ದುಬೈ : ಭಾರತ ತಂಡದ ಆಲ್ರೌಂಡರ್ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಸುರೇಶ್ ರೈನಾ ವೈಯಕ್ತಿಕ ಕಾರಣಗಳಿಂದ ಐಪಿಎಲ್ ತ್ಯಜಿಸಿದ್ದಾರೆಂದು ಈಗಾಗಲೇ ಸುದ್ದಿಯಾಗಿದೆ. ಆದರೆ, ರೈನಾ ಚೆನ್ನೈ ತಂಡದಿಂದ ಹೊರಬರಲು ಕಾರಣ ಒಂದು ಹೋಟೆಲ್ ರೂಮ್ ಎಂಬ ವಿಚಾರ ಕೂಡ ಕೇಳಿ ಬರುತ್ತಿದೆ.
ಮೂಲಗಳ ಪ್ರಕಾರ ಹೋಟೆಲ್ನಲ್ಲಿ ಸಿಎಸ್ಕೆ ನಾಯಕ ಧೋನಿಗೆ ನೀಡಿದ್ದ ಸೌಲಭ್ಯವುಳ್ಳ ರೂಮನ್ನು ತಮಗೆ ನೀಡಿಲ್ಲದ್ದಕ್ಕೆ ರೈನಾ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದರೆಂದು ತಿಳಿದು ಬಂದಿದೆ. ಆದರೆ, ಸಿಎಸ್ಕೆ ಸಿಇಒ ವಿಶ್ವನಾಥನ್ ವೈಯಕ್ತಿಕ ಕಾರಣದಿಂದ ರೈನಾ ಭಾರತಕ್ಕೆ ಮರಳುತ್ತಿದ್ದಾರೆ ಎಂದು ತಿಳಿಸಿದ್ದರು.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಸಿಎಸ್ಕೆ ಮಾಲೀಕ ಹಾಗೂ ಬಿಸಿಸಿಐ ಮಾಜಿ ಅಧ್ಯಕ್ಷ ಎನ್. ಶ್ರೀನಿವಾಸನ್, ಎಂಎಸ್ ಧೋನಿ ತಂಡದ ಮೇಲೆ ಸಂಪೂರ್ಣ ಹಿಡಿತ ಹೊಂದಿದ್ದಾರೆ. ಧೋನಿ ಪರಿಸ್ಥಿತಿಯನ್ನು ಯಶಸ್ವಿಯಾಗಿ ನಿಭಾಯಿಸುತ್ತಾರೆ ಅಂತಾ ಹೇಳಿರುವ ಶ್ರೀನಿವಾಸನ್, ರೈನಾ ಅವರು ಹೋಟೆಲ್ ರೂಮಿಗಾಗಿ ಅಸಮಾಧಾನಗೊಂಡ ವಿಚಾರದ ಬಗ್ಗೆ ಯಾವುದೇ ಮಾಹಿತಿ ನೀಡಿಲ್ಲ.
ಆದರೆ, ರೈನಾ ತಂಡ ತೊರೆದಿರುವುದಕ್ಕೆ ಅಸಮಾಧಾನ ವ್ಯಕ್ತಪಡಿಸಿರುವ ಅವರು, ಸಿಎಸ್ಕೆ ಒಂದು ಕುಟುಂಬವಿದ್ದಂತೆ. ಎಲ್ಲಾ ಆಟಗಾರರು ಸಹಬಾಳ್ವೆಯನ್ನು ಕಲಿತಿದ್ದಾರೆ. ಆದರೆ, ಯಾರಿಗಾದರೂ ತಂಡದಲ್ಲಿ ಇರಲು ಇಷ್ಟವಿಲ್ಲದಿದ್ದರೆ ಅಥವಾ ಅಸಮಾಧಾನವಿದ್ದರೆ ಹೊರ ಹೋಗಬಹುದು. ನಾನು ಯಾರನ್ನೂ ಒತ್ತಾಯ ಮಾಡುವುದಿಲ್ಲ. ಕೆಲ ಬಾರಿ ಯಶಸ್ಸು ತಲೆಗೇರಿದರೆ ಈ ರೀತಿ ವರ್ತಿಸುತ್ತಾರೆ ಎಂದು ಪರೋಕ್ಷವಾಗಿ ರೈನಾ ವಿರುದ್ಧ ಶ್ರೀನಿವಾಸನ್ ಕಿಡಿ ಕಾರಿದ್ದಾರೆ.
ನಾನು ಈಗಾಗಲೇ ಧೋನಿ ಜೊತೆ ಮಾತನಾಡಿದ್ದೇನೆ. ತಂಡದಿಂದ ಎಷ್ಟೇ ಜನ ಹೊರಹೋದರೂ ಚಿಂತೆ ಮಾಡುವ ಅಗತ್ಯವಿಲ್ಲ. ನೀವೆಲ್ಲರೂ ಸುರಕ್ಷಿತವಾಗಿರಿ ಎಂದು ಜೂಮ್ ಕರೆಯ ಮೂಲಕ ಮಾತನಾಡಿ, ಆಟಗಾರರಲ್ಲಿ ವಿಶ್ವಾಸ ತುಂಬಿರೋದಾಗಿ ಶ್ರೀನಿ ತಿಳಿಸಿದ್ದಾರೆ.
ಈ ಬಾರಿಯ ಆವೃತ್ತಿ ಇನ್ನೂ ಪ್ರಾರಂಭವಾಗಿಲ್ಲ ಮತ್ತು ರೈನಾಗೆ ತಂಡದ ಬಾಗಿಲು ತೆರೆದಿರುತ್ತದೆ. ಒಂದು ವೇಳೆ ಅವರು ಗೈರಾದರೆ ಖಂಡಿತವಾಗಿಯೂ ಈ ಸೀಸನ್‌ನ ಎಲ್ಲಾ ಹಣವನ್ನು ( 11 ಕೋಟಿ ರೂ.) ಅವರು ಕಳೆದುಕೊಳ್ಳಲಿದ್ದಾರೆ" ಎಂದು ಸಿಎಸ್ಕೆ ಬಾಸ್ ತಿಳಿಸಿದ್ದಾರೆ.
