ಲಾಹೋರ್: ಶಾಹೀದ್ ಅಫ್ರಿದಿ ತಮ್ಮ ವೃತ್ತಿ ಜೀವನದುದ್ದಕ್ಕೂ ನನ್ನ ವಿರುದ್ಧ ನಿಂತಿದ್ದರು ಎಂದು ಪಾಕಿಸ್ತಾನದ ಮಾಜಿ ಸ್ಪಿನ್ನರ್ ಕನೇರಿಯಾ ಆರೋಪಿಸಿದ್ದಾರೆ.
ಕೆಲವು ತಿಂಗಳ ಹಿಂದೆ ಸಂದರ್ಶನವೊಂದರಲ್ಲಿ ಇಡೀ ಪಾಕಿಸ್ತಾನ ತಂಡ ಕನೇರಿಯಾ, ತಾನು ಒಬ್ಬ ಹಿಂದೂ ಎಂಬ ಕಾರಣಕ್ಕೆ ಅವರನ್ನು ಡ್ರೆಸ್ಸಿಂಗ್ ರೂಮ್ನಲ್ಲಿ ಕೆಟ್ಟದಾಗಿ ನಡೆಸಿಕೊಳ್ಳಲಾಗುತ್ತಿತ್ತು ಎಂದು ಹೇಳಿಕೆ ನೀಡಿ ಕ್ರಿಕೆಟ್ ಜಗತ್ತಿನಲ್ಲೇ ದೊಡ್ಡ ವಿವಾದ ಸೃಷ್ಟಿಸಿದ್ದರು.
ಇದೀಗ ಸ್ವತಃ ಕನೇರಿಯಾ, ತಾವು ಸೀಮಿತ ಓವರ್ಗಳ ಕ್ರಿಕೆಟ್ನಲ್ಲಿ ಹೆಚ್ಚು ಕಾಲ ಉಳಿಯಲು ಸಾಧ್ಯವಾಗದ್ದಕ್ಕೆ ಕಾರಣ ಮಾಜಿ ನಾಯಕ ಶಾಹೀದ್ ಅಫ್ರಿದಿಯವರ ರಾಜಕೀಯ ಎಂದು ಆರೋಪ ಮಾಡುವ ಮೂಲಕ ಮತ್ತೊಂದು ವಿವಾದಕ್ಕೆ ನಾಂದಿ ಹಾಡಿದ್ದಾರೆ.
“ಶಾಹೀದ್ ಅಫ್ರಿದಿ ನನ್ನ ವೃತ್ತಿ ಜೀವನ ಆರಂಭವಾದ ದಿನದಿಂದಲೂ ನನ್ನ ವಿರೋಧಿಯಾಗಿದ್ದರು. ಅವರು ನನ್ನನ್ನು ಏಕದಿನ ತಂಡದಿಂದ ದೂರವಿಟ್ಟರು. ನಾವಿಬ್ಬರೂ ಒಂದೇ ವಿಭಾಗದಲ್ಲಿದ್ದರಿಂದ ಅವರು ನನ್ನನ್ನು ಹೊರಗಿಡುತ್ತಿದ್ದರು. ಹೆಚ್ಚು ಪಂದ್ಯಗಳಿಗೆ ಅವಕಾಶ ನೀಡದೇ ಬೆಂಚ್ ಕಾಯುವಂತೆ ಮಾಡುವ ಮೂಲಕ ಏಕದಿನ ಕ್ರಿಕೆಟ್ನಲ್ಲಿ ಅವಕಾಶ ದೊರೆಯದಂತೆ ಮಾಡಿದರು. ನಾನು ನನ್ನ 10 ವರ್ಷಗಳ ವೃತ್ತಿ ಜೀವನದಲ್ಲಿ ಕೇವಲ 16 ಏಕದಿನ ಪಂದ್ಯಗಳನ್ನು ಮಾತ್ರ ಆಡಿದ್ದೇನೆ. ಒಂದು ವರ್ಷಕ್ಕೆ ಕೇವಲ 2ರಿಂದ 3 ಏಕದಿನ ಪಂದ್ಯಗಳನ್ನು ಮಾತ್ರ ಆಡಲು ಅವಕಾಶ ಪಡೆಯುತ್ತಿದ್ದೆ” ಎಂದು ಕನೇರಿಯಾ ಹೇಳಿಕೊಂಡಿದ್ದಾರೆ.
ಕನೇರಿಯಾ 2009ರಲ್ಲಿ ಸ್ಪಾಟ್ ಫಿಕ್ಸಿಂಗ್ನಲ್ಲಿ ಸಿಲುಕಿದ್ದರು. ತಮ್ಮ ಮಾಜಿ ಸಹ ಆಟಗಾರ ಮರ್ವಿನ್ ವಿರುದ್ಧ ಓವರ್ಗೆ 12 ರನ್ ಬಿಟ್ಟುಕೊಡುವುದಾಗಿ ಫಿಕ್ಸಿಂಗ್ ಮಾಡಿಕೊಂಡು ಸಿಕ್ಕಿಬಿದ್ದಿದ್ದರು.
ಈ ಕುರಿತ ಮಾತನಾಡಿರುವ ಅವರು, “ನಾನು ಮಾಡಿದ ತಪ್ಪಿನ ಬಗ್ಗೆ ವಿಷಾಧಿಸುತ್ತಿದ್ದೇನೆ. ಅದಕ್ಕಾಗಿ ದಂಡವನ್ನೂ ತೆತ್ತಿದ್ದೇನೆ. ಮಾನವೀಯತೆ ದೃಷ್ಟಿಯಿಂದ ನನ್ನ ಮೇಲಿರುವ ನಿಷೇಧವನ್ನು ತೆಗೆದು ಹಾಕಿದರೆ ನನ್ನಲ್ಲಿರುವ ಲೆಗ್ಸ್ಪಿನ್ ಕಲೆಯನ್ನು ಮುಂದುವರಿಸಿಕೊಂಡು ದೇಶದ ಜನರು ಸದಾ ನೆನೆಯುವ ಸಾಧನೆಯನ್ನು ಮಾಡಬೇಕೆಂದುಕೊಂಡಿದ್ದೇನೆ“ ಎಂದು ಪಾಕಿಸ್ತಾನ ಪರ ಅತಿ ಹೆಚ್ಚು ಟೆಸ್ಟ್ ವಿಕೆಟ್ ಪಡೆದಿರುವ ಕನೇರಿಯಾ ತಿಳಿಸಿದ್ದಾರೆ.
