ನವದೆಹಲಿ : ಇಂಗ್ಲೆಂಡ್ ವಿರುದ್ಧ ಮುಂದಿನ ಟೆಸ್ಟ್ ಸರಣಿಯಲ್ಲಿ ಅತಿಥೇಯ ಭಾರತ ತಂಡ ಗೆಲ್ಲುವ ನೆಚ್ಚಿನ ತಂಡವಾಗಿದೆ. ತಂಡದಲ್ಲಿ ಅತ್ಯುತ್ತಮ ಗುಣಮಟ್ಟವುಳ್ಳ ವೇಗಿಗಳು, ಆಳವಾದ ಬ್ಯಾಟಿಂಗ್ ಲೈನ್ಅಪ್ ಮತ್ತು ಪ್ರವಾಸಿ ತಂಡಕ್ಕಿಂತ ಭಾರತದ ಆರಂಭಿಕ ಕ್ರಮಾಂಕ ಬಲಿಷ್ಠವಾಗಿದೆ ಎಂದು ಆಸ್ಟ್ರೇಲಿಯಾದ ಮಾಜಿ ನಾಯಕ ಇಯಾನ್ ಚಾಪೆಲ್ ತಿಳಿಸಿದ್ದಾರೆ.
ಆಸ್ಟ್ರೇಲಿಯಾ ವಿರುದ್ಧದ ಸರಣಿಯ ವೇಳೆ ಪಿತೃತ್ವ ರಜೆಯಲ್ಲಿದ್ದ ವಿರಾಟ್ ಕೊಹ್ಲಿ ಕೂಡ ಭಾರತ ತಂಡಕ್ಕೆ ಸೇರಿರುವುದರಿಂದ ತಂಡದ ಬ್ಯಾಟಿಂಗ್ ಲೈನ್ಅಪ್ ಕೂಡ ಬಲಿಷ್ಠವಾಗಿದೆ ಎಂಬುದು ಚಾಪೆಲ್ ಅಭಿಪ್ರಾಯವಾಗಿದೆ.
"ಎಲ್ಲಾ ಅಡೆತಡೆಗಳನ್ನು ನಿವಾರಿಸಿಕೊಂಡು ಆಸ್ಟ್ರೇಲಿಯಾ ವಿರುದ್ಧ ಬಾರ್ಡರ್ ಗವಾಸ್ಕರ್ ಸರಣಿ ಜಯಸಿರುವ ಭಾರತವು ಇಂಗ್ಲೆಂಡ್ ವಿರುದ್ಧ ಸರಣಿ ಗೆಲ್ಲುವ ನೆಚ್ಚಿನ ತಂಡವಾಗಿದೆ. ಅಲ್ಲದೆ ನೀವು ವಿರಾಟ್ ಕೊಹ್ಲಿ ಎಂಬ ಹೆಸರನ್ನು ಬ್ಯಾಟಿಂಗ್ ಕ್ರಮಾಂಕಕ್ಕೆ ಸೇರಿಸಿದಾಗ ಮತ್ತಷ್ಟು ಬಲಿಷ್ಠವಾಗಿದೆ" ಎಂದು ಚಾಪೆಲ್ ಇಎಸ್ಪಿಎನ್ ಕ್ರಿಕ್ ಇನ್ಫೋಗೆ ಬರೆದ ತಮ್ಮ ಅಂಕಣದಲ್ಲಿ ಉಲ್ಲೇಖಿಸಿದ್ದಾರೆ.
ಕೊಹ್ಲಿ ಜೊತೆಗೆ ಆರ್.ಆಶ್ವಿನ್, ಹಾರ್ದಿಕ್ ಪಾಂಡ್ಯ ಮತ್ತು ಇಶಾಂತ್ ಶರ್ಮಾ ಕೂಡ ಈ ಪಟ್ಟಿಯಲ್ಲಿರುವುದರಿಂದ ಭಾರತ ತಂಡ ಅಜೇಯವಾಗಿ ಕಾಣಿಸುತ್ತಿದೆ ಎಂದು ತಿಳಿಸಿದ್ದಾರೆ. ಶ್ರೀಲಂಕಾ ವಿರುದ್ಧ ಇಂಗ್ಲೆಂಡ್ 2-0ಯಲ್ಲಿ ಟೆಸ್ಟ್ ಸರಣಿ ಜಯಿಸಿದ್ದರೂ ಅಸಾಧಾರಣ ಟಾಪ್ ಆರ್ಡರ್ ಹೊಂದಿರುವ ತವರಿನ ತಂಡ ಮೇಲುಗೈ ಸಾಧಿಸಬಹುದು ಎಂದು ಚಾಪೆಲ್ ಅಭಿಪ್ರಾಯಪಟ್ಟಿದ್ದಾರೆ.
