ಹೈದರಾಬಾದ್ : ದಕ್ಷಿಣ ಆಫ್ರಿಕಾದ ಐಪಿಎಲ್ನಲ್ಲಿ ಭಾಗವಹಿಸವ ಆಟಗಾರರು ಪಾಕಿಸ್ತಾನ ವಿರುದ್ಧದ ಸರಣಿಯನ್ನು ಮೊಟಕುಗೊಳಿಸಿ ಭಾರತಕ್ಕೆ ಅವರ ಫ್ರಾಂಚೈಸಿಗಳು ವ್ಯವಸ್ಥೆ ಮಾಡುವ ಚಾರ್ಟರ್ಡ್‌ ವಿಮಾನದಲ್ಲಿ ಬರಲಿದ್ದಾರೆ ಎಂದು ತಿಳಿದು ಬಂದಿದೆ.
ದಕ್ಷಿಣ ಆಫ್ರಿಕಾ ಆಟಗಾರರು ಬಹುಶಃ ಎರಡನೇ ಏಕದಿನ ಪಂದ್ಯದ ನಂತರ ಭಾರತಕ್ಕೆ ಬರಲಿದ್ದಾರೆ ಎನ್ನಲಾಗುತ್ತಿದೆ. ಕಗಿಸೊ ರಬಾಡ, ಅನ್ರಿಚ್ ನೋಕಿಯಾ( ಡೆಲ್ಲಿ ಕ್ಯಾಪಿಟಲ್ಸ್), ಕ್ವಿಂಟನ್ ಡಿ ಕಾಕ್ (ಮುಂಬೈ ಇಂಡಿಯನ್ಸ್), ಡೇವಿಡ್ ಮಿಲ್ಲರ್ (ರಾಜಸ್ಥಾನ್ ರಾಯಲ್ಸ್) ಮತ್ತು ಲುಂಗಿ ಎಂಗಿಡಿ (ಚೆನ್ನೈ ಸೂಪರ್ ಕಿಂಗ್ಸ್) ಏಪ್ರಿಲ್ 9 ರಿಂದ ಪ್ರಾರಂಭವಾಗುವ ನಗದು ಸಮೃದ್ಧ ಲೀಗ್ಗಾಗಿ ಭಾರತಕ್ಕೆ ಪ್ರಯಾಣ ಬೆಳೆಸಲಿದ್ದಾರೆ.
ದಕ್ಷಿಣ ಆಫ್ರಿಕಾ ತಂಡ ಪಾಕಿಸ್ತಾನದೆದುರು ಏಪ್ರಿಲ್ 2 ಮತ್ತು ಏಪ್ರಿಲ್ 16ರ ನಡುವೆ 3 ಏಕದಿನ ಮತ್ತು 4 ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳನ್ನಾಡಲಿದೆ. ದಕ್ಷಿಣ ಆಫ್ರಿಕಾದಿಂದ ಬರುವ ಆಟಗಾರರು ಇಲ್ಲಿಗೆ ಬಂದ ಮೇಲೆ 7 ದಿನಗಳ ಕಡ್ಡಾಯ ಕ್ವಾರಂಟೈನ್ಗೆ ಒಳಗಾಗುವ ಅವಶ್ಯಕತೆಯಿಲ್ಲ. ಯಾಕೆಂದರೆ, ಪಾಕಿಸ್ತಾನದೆದುರಿನ ಸರಣಿ ಬಯೋಬಬಲ್ನಲ್ಲೇ ನಡೆಯಲಿದೆ.
ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿ ಮತ್ತು ಬಿಸಿಸಿಐ ನಡುವಿನ ಒಪ್ಪಂದದ ಪ್ರಕಾರ ಐಪಿಎಲ್ನಲ್ಲಿ ಆಡುವ ಆಟಗಾರರನ್ನು ಮುಂಚಿತವಾಗಿ ಕಳುಹಿಸಿ ಕೊಡಬೇಕಿದೆ. ಅದಕ್ಕಾಗಿ ಸಿಎಸ್ಎ ಡಿಕಾಕ್, ಎನ್ರಿಚ್, ರಬಾಡ ಮತ್ತು ಮಿಲ್ಲರ್ರನ್ನು ಏಕದಿನ ಸರಣಿಗೆ ಮಾತ್ರ ಆಯ್ಕೆ ಮಾಡಿ, ಟಿ20 ಸರಣಿಯಿಂದ ಬ್ರೇಕ್ ನೀಡಿದೆ.
ಇದನ್ನು ಓದಿ: ಐಪಿಎಲ್ 2021.. ಮುಂಬೈಗೆ ಬಂದಿಳಿದು ಕ್ವಾರಂಟೈನ್ಗೊಳಗಾದ ಕೆಕೆಆರ್ ಆಟಗಾರರು
