ಟ್ರಿನಿಡಾಡ್: ವಿಶ್ವದ ಅತ್ಯುತ್ತಮ ಬೌಲರ್ಗಳಲ್ಲಿ ಒಬ್ಬರಾಗಿರುವ ಅಫ್ಘಾನಿಸ್ತಾನದ ರಶೀದ್ ಖಾನ್ ಟಿ-20 ಕ್ರಿಕೆಟ್ನಲ್ಲಿ ಮಹತ್ವದ ದಾಖಲೆಗೆ ಪಾತ್ರರಾಗಿದ್ದಾರೆ.
ವಿಶ್ವದ ನಂಬರ್ 1 ಟಿ-20 ಬೌಲರ್ ಆಗಿರುವ ರಶೀದ್ ಖಾನ್ ಟಿ-20 ಕ್ರಿಕೆಟ್ನಲ್ಲಿ ವೇಗವಾಗಿ 300 ವಿಕೆಟ್ ಪಡೆದ ದಾಖಲೆಯ ಜೊತೆಗೆ ಈ ಸಾಧನೆ ಮಾಡಿದ ಕಿರಿಯ ಬೌಲರ್ ಎನಿಸಿಕೊಂಡಿದ್ದಾರೆ.
ಶುಕ್ರವಾರ ನಡೆದ ಪಂದ್ಯದಲ್ಲಿ ರಶೀದ್ ಲೂಸಿಯಾ ಜೌಕ್ಸ್ ತಂಡದ ಮೊಹಮ್ಮದ್ ನಬಿ ಅವರ ವಿಕೆಟ್ ಪಡೆಯುವ ಮೂಲಕ ಟಿ-20ಯಲ್ಲಿ 300 ವಿಕೆಟ್ ಪೂರ್ಣಗೊಳಿಸಿದರು. ಇವರು ಈ ಸಾಧನೆಗಾಗಿ 213 ಪಂದ್ಯಗಳನ್ನು ತೆಗೆದುಕೊಂಡಿದ್ದಾರೆ.
ಟಿ-20 ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದಿರುವ 8ನೇ ಬೌಲರ್ ಎಂಬ ಶ್ರೇಯಕ್ಕೆ ರಶೀದ್ ಪಾತ್ರರಾಗಿದ್ದಾರೆ. ರಶೀದ್ ಅಫ್ಘಾನಿಸ್ತಾನದ ಜೊತೆಗೆ ಸಿಪಿಎಲ್, ಐಪಿಎಲ್, ಬಿಬಿಎಲ್, ಪಿಎಸ್ಎಲ್, ಟಿ-20 ಬ್ಲಾಸ್ಟ್ನಲ್ಲಿ ವಿವಿಧ ತಂಡಗಳನ್ನು ಪ್ರತಿನಿಧಿಸಿದ್ದಾರೆ. ಐಪಿಎಲ್ನಲ್ಲಿ ಸನ್ ರೈಸರ್ಸ್ ಹೈದರಾಬಾದ್ನ ಪ್ರಧಾನ ಬೌಲರ್ ಆಗಿದ್ದಾರೆ.
ವೆಸ್ಟ್ ಇಂಡೀಸ್ ದಿಗ್ಗಜ ಡ್ವೇನ್ ಬ್ರಾವೋ 457 ಪಂದ್ಯಗಳಿಂದ 499 ವಿಕೆಟ್ ಪಡೆದು ಟಿ-20 ಕ್ರಿಕೆಟ್ನಲ್ಲಿ ಗರಿಷ್ಠ ವಿಕೆಟ್ ಪಡೆದ ಬೌಲರ್ ಎನಿಸಿಕೊಂಡಿದ್ದಾರೆ. ಇವರ ನಂತರ ಲಸಿತ್ ಮಾಲಿಂಗ(390), ಸುನಿಲ್ ನರೈನ್(382), ಇಮ್ರಾನ್ ತಾಹೀರ್(382), ಶಕಿಬ್ ಅಲ್ ಹಸನ್(354), ಸೊಹೈಲ್ ತನ್ವೀರ್(353), ಶಾಹೀದ್ ಅಫ್ರಿದಿ(339) ವಿಕೆಟ್ ಪಡೆದಿದ್ದಾರೆ.
