ದುಬೈ: ಮುಂಬೈ ಇಂಡಿಯನ್ಸ್ ತಂಡ ಕೊನೆಯ ಲೀಗ್ ಪಂದ್ಯವನ್ನು ಸೋತರೂ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಿಯಾಗಿ ಪ್ಲೇ ಆಫ್ ಪ್ರವೇಶಿಸಿದೆ. ಈ ಸರಣಿಯಲ್ಲಿ ಮುಂಬೈ ಯಶಸ್ಸಿಗೆ ಬುಮ್ರಾ ಪಾಲು ಸಾಕಷ್ಟಿದೆ. ಅವರು ಟೂರ್ನಿಯಲ್ಲಿ ಹಾಲಿ ಚಾಂಪಿಯನ್ ತಂಡ ಬೇಕೆಂದಾಗಲೆಲ್ಲಾ ವಿಕೆಟ್ ಪಡೆದಿದ್ದಾರೆ.
ಟೂರ್ನಿಯಲ್ಲಿ ಆಡಿರುವ 13 ಪಂದ್ಯಗಳಲ್ಲಿ 23 ವಿಕೆಟ್ ಪಡೆದು ಗರಿಷ್ಠ ವಿಕೆಟ್ ಪಡೆದವರ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿರುವ ಬುಮ್ರಾ, ಟೂರ್ನಿಯ ಮೊದಲ ಮೂರು ಪಂದ್ಯಗಳಲ್ಲಿ ವೈಫಲ್ಯ ಅನುಭವಿಸಿದ್ದರು. ಅವರು ಮೊದಲ ಪಂದ್ಯದಲ್ಲಿ ಸಿಎಸ್ಕೆ ವಿರುದ್ಧ 43ಕ್ಕೆ 1, 2ನೇ ಪಂದ್ಯದಲ್ಲಿ ಕೆಕೆಆರ್ ವಿರುದ್ಧ 32 ಹಾಗೂ ಆರ್ಸಿಬಿ ವಿರುದ್ಧ 42 ರನ್ ನೀಡಿ ದುಬಾರಿಯಾಗಿದ್ದರು. ಆದರೆ ನಾಲ್ಕನೇ ಪಂದ್ಯದಲ್ಲಿ ಗ್ರಿಪ್ ಕಂಡುಕೊಂಡ ವಿಶ್ವದ ಟಾಪ್ ಬೌಲರ್ಗಳಲ್ಲಿ ಒಬ್ಬರಾದ ಬುಮ್ರಾ ಅಲ್ಲಿಂದ ಹಿಂತಿರುಗಿ ನೋಡಲೇ ಇಲ್ಲ.
ಟೂರ್ನಿಯ ಮೊದಲಾರ್ಧದ ವೈಫಲ್ಯದ ಬಗ್ಗೆ ಮಾತನಾಡಿರುವ ಬುಮ್ರಾ, ಕೆಲವೊಮ್ಮೆ ಹವಾಮಾನ ಪರಿಸ್ಥಿತಿಗಳು ಯೋಜನೆಯಂತೆ ಬೌಲಿಂಗ್ ಮಾಡಲು ಪರಿಣಾಮ ಬೀರುತ್ತವೆ. ಮೊದಲಾರ್ಧದಲ್ಲಿ ತೀವ್ರವಾದ ಬೆವರುವಿಕೆ ಕಂಡುಬಂದಿದ್ದರಿಂದ ಯಾರ್ಕರ್ಗಳನ್ನು ಪ್ರಯೋಗಿಸುವುದು ಕಷ್ಟವಾಗುತ್ತಿತ್ತು. ಆದ್ದರಿಂದ ಯಾರ್ಕರ್ ಬಿಟ್ಟು ಇತರೆ ಎಸೆತಗಳ ಹಿಂದೆ ಬೀಳುವುದು ಅನಿವಾರ್ಯವಾಗಿತ್ತು ಎಂದು ಬುಮ್ರಾ ತಮ್ಮ ವೈಫಲ್ಯದ ಹಿಂದಿನ ಕಾರಣ ಬಹಿರಂಗಪಡಿಸಿದ್ದಾರೆ.
ಆದರೆ ವಾತಾವರಣ ಇದೀಗ ಬದಲಾಗಿದೆ. ಆದರೆ ನಾವು ಇಲ್ಲಿಗೆ ಆಗಮಿಸಿದ್ದ ವೇಳೆ ತುಂಬಾ ಉಷ್ಣಾಂಶವಿರುತ್ತಿತ್ತು. ಹಾಗಾಗಿ ಹೆಚ್ಚು ಬೆವರುವಿಕೆ ಕಂಡುಬರುತ್ತಿತ್ತು. ಆ ಸಮಯದಲ್ಲಿ ಬೌಲಿಂಗ್ ಮಾಡಿ ವಿಕೆಟ್ ಪಡೆಯುವುದು ಬೆಕ್ಕು-ಇಲಿಯ ಆಟದಂತಿತ್ತು. ಹಾಗಾಗಿ ಸಾಕಷ್ಟು ಅಭ್ಯಾಸ ಮಾಡಿ, ಬೇರೆ ಆಯ್ಕೆಗಳನ್ನು ಕಂಡುಕೊಳ್ಳುವುದು ಅನಿವಾರ್ಯವಾಗಿತ್ತು ಎಂದು ಬುಮ್ರಾ ಸಂದರ್ಶನವೊಂದರಲ್ಲಿ ತಮ್ಮ ಆರಂಭಿಕ ಸಂಕಷ್ಟಗಳನ್ನು ಹೇಳಿಕೊಂಡಿದ್ದಾರೆ.
ವೈಫಲ್ಯದ ನಂತರ ಬುಮ್ರಾ ಒದ್ದೆ ಚೆಂಡಿನಲ್ಲೇ ಅಭ್ಯಾಸ ಮಾಡಿ ಕೊನೆಗೂ ಲಯ ಕಂಡುಕೊಂಡಿದ್ದಾರೆ. ಈಗಾಗಲೇ ಹೆಚ್ಚು ವಿಕೆಟ್ ಪಡೆದವರ ಪಟ್ಟಿಯಲ್ಲಿ ರಬಾಡ(25) ನಂತರದ ಸ್ಥಾನದಲ್ಲಿದ್ದಾರೆ. ಗುರುವಾರ ಡೆಲ್ಲಿ ತಂಡದ ವಿರುದ್ಧ ಮುಂಬೈ ಕ್ವಾಲಿಫೈಯರ್ ಪಂದ್ಯವನ್ನಾಡಲಿದೆ.
