ರೋಹಿತ್​-ಮಯಾಂಕ್​ ಜೊತೆಯಾಟ; ಮುರಿದ 47 ವರ್ಷಗಳ ಹಿಂದಿನ ದಾಖಲೆ!

ಟೆಸ್ಟ್​​ ಪಂದ್ಯದಲ್ಲಿ ಆರಂಭಿಕರಾಗಿ ಕಣಕ್ಕಿಳಿದಿರುವ ರೋಹಿತ್​ ಶರ್ಮಾ ಹಾಗೂ ಮಯಾಂಕ್​ ಅಗರವಾಲ್​ ಜೋಡಿ 47 ವರ್ಷಗಳ ಟೆಸ್ಟ್​​ ಕ್ರಿಕೆಟ್​ನ ದಾಖಲೆ ಬ್ರೇಕ್​ ಮಾಡಿದೆ.

ವಿಶಾಖಪಟ್ಟಣಂ: ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಆರಂಭಿಕನಾಗಿ ಕಣಕ್ಕಿಳಿದ ರೋಹಿತ್​ ಶರ್ಮಾ ತಮ್ಮ ಸಾಮರ್ಥ್ಯ ಏನು? ಎಂಬುದನ್ನು ಕ್ರಿಕೆಟ್ ಲೋಕಕ್ಕೆ ತೋರಿಸಿದ್ದು, ಕ್ರೀಸಿನಲ್ಲಿದ್ದು ಉತ್ತಮ ಸಾಥ್​ ನೀಡಿರುವ ಮಯಾಂಕ್​​ ಕೂಡ ತಮ್ಮ ಬ್ಯಾಟಿಂಗ್​ ವೈಖರಿ ಮೂಲಕ ಕ್ಯಾಪ್ಟನ್​ ಮನಗೆದ್ದಿದ್ದಾರೆ. ಈ ಜೋಡಿ ಅಪರೂಪದ ದಾಖಲೆ ಸೃಷ್ಟಿಸಿದೆ.

ರೋಹಿತ್​ ಶರ್ಮಾ

1972ರಲ್ಲಿ ದೆಹಲಿಯಲ್ಲಿ ನಡೆದಿದ್ದ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಪಂದ್ಯದಲ್ಲಿ ಸುನಿಲ್ ಗವಾಸ್ಕರ್ ಮತ್ತು ರಾಮ್‌ನಾಥ್ ಪಾರ್ಕರ್ ಆರಂಭಿಕರಾಗಿ ಮೊದಲ ಪಂದ್ಯವನ್ನಾಡಿದ್ದರು. ಈ ವೇಳೆ ಪಾರ್ಕರ್ ಟೆಸ್ಟ್‌ ಪದಾರ್ಪಣೆ ಪಂದ್ಯವನ್ನಾಡಿದ್ದರೆ, ಗವಾಸ್ಕರ್ ಭಾರತದಲ್ಲಿ ಆರಂಭಿಕರಾಗಿ ಮೊದಲ ಪಂದ್ಯವನ್ನಾಡಿದ್ದರು. ಇದೀಗ ಆ ದಾಖಲೆ ಮುರಿದಿದ್ದು, ಮಯಾಂಕ್​ ಭಾರತದಲ್ಲಿ ಮೊದಲ ಟೆಸ್ಟ್​ ಪಂದ್ಯವನ್ನಾಡುತ್ತಿದ್ದರೆ, ರೋಹಿತ್​ ಆರಂಭಿಕರಾಗಿ ಕಣಕ್ಕಿಳಿದಿದ್ದಾರೆ.

ಮಯಾಂಕ್​ ಅಗರವಾಲ್​​

ಭಾರತದಲ್ಲಿ ಆರಂಭಿಕರಾಗಿ ಆಡಿದ ಚೊಚ್ಚಲ ಟೆಸ್ಟ್ ಪಂದ್ಯದಲ್ಲೇ ರೋಹಿತ್-ಮಯಾಂಕ್ ಜೋಡಿ ಉತ್ತಮ ಜೊತೆಯಾಟ ನೀಡಿದ್ದು, 59 ಓವರ್​ಗಳಲ್ಲಿ ಯಾವುದೇ ವಿಕೆಟ್​ ನಷ್ಟವಿಲ್ಲದೇ 202 ರನ್ ಗಳಿಸಿದೆ. ರೋಹಿತ್ ಅಜೇಯ 115 ರನ್​ ಹಾಗೂ ಮಯಾಂಕ್ ಅಜೇಯ 84 ರನ್ ಗಳಿಸಿದ್ದು ನಾಳೆ ಪಂದ್ಯ ಮುಂದುವರಿಯಲಿದೆ.