ದುಬೈ : ಸಿಎಸ್ಕೆ ತಂಡದ ಪ್ರಮುಖ ಆಟಗಾರನಾಗಿದ್ದ ಸುರೇಶ್ ರೈನಾ ವೈಯಕ್ತಿಕ ಕಾರಣ ನೀಡಿ ಐಪಿಎಲ್ನಿಂದ ಹೊರ ಬಂದಿದ್ದಾರೆ. ಆದರೆ, ಅವರ ನಿರ್ಧಾರದ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿರುವ ಸಿಎಸ್ಕೆ ಮಾಲೀಕ ಶ್ರೀನಿವಾಸನ್, ರೈನಾ ಬದಲು ಆಟಗಾರನನ್ನೂ ಹೆಸರಿಸಿ ಶಾಕ್ ನೀಡಿದ್ದಾರೆ.
ಶನಿವಾರ ಸುರೇಶ್ ರೈನಾ ವೈಯಕ್ತಿಕ ಕಾರಣಗಳಿಂದ ಟೂರ್ನಿಯಿಂದ ಹೊರಗುಳಿಯಲಿದ್ದಾರೆ ಎಂದು ಸಿಎಸ್ಕೆ ಸಿಇಒ ಟ್ವೀಟ್ ಮೂಲಕ ತಿಳಿಸಿದ್ದರು. ಆದರೆ, ಕೆಲ ವರದಿಗಳ ಪ್ರಕಾರ, ರೈನಾಗೆ ಬಯೋ ಸೆಕ್ಯೂರ್ ವಲಯದ ಬಗ್ಗೆ ಅಸಮಾಧಾನವಿದೆ ಎಂದಿದ್ದರೆ, ಮತ್ತೆ ಕೆಲವು ವರದಿಗಳು ಧೋನಿಗೆ ನೀಡಿದ್ದಂತಹ ಸೌಲಭ್ಯವುಳ್ಳ ರೂಮ್ ನೀಡದಿರುವುದಕ್ಕೆ ರೈನಾ ಬೇಸರವ್ಯಕ್ತಪಡಿಸಿ ಈ ನಿರ್ಧಾರ ತೆಗೆದುಕೊಂಡಿದ್ದಾರೆ ಎಂದು ಹೇಳುತ್ತಿವೆ.
164 ಐಪಿಎಲ್ ಪಂದ್ಯಗಳಳಿಂದ 4527 ರನ್‌ಗಳಿಸಿರುವ ರೈನಾ, ಒಂದು ವೇಳೆ ತಮ್ಮ ನಿರ್ಧಾರ ಬದಲಿಸಿ ವಾಪಸ್ ಬಾರದಿದ್ದರೆ, ಈ ವರ್ಷದ ವೇತನವಾದ ₹11 ಕೋಟಿ ಕಳೆದುಕೊಳ್ಳಲಿದ್ದಾರೆ ಎಂದು ಶ್ರೀನಿವಾಸನ್ ಎಚ್ಚರಿಸಿದ್ದರು. ಅಲ್ಲದೆ ರೈನಾ ಬದಲಿಗೆ ಬೇರೆ ಯಾವ ಆಟಗಾರರನ್ನು ತಂಡಕ್ಕೆ ಆಯ್ಕೆ ಮಾಡಿಕೊಳ್ಳುವುದಿಲ್ಲ. ಬದಲಾಗಿ ತಮ್ಮ ತಂಡದಲ್ಲಿರುವ ಯುವ ಆಟಗಾರರಿಗೆ ಅವಕಾಶ ನೀಡುವುದಾಗಿ ಅವರು ತಿಳಿಸಿದ್ದಾರೆ.
ಈಗಾಗಲೇ ದೇಶೀಯ ಕ್ರಿಕೆಟ್ನಲ್ಲಿ ಉತ್ತಮ ಪ್ರದರ್ಶನ ತೋರಿರುವ ಪುಣೆಯ ಅದ್ಭುತ ಬ್ಯಾಟ್ಸ್ಮನ್ ಋತುರಾಜ್ ಗಾಯಕ್ವಾಡ್ ಅವರನ್ನು ರೈನಾ ಜಾಗದಲ್ಲಿ ಆಡಿಸುವುದಾಗಿ ಸಿಎಸ್ಕೆ ಬಾಸ್ ಹೇಳಿದ್ದು, ಅವರು ಈ ಆವೃತ್ತಿಯಿಂದಲೇ ಸೂಪರ್ ಸ್ಟಾರ್ ಆಗಬಹುದು, ಯಾರಿಗೆ ಗೊತ್ತು? ಎಂದಿದ್ದಾರೆ.
