ಹೈದರಾಬಾದ್: ಭಾರತ ತಂಡದ ಮಾಜಿ ನಾಯಕ ಕಪಿಲ್ ದೇವ್ 80ರ ದಶಕದಲ್ಲಿ ಇಂಗ್ಲೆಂಡ್ನ ಇಯಾನ್ ಬಾಥಮ್ ಅತ್ಯುತ್ತಮ ಆಲ್ರೌಂಡರ್ ಆಗಿದ್ದರು ಎಂದು ತಿಳಿಸಿದ್ದಾರೆ.
ಪಾಕಿಸ್ತಾನದ ಇಮ್ರಾನ್ ಖಾನ್, ಇಂಗ್ಲೆಂಡ್ನ ಇಯಾನ್ ಬಾಥಮ್, ಕಿವೀಸ್ನ ರಿಚರ್ಡ್ ಆ್ಯಡ್ಲಿ ಹಾಗೂ ನಿಮ್ಮನ್ನೂ ಸೇರಿದಂತೆ ನಾಲ್ವರಲ್ಲಿ ಅತ್ಯುತ್ತಮ ಆಲ್ರೌಂಡರ್ ಯಾರು? ಎಂಬ ಪ್ರಶ್ನೆಗೆ ಈ ಉತ್ತರ ನೀಡಿದರು.
ಇಯಾನ್ ಬಾಥಮ್ ನಿಜವಾದ ಆಲ್ರೌಂಡರ್. ಅವರು ಯಾವುದೇ ಪರಿಸ್ಥಿತಿಯಲ್ಲಾದರೂ ತಮ್ಮ ತಂಡವನ್ನು ಗೆಲ್ಲಿಸುವ ಸಾಮರ್ಥ್ಯ ಹೊಂದಿದ್ದರು. ಬಾಥಮ್ ಎದುರಾಳಿ ಪಡೆಯನ್ನು ಬ್ಯಾಟಿಂಗ್ ಹಾಗೂ ಬೌಲಿಂಗ್ ದಾಳಿಯನ್ನು ಪುಡಿಗಟ್ಟುವ ಸಾಮರ್ಥ್ಯ ಹೊಂದಿದ್ದರು. ಆದರೆ ನಾನು, ಹ್ಯಾಡ್ಲಿಯನ್ನು ಉತ್ತಮ ಬ್ಯಾಟ್ಸ್ಮನ್ ಎಂದು ಹೇಳುವುದಿಲ್ಲ. ಆದರೆ ಆತ ನಾಲ್ವರಿಗಿಂತ ಅತ್ಯತ್ತಮ ಬೌಲರ್ ಆಗಿದ್ದರು ಎಂದರು.
ಪಾಕಿಸ್ತಾನದ ಇಮ್ರಾನ್ ಖಾನ್ರನ್ನು ಅತ್ಯುತ್ತಮ ಅಥ್ಲೀಟ್ ಎಂದು ನಾನು ಹೇಳುವುದಿಲ್ಲ. ಆದರೆ ಆತ ಕಠಿಣ ಪರಿಶ್ರಮಿಯಾಗಿದ್ದರು. ಪಾಕಿಸ್ತಾನದಂತಹ ತಂಡವನ್ನು ಮುನ್ನಡೆಸುವಲ್ಲಿ ಯಶಸ್ವಿಯಾಗಿದ್ದರು. ಅವರು ಮೊದಲು ಸಾಮಾನ್ಯ ಬೌಲರ್ ಆಗಿದ್ದರು. ಆದರೆ ಕಠಿಣ ಪರಿಶ್ರಮ ಹಾಗೂ ಸ್ವಪ್ರಯತ್ನದಿಂದ ಒಬ್ಬ ವೇಗದ ಬೌಲರ್ ಆಗಿ ಬದಲಾದರು. ಅವರ ಬ್ಯಾಟಿಂಗ್ನಲ್ಲೂ ಉತ್ತಮ ಪ್ರದರ್ಶನ ತೋರುತ್ತಿದ್ದರು ಎಂದು ವಿವರಿಸಿದರು.
ತಮ್ಮ ಕುರಿತಾಗಿ ಕೇಳಿದ್ದಕ್ಕೆ, ನಾನು ಶ್ರೇಷ್ಠ ಎಂದು ಹೇಳುವುದಿಲ್ಲ. ನನ್ನನ್ನು ನಾನು ಉತ್ತಮ ಅಥ್ಲೀಟ್ ಎಂದು ಪರಿಗಣಿಸಿದ್ದೇನೆ. ಆದರೆ ಮೂವರನ್ನು ಒಟ್ಟು ಗೂಡಿಸಿದರೆ ನಾನು ಉತ್ತಮ ಕ್ರೀಡಾಪಟುವಾಗಿದ್ದೆ ಎಂದು ಅವರು ಹೇಳಿದ್ದಾರೆ.
