ಕೋಲ್ಕತ್ತಾ: 2011ರಲ್ಲಿ ಐಸಿಸಿ ಏಕದಿನ ವಿಶ್ವಕಪ್ ಫೈನಲ್ನಲ್ಲಿ ಸಿಂಹಳೀಯರ ವಿರುದ್ಧ ಧೋನಿ ನೇತೃತ್ವದ ಟೀಂ ಇಂಡಿಯಾ 6ವಿಕೆಟ್ಗಳ ಭರ್ಜರಿ ಗೆಲುವು ದಾಖಲು ಮಾಡಿ, ಬರೋಬ್ಬರಿ 28 ವರ್ಷಗಳ ಬಳಿಕ ಏಕದಿನ ವಿಶ್ವಕಪ್ ಟ್ರೋಫಿಗೆ ಟೀಂ ಇಂಡಿಯಾ ಮುತ್ತಿಕ್ಕಿತ್ತು.
ಮುಂಬೈನ ವಾಂಖೆಡೆ ಮೈದಾನದಲ್ಲಿ ನಡೆದಿದ್ದ ಈ ಫೈನಲ್ ಪಂದ್ಯದಲ್ಲಿ ಟೀಂ ಇಂಡಿಯಾ ವಿಶ್ವಕಪ್ ಗೆದ್ದು ಈಗಾಗಲೇ ಬರೋಬ್ಬರಿ 8 ವರ್ಷಗಳ ಕಾಲ ಮುಗಿದು ಹೋಗಿವೆ. ಇದೀಗ ಅಂದಿನ ಆರಂಭಿಕ ಆಟಗಾರ ಗೌತಮ್ ಗಂಭೀರ್ ತಾವು ಶತಕ ವಚಿತರಾಗಲು ಏನು ಕಾರಣ ಎಂಬ ಹೊಸ ರಹಸ್ಯ ಹೊರಹಾಕಿದ್ದಾರೆ. ಫೈನಲ್ ಪಂದ್ಯದಲ್ಲಿ ಟೀಂ ಇಂಡಿಯಾ ಆರಂಭದಲ್ಲೇ ವಿರೇಂದ್ರ ಸೆಹ್ವಾಗ್ ಹಾಗೂ ಸಚಿನ್ ತೆಂಡೂಲ್ಕರ್ ವಿಕೆಟ್ ಕಳೆದುಕೊಂಡ್ರು, ಆರಂಭಿಕರಾಗಿ ಕಣಕ್ಕಿಳಿದಿದ್ದ ಗೌತಮ್ ಗಂಭೀರ್ 122 ಎಸೆತಗಳಲ್ಲಿ 97ರನ್ಗಳಿಕೆ ಮಾಡಿ ಟೀಂ ಇಂಡಿಯಾ ಗೆಲುವಿನಲ್ಲಿ ಬಹುಮುಖ್ಯ ಪಾತ್ರ ವಹಿಸಿದ್ದರು. ಆದರೆ ಇದೀಗ ತಾವು ಶತಕ ವಂಚಿತರಾಗಲು ಏನು ಕಾರಣ ಎಂಬ ರಹಸ್ಯ ಬಿಚ್ಚಿಟ್ಟಿದ್ದಾರೆ.
ಶ್ರೀಲಂಕಾ ನೀಡಿದ್ದ 275ರನ್ ಟಾರ್ಗೆಟ್ ಬೆನ್ನತ್ತಿದ್ದ ಗಂಭೀರ್ಗೆ ತಾವು ಮೈದಾನದಲ್ಲಿ ಎಷ್ಟು ರನ್ಗಳಿಕೆ ಮಾಡಿದ್ದೇನೆ ಎಂಬುದರ ಬಗ್ಗೆ ಅರಿವೇ ಇರಲಿಲ್ವಂತೆ. ನಾನು 97ರನ್ಗಳಿಕೆ ಮಾಡಿದ್ದಾಗ ನನ್ನ ಬಳಿ ಬಂದ ಧೋನಿ ನೀನು ಈಗ 97ರನ್ಗಳಿಕೆ ಮಾಡಿದ್ದು, ಇನ್ನು ಮೂರು ರನ್ ಹೊಡೆದ್ರೆ ಶತಕಗಳಿಸುತ್ತೀಯಾ ಎಂದಿದ್ದರು. ಆ ವೇಳೆ ನನಗೆ ವೈಯಕ್ತಿಕ ರನ್ಗಳಿಕೆ ಮಾಡುವುದರ ಮೇಲೆ ಹೆಚ್ಚು ಗಮನ ಹೋಯ್ತು. ಇದೇ ಕಾರಣಕ್ಕಾಗಿ ನಾನು ಒತ್ತಡಕ್ಕೊಳಗಾಗಿ ಅದೇ ಓವರ್ನಲ್ಲಿ ವಿಕೆಟ್ ಒಪ್ಪಿಸಿದೆ ಎಂದು ತಿಳಿಸಿದ್ದಾರೆ.
ಒಂದು ವೇಳೆ ಧೋನಿ ನನಗೆ ಆ ವೇಳೆ ನೆನಪು ಮಾಡದೇ ಹೋಗಿದ್ದರೆ ನಾನು ಶತಕ ಸಿಡಿಸುತ್ತಿದ್ದೆ. ಜತೆಗೆ ನನ್ನ ಕ್ರಿಕೆಟ್ ಜೀವನ ಮತ್ತಷ್ಟು ಸುಂದರವಾಗಿ ಇರುತ್ತಿತ್ತು ಎಂದು ನೆನಪು ಮಾಡಿಕೊಂಡಿರುವ ಗಂಭೀರ್, ಸುಮಾರು 8 ವರ್ಷಗಳ ಬಳಿಕ ಈ ರೀತಿಯ ಹೇಳಿಕೆ ನೀಡಿದ್ದಾರೆ.
