿಂಗ್ ಎರಡರಲ್ಲೂ ಕೂಡಾ ಉತ್ತಮ ಸಾಮರ್ಥ್ಯ ತೋರುವ ಸಾಧ್ಯತೆಯಿದೆ.
ಈ ಕುರಿತು ಮೆಲ್ಬರ್ನ್ನಲ್ಲಿ ಮಾತನಾಡಿದ ಸ್ಮೃತಿ ಮಂಧಾನ '' ಪ್ರತಿ ಪಂದ್ಯವೂ ನನಗೆ ಹೊಸದು. ಹಿಂದಿನ ಎರಡು ವಿಶ್ವಕಪ್ಗಳಲ್ಲಿ ಏನಾಗಿದೆ ಎಂಬುದು ನನಗೆ ಮುಖ್ಯವಲ್ಲ. ನಾಳೆ ಮೂರನೇ ಪಂದ್ಯ ನಡೆಯಲಿದ್ದು ನ್ಯೂಜಿಲ್ಯಾಂಡ್ ಅನ್ನು ಸೋಲಿಸುವ ವಿಶ್ವಾಸವಿದೆ'' ಎಂದಿದ್ದಾರೆ. ಇದರ ಜೊತೆಗೆ ಮಾತನಾಡಿದ ಅವರು, ಶೆಫಾಲಿ ವರ್ಮಾ ಬಗ್ಗೆ ಮಾತನಾಡಿ '' ಶೆಫಾಲಿ ತಂಡವನ್ನು ಬ್ಯಾಲೆನ್ಸ್ ಮಾಡುವ ಸಾಮರ್ಥ್ಯವಿದ್ದು ಇಬ್ಬರೂ ಉತ್ತಮ ಜೊತೆಯಾಟ ಆಡುತ್ತೇವೆ'' ಎಂಬ ಭರವಸೆ ವ್ಯಕ್ತಪಡಿಸಿದ್ದಾರೆ.
ಇದೇ ವೇಳೆ ಮಾತನಾಡಿದ ನ್ಯೂಜಿಲ್ಯಾಂಡ್ ಆಟಗಾರ್ತಿ, ಬಲಗೈ ವೇಗಿ ಲಿಯಾ ತಹುಹು ''ಭಾರತದೊಂದಿಗೆ ಪಂದ್ಯವಾಡಲು ತುಂಬಾ ಉತ್ಸುಕತೆಯಿದೆ. ಒಂದು ವರ್ಷದ ನಂತರ ಚುಟುಕು ಪಂದ್ಯದಲ್ಲಿ ಸೆಣಸಾಡುತ್ತಿದ್ದೇವೆ'' ಎಂದರು. ಶೆಫಾಲಿ ವರ್ಮಾ ಬಗ್ಗೆ ಮಾತನಾಡಿದ ಅವರು ''ಒಂದು ವರ್ಷದ ಹಿಂದೆ ಶೆಫಾಲಿ ಐಪಿಎಲ್ನಲ್ಲಿ ಆಡಿರುವುದನ್ನು ನೋಡಿದ್ದೇನೆ. ಅವರ ಆಟದ ಬಗ್ಗೆಯೂ ಕುತೂಹಲವಿದೆ. ನಾಳಿನ ಪಂದ್ಯಕ್ಕೆ ಎದುರು ನೋಡುತ್ತಿದ್ದೇವೆ. ಭಾರತವನ್ನು ಎದುರಿಸುವ ಬಗ್ಗೆ ಈಗಾಗಲೇ ಆಟಗಾರರು ಸಮಾಲೋಚನೆ ನಡೆಸಿದ್ದೇವೆ'' ಎಂದಿದ್ದಾರೆ.
ಇನ್ನು ಭಾರತ ಬೌಲಿಂಗ್ ಹಾಗೂ ಬ್ಯಾಟಿಂಗ್ ಎರಡರಲ್ಲೂ ಕೂಡಾ ಪ್ರಭಾವಶಾಲಿಯಾಗಿದ್ದು ನಾಳೆ ಬೆಳಗ್ಗೆ ನ್ಯೂಜಿಲ್ಯಾಂಡ್ ಅನ್ನು ಹೇಗೆ ಎದುರಿಸುತ್ತದೆ ಎಂಬುದು ಕುತೂಹಲ ಮೂಡಿಸಿದೆ.
