ಲಂಡನ್:ಆಸ್ಟ್ರೇಲಿಯಾದ ಮಾಜಿ ನಾಯಕ ಸ್ಟಿವ್ ಸ್ಮಿತ್ ಗಾಯಗೊಂಡರೂ ಮತ್ತೆ ಆಟ ಆರಂಭಿಸಿ ತಮಗೆ ಕ್ರಿಕೆಟ್ ಆಟದ ಮೇಲಿರುವ ಬದ್ಧತೆಯನ್ನು ಇಡೀ ಕ್ರಿಕೆಟ್ ಜಗತ್ತಿಗೆ ತೋರಿಸಿಕೊಟ್ಟು ಶಹಬ್ಬಾಸ್ಗಿರಿ ಪಡೆದುಕೊಂಡಿದ್ದಾರೆ.
ಶನಿವಾರ ಆ್ಯಶಸ್ ಟೆಸ್ಟ್ ಸರಣಿಯ 2ನೇ ಪಂದ್ಯದಲ್ಲಿ ಜೋಫ್ರಾ ಆರ್ಚರ್ ಬೌಲಿಂಗ್ನಲ್ಲಿ ಸ್ಮಿತ್ ಎರಡು ಬಾರಿ ಗಂಭೀರವಾಗಿ ಗಾಯಗೊಂಡಿದ್ದರು. ಆದರೆ, ಎರಡೂ ಬಾರಿಯೂ ಚಿಕಿತ್ಸೆ ಪಡೆದು ಮತ್ತೆ ಆಟ ಮುಂದುವರಿಸುವ ಮೂಲಕ ಕ್ರಿಕೆಟ್ನ ಮೇಲಿನ ತಮ್ಮ ಬದ್ಧತೆಯನ್ನು ಕ್ರೀಡಾ ಜಗತ್ತಿಗೆ ತೋರಿಸಿಕೊಟ್ಟಿದ್ದಾರೆ.
ಜೋಫ್ರಾ ಆರ್ಚರ್ ಬೌಲಿಂಗ್ನಲ್ಲಿ ಮೊಣಕೈಗೆ ಬಾಲ್ ತಗುಲಿ ಮೊದಲು ಗಾಯಗೊಂಡಿದ್ದ ಸ್ಮಿತ್ ಚಿಕಿತ್ಸೆ ಪಡೆದು ಮತ್ತೆ ಆಟ ಮುಂದುವರಿಸಿದ್ದರು. ಮತ್ತೊಂದು ಬಾರಿ ಆರ್ಚರ್ ಬೌಲಿಂಗ್ನಲ್ಲೇ ಕುತ್ತಿಗೆಗೆ ಪೆಟ್ಟು ಬಿದ್ದು ಗಂಭೀರ ಗಾಯಗೊಂಡಿದ್ದ ಸ್ಮಿತ್ ಕೇವಲ 9 ಓವರ್ಗಳ ನಂತರ ಮತ್ತೆ ಕ್ರೀಸ್ಗೆ ಆಗಮಿಸಿ ಬ್ಯಾಟಿಂಗ್ ಮುಂದುವರಿಸಿದ್ದರು.
ಈ ಘಟನೆ ಕುರಿತು ಮಾತನಾಡಿರುವ ಕೋಚ್ ಜಸ್ಟಿನ್ ಲ್ಯಾಂಗರ್, ಸ್ಮಿತ್ಗಾಯದ ಘಟನೆ ನಮಗೆ ಫಿಲಿಪ್ ಹ್ಯೂಸ್ ಸಾವನ್ನು ನೆನೆಪಿಸಿತು. ಇಂತಹ ಸನ್ನಿವೇಶಗಳಲ್ಲಿ ತಮಾಷೆಯಾಗಿ ತೆಗೆದುಕೊಳ್ಳಲಾಗುವುದಿಲ್ಲ. ಹಾಗಾಗಿ ನಾವು ಹಲವು ಬಾರಿ ಸ್ಮಿತ್ರನ್ನು ಹೇಗಿದ್ದೀರಾ ಎಂದು ಕೇಳಿದೆ. ಆದರೆ ,ಅವರ ಉತ್ತರ ಒಂದೆ ಆಗಿತ್ತು, ಅದೇನೆಂದರೆ "ನಾನು ಚೆನ್ನಾಗಿದ್ದೇನೆ, ಮತ್ತೆ ಬ್ಯಾಟಿಂಗ್ ನಡೆಸುತ್ತೇನೆ" ಎಂಬುದು ಅವರ ಪ್ರತಿಕ್ರಿಯೆಯಾಗಿತ್ತು ಎಂದು ಲ್ಯಾಂಗರ್ ಸ್ಮಿತ್ ಕುರಿತು ಮಾಧ್ಯಮಕ್ಕೆ ತಿಳಿಸಿದರು.
ಎರಡನೇ ಬಾರಿ ಗಾಯಗೊಂಡಾಗ ಸ್ಮಿತ್ ಕುತ್ತಿಗೆಗೆ ಬಾಲ್ ಬಿದ್ದಿದ್ದು ನಮಗೆಲ್ಲ ಆಘಾತ ತಂದಿತ್ತು. ಆದರೆ, ಸ್ಮಿತ್ ಮಾತ್ರ ತಮ್ಮ ಮೊಣಕೈ ಗಾಯದ ಬಗ್ಗೆ ಚಿಂತೆ ಮಾಡುತ್ತಿದ್ದರು. ಅವರನ್ನು ಬ್ಯಾಟಿಂಗ್‌ಗೆ ಹೋಗುವುದು ಬೇಡ ಎಂದು ನಾನು ಹೇಳಿದ್ದೆ. ಆದರೆ, ಅವರು ಮೈದಾನದಲ್ಲಿ ಆಡದೆ ಗೌರವವಾಗಿ ಇಲ್ಲಿ ಕುಳಿತುಕೊಳ್ಳಲು ನಾನು ಬಯಸುವುದಿಲ್ಲ ಎಂದು ತಿಳಿಸಿದರು ಎಂದು ಸ್ಮಿತ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ ಕೋಚ್ ಲ್ಯಾಂಗರ್.
