ಕೊಲಂಬೊ: ಕೋವಿಡ್-19 ಸಾಂಕ್ರಾಮಿಕ ರೋಗದಿಂದಾಗಿ ಅಂತಾರಾಷ್ಟ್ರೀಯ ವಿಮಾನಯಾನದ ಪುನಾರಂಭವನ್ನು ಆಗಸ್ಟ್ 1ರವರೆಗೆ ಸರ್ಕಾರ ಮುಂದೂಡಿರುವ ಹೊರತಾಗಿಯೂ ಶ್ರೀಲಂಕಾ ಕ್ರಿಕೆಟ್ ಬೋರ್ಡ್ ಚೊಚ್ಚಲ ಆವೃತ್ತಿಯ ಲಂಕಾ ಪ್ರೀಮಿಯರ್ ಲೀಗ್ಅನ್ನು ಆಗಸ್ಟ್ 8ರಿಂದ ಆಗಸ್ಟ್ 22ರವರೆಗೆ ಆಯೋಜಿಸುವ ಆಶಾವಾದ ಹೊಂದಿದೆ.
ಶ್ರೀಲಂಕಾ ಕ್ರಿಕೆಟ್ ಬೋರ್ಡ್ ಲೀಗ್ ಆಯೋಜಿಸಲು ಕ್ರೀಡಾ ಸಚಿವಾಲಯದಿಂದ ಅನುಮತಿ ಪಡೆದಿದೆ. ಆದರೆ ಲಂಕಾ ಪ್ರೀಮಿಯರ್ ಲೀಗ್ ಸರ್ಕಾರ ವಿಮಾನಯಾನ ನಿರ್ಬಂಧ ವಾಪಸ್ ತಗೆದುಕೊಳ್ಳುವುದರ ಮೇಲೆ ನಿಂತಿದೆ. ಏಕೆಂದರೆ ಇದು ಫ್ರಾಂಚೈಸಿ ಕ್ರಿಕೆಟ್ ಲೀಗ್ ಆಗಿರುವುದರಿಂದ ವಿದೇಶಿ ಆಟಗಾರರೂ ಪಾಲ್ಗೊಳ್ಳಬೇಕಿದೆ.
ನಾವು ಈ ವಿಚಾರವಾಗಿ ಅಧ್ಯಕ್ಷ ಗೋಟಬಯ ರಾಜ‍ಪಕ್ಸೆ ಅವರೊಂದಿಗೆ ಮಾತನಾಡಲು ಬಯಸುತ್ತೇವೆ. ಮತ್ತು ಅಂತಿಮ ತೀರ್ಮಾನ ಕೈಗೊಳ್ಳುತ್ತೇವೆ ಎಂದು ಎಸ್‌ಎಲ್‌ಸಿ ಸಿಇಒ ಆ್ಯಶ್ಲೆ ಡಿ. ಸಿಲ್ವಾ ಉಲ್ಲೇಖಿಸಿದ್ದಾರೆ.
ಶ್ರೀಲಂಕಾ ಇತರೆ ದೇಶಗಳಿಗೆ ಹೋಲಿಸಿದರೆ ಕೊರೊನಾ ವೈರಸ್ಅನ್ನು ಉತ್ತಮವಾಗಿ ನಿಯಂತ್ರಿಸಿದೆ. ಇದ್ದ 2000 ಪ್ರಕರಣಗಳಲ್ಲಿ ಈಗಾಗಲೇ 1700ಕ್ಕೂ ಹೆಚ್ಚು ಪ್ರಕರಣಗಳು ಚೇತರಿಕೆ ಕಂಡಿವೆ. ಹೀಗಾಗಿ ಈ ಟೂರ್ನಮೆಂಟ್ನಲ್ಲಿ ವಿದೇಶಿ ಆಟಗಾರರ ಪಾಲ್ಗೊಳ್ಳುವಿಕೆಯನ್ನು ಬಯಸುತ್ತಿದ್ದೇವೆ ಎಂದು ಅವರು ತಿಳಿಸಿದ್ದಾರೆ.
ಲೀಗ್‌ನಲ್ಲಿ ಒಟ್ಟು ಐದು ತಂಡಗಳು ಭಾಗವಹಿಸುವ ಸಾಧ್ಯತೆಯಿದ್ದು, ಒಂದು ತಂಡ ಒಟ್ಟು ಆರು ವಿದೇಶಿ ಆಟಗಾರರನ್ನು ಕೊಳ್ಳಬಹುದಾಗಿದೆ. ಇದರಲ್ಲಿ ನಾಲ್ವರಿಗೆ ಮಾತ್ರ ಆಡಲು ಅವಕಾಶವಿದೆ.
ಟೂರ್ನಿಯಲ್ಲಿ ಒಟ್ಟು 23 ಪಂದ್ಯಗಳನ್ನು ಆಯೋಜಿಸಬೇಕೆಂಬ ಆಲೋಚನೆ ಇದೆ. ಆದರೆ ಆಗಸ್ಟ್‌ನಲ್ಲಿ ಭಾರತ ತಂಡ ಕ್ರಿಕೆಟ್ ಸರಣಿಯನ್ನು ಆಡಲು ಶ್ರೀಲಂಕಾ ಪ್ರವಾಸ ಕೈಗೊಳ್ಳುವುದು ಖಾತ್ರಿಯಾದರೆ ಎಲ್ಪಿಎಲ್ ಪಂದ್ಯಗಳ ಸಂಖ್ಯೆ 13ಕ್ಕೆ ಇಳಿಸಲಿದ್ದೇವೆ ಎಂದಿದ್ದಾರೆ.