ಇಂಗ್ಲೆಂಡ್ ತಂಡಕ್ಕೆ ಬೆನ್ಸ್ಟೋಕ್ಸ್ ಸೇರ್ಪಡೆಯಿಂದ ಆಲ್ರೌಂಡ್ ವಿಭಾಗ ಬಲಿಷ್ಠವಾಗಲಿದೆ. ಜೊತೆಗೆ ಈಗಾಗಲೇ ಇರುವ ಶ್ರೇಷ್ಠ ವೇಗಿಗಳ ಜೊತೆಗೆ ಜೋಫ್ರಾ ಆರ್ಚರ್ ಸೇರಿರುವುದು ಬೌಲಿಂಗ್ ಗುಣಮಟ್ಟ ಹೆಚ್ಚಿಸಲಿದೆ. ಆದರೆ, ಅಗ್ರ ಕ್ರಮಾಂಕದ ಬ್ಯಾಟ್ಸ್ಮನ್ಗಳಲ್ಲಿ ಸ್ಥಿರತೆ ಕಾಣುತ್ತಿಲ್ಲ. ಸಿಬ್ಲೆ ಹಾಗೂ ಜಾಕ್ ಕ್ರಾಲೆ ಶ್ರೀಲಂಕಾದಲ್ಲಿ ವಿಫಲರಾಗಿದ್ದಾರೆ.
ಇದೀಗ ರೋರಿ ಬರ್ನ್ಸ್ ಸೇರ್ಪಡೆಯಾದ್ರೂ ಭಾರತದ ರೋಹಿತ್ ಶರ್ಮಾ, ಗಿಲ್ ಅಂತಹ ಆಟಗಾರರಿರುವ ಅಗ್ರ ಕ್ರಮಾಂಕದ ಮುಂದೆ ಅಷ್ಟೇನೂ ಪರಿಣಾಮಕಾರಿಯಾಗಿ ಕಾಣುವುದಿಲ್ಲ. ಈ ಆರಂಭಿಕ ಜೋಡಿ ಆಸ್ಟ್ರೇಲಿಯಾದ ವೇಗದ ಬೌಲಿಂಗ್ ದಾಳಿಯನ್ನು ಸಮರ್ಥವಾಗಿ ಎದುರಿಸಿರುವುದೇ ಇದಕ್ಕೆ ಸಾಕ್ಷಿ ಎಂದು ಚಾಪೆಲ್ ತಿಳಿಸಿದ್ದಾರೆ.
ಇನ್ನು, ಮಧ್ಯಮ ಕ್ರಮಾಂಕದಲ್ಲಿ ಎರಡು ತಂಡಗಳೂ ಸಮನಾಗಿ ಕಾಣುತ್ತವೆ. ಭಾರತ ತಂಡದಲ್ಲಿ ಪಾಂಡ್ಯ, ರಹಾನೆ ಮತ್ತು ಪಂತ್ ಬಲವಾಗಿದ್ದರೆ, ಇಂಗ್ಲೆಂಡ್ಗೆ ಬೆನ್ಸ್ಟೋಕ್ಸ್ ಮತ್ತು ಬಟ್ಲರ್ ಪ್ರಮುಖ ಅಸ್ತ್ರವಾಗಿದ್ದಾರೆ. ಒಂದು ವೇಳೆ ಗಾಯಾಳು ಆಲಿ ಪೋಪ್ ತಂಡ ಸೇರಿಕೊಂಡರೆ ತಂಡದ ಬಲ ಮತ್ತಷ್ಟು ಹೆಚ್ಚಾಗಲಿದೆ ಎಂದು ಚಾಪೆಲ್ ತಮ್ಮ ಅಂಕಣದಲ್ಲಿ ವಿಶ್ಲೇಷಣೆ ಮಾಡಿದ್ದಾರೆ.
ಎರಡು ತಂಡಗಳ ನಡುವಿನ ಟೆಸ್ಟ್ ಸರಣಿ ಫೆಬ್ರವರಿ 5ರಿಂದ ಚೆನ್ನೈನ ಎಂಎ ಚಿದಂಬರಂ ಸ್ಟೇಡಿಯಂನಲ್ಲಿ ಆರಂಭವಾಗಲಿದೆ, ಎರಡನೇ ಟೆಸ್ಟ್ ಕೂಡ ಇಲ್ಲೇ ಫೆಬ್ರವರಿ 13ರಂದು ನಡೆಯಲಿದೆ.
ಇದನ್ನು ಓದಿ: ವಿಶ್ವಶ್ರೇಷ್ಠ ವಿರಾಟನಿಗೆ ವೀಕ್ನೆಸ್ ಎಂಬುದೇ ಇಲ್ಲ, ಔಟ್ ಮಾಡುವುದೇಗೆ? : ಮೋಯಿನ್ ಅಲಿ
