ಮ್ಯಾಂಚೆಸ್ಟರ್: ವೆಸ್ಟ್ ಇಂಡೀಸ್ ವಿರುದ್ಧದ ಟೆಸ್ಟ್ ಸರಣಿಯನ್ನು 2-1 ಅಂತರದಿಂದ ಗೆದ್ದ ಇಂಗ್ಲೆಂಡ್ ತಂಡ, ಹಾಗೂ ಈ ಪಂದ್ಯದ ಮೂಲಕ ಟೆಸ್ಟ್ ಕ್ರಿಕೆಟ್ನಲ್ಲಿ 500 ವಿಕೆಟ್ ಕಿತ್ತ ಸ್ಟುವರ್ಟ್ ಬ್ರಾಡ್ಗೆ ವಿಂಡೀಸ್ ಕ್ಯಾಪ್ಟನ್ ಜೇಸನ್ ಹೋಲ್ಡರ್ ಅಭಿನಂದನೆ ಸಲ್ಲಿಸಿದ್ದಾರೆ.
ಇಲ್ಲಿನ ಓಲ್ಡ್ ಟ್ರ್ಯಾಫೋರ್ಡ್ನಲ್ಲಿ ಮಂಗಳವಾರ ನಡೆದ ವಿಸ್ಡೆನ್ ಟ್ರೋಫಿಯ ನಿಣಾಯಕ ಪಂದ್ಯದಲ್ಲಿ, ಆತಿಥೇಯ ಇಂಗ್ಲೆಂಡ್ ತಂಡ 269 ರನ್ಗಳ ಗೆಲುವು ಸಾಧಿಸುವ ಮೂಲಕ ವಿಂಡೀಸ್ ವಿರುದ್ಧ 2-1ರಿಂದ ಸರಣಿ ಗೆಲುವು ಸಾಧಿಸಿತು. ಹೀಗಾಗಿ ಪಂದ್ಯ ಗೆದ್ದ ಇಂಗ್ಲೆಂಡ್ ಹಾಗೂ ಈ ಪಂದ್ಯದ ಮೂಲಕ ಟೆಸ್ಟ್ ಕ್ರಿಕೆಟ್ನಲ್ಲಿ 500ನೇ ವಿಕೆಟ್ ಕಿತ್ತ ಇಂಗ್ಲೆಂಡ್ ತಂಡದ ಸ್ಟುವರ್ಟ್ ಬ್ರಾಡ್ಗೆ ಜೇಸನ್ ಹೋಲ್ಡರ್ ಶುಭ ಕೋರಿದ್ದಾರೆ.
ನಿರ್ಣಾಯಕ ಮೂರನೇ ಟೆಸ್ಟ್ನ ಅಂತಿಮ ದಿನವು ಸ್ಟುವರ್ಟ್ ಬ್ರಾಡ್ ಅವರ 500 ನೇ ವಿಕೆಟ್ಗಾಗಿ ಎಲ್ಲರೂ ಕಾಯುತ್ತಿದ್ದರು. ಆ ಸಂದರ್ಭ ಸುರಿಯಲಾರಂಭಿಸಿದ ಮಳೆಯಿಂದ ಪಂದ್ಯ ವಿಳಂಬಗೊಂಡಿತು. ಅಂತಿಮವಾಗಿ ಮಳೆ ನಿಂತ ಬಳಿಕ ಬ್ರಾಡ್ 500 ವಿಕೆಟ್ ಪಡೆಯುವ ಸಂದರ್ಭ ಬಂದಿತ್ತು.
ಮೊದಲ ಟೆಸ್ಟ್ ಪಂದ್ಯದಿಂದ ಬ್ರಾಡ್ ಹೊರಗುಳಿದಿದ್ದು, ನಮಗೆ ಶಾಕ್ ಕೊಟ್ಟಿತು. ಏಕೆಂದರೆ ಸ್ಟುವರ್ಟ್ ಬ್ರಾಡ್ ಸಾಮರ್ಥ್ಯದ ಬಗ್ಗೆ ನಮಗೆ ತಿಳಿದಿದೆ ಎಂದು ಹೋಲ್ಡರ್ ಬ್ರಾಡ್ ಸಾಧನೆಯನ್ನು ಶ್ಲಾಘಿಸಿದರು.
ಇಂಗ್ಲೆಂಡ್ ವಿರುದ್ಧದ ಸರಣಿ ಸೋಲಿನ ಬಗ್ಗೆ ಮಾತನಾಡಿದ ಹೋಲ್ಡರ್, ನಮ್ಮ ತಂಡದ ಒಟ್ಟಾರೆ ಪ್ರದರ್ಶನದ ಬಗ್ಗೆ ನಾನು ನಿರಾಶೆಗೊಂಡಿಲ್ಲ. ಫಲಿತಾಂಶದಿಂದ ನಮಗೆ ನಿರಾಸೆಯಾಗಿದ್ದು ಹೌದು. ಇಂಗ್ಲೆಂಡ್ ತಂಡ ತಮ್ಮ ಅಂಗಳದಲ್ಲಿ ಈ ಹಿಂದೆಯೂ ಉತ್ತಮವಾಗಿ ಆಡಿದೆ. ಅವರ ಅಂಕಿ - ಅಂಶಗಳು ಅದನ್ನು ತೋರಿಸುತ್ತವೆ. ಅವರು ಉತ್ತಮವಾಗಿ ಆಡಿ ಸರಣಿ ಗೆದ್ದಿದ್ದಾರೆ ಎಂದು ಹೋಲ್ಡರ್ ಹೇಳಿದ್ದಾರೆ.
ನಿನ್ನೆ ಕೊನೆಗೊಂಡ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್ ತಂಡ 269 ರನ್ಗಳ ಜಯ ಸಾಧಿಸಿದ್ದು, ಪಂದ್ಯದಲ್ಲಿ ವೇಗದ ಬೌಲರ್ ಸ್ಟುವರ್ಟ್ ಬ್ರಾಡ್ ಕೇವಲ 67 ರನ್ ನೀಡಿ ಬರೋಬ್ಬರಿ 10 ವಿಕೆಟ್ ಪಡೆದು ಮಿಂಚಿದರು. ಮೊದಲ ಇನ್ನಿಂಗ್ಸ್ನಲ್ಲಿ ಕೇವಲ 31ರನ್ ನೀಡಿ 6 ವಿಕೆಟ್ ಪಡೆದುಕೊಂಡಿದ್ದ ಬ್ರಾಡ್, ಎರಡನೇ ಇನ್ನಿಂಗ್ಸ್ನಲ್ಲೂ 36 ರನ್ ನೀಡಿ 4 ವಿಕೆಟ್ ಪಡೆದು ಮಿಂಚಿ, ಪಂದ್ಯಶ್ರೇಷ್ಠ ಗೌರವಕ್ಕೆ ಪಾತ್ರರಾದರು. ಇದರ ಜೊತೆಗೆ ಇದೇ ಪಂದ್ಯದಲ್ಲಿ ಟೆಸ್ಟ್ ಕ್ರಿಕೆಟ್ ವೃತ್ತಿ ಬದುಕಿನ 500ನೇ ವಿಕೆಟ್ ಕಬಳಿಸಿ ವಿಶಿಷ್ಟ ಸಾಧನೆ ಮಾಡಿದರು.
