ನವದೆಹಲಿ: ವಿಶ್ವ ಕ್ರಿಕೆಟ್ನಲ್ಲಿ ಅತ್ಯುತ್ತಮ ವಿಕೆಟ್ ಕೀಪರ್ ಯಾರು ಎಂದ ತಕ್ಷಣ ಕಣ್ಣ ಮುಂದೆ ಬರುವವರೆ ಆಸ್ಟ್ರೇಲಿಯಾದ ಮಾಜಿ ವಿಕೆಟ್ ಕೀಪರ್ ಆ್ಯಂಡಂ ಗಿಲ್ಕ್ರಿಸ್ಟ್. ಆದರೆ, ಅವರ ಪ್ರಕಾರ ಅತ್ಯುತ್ತಮ ವಿಕೆಟ್ ಕೀಪರ್ ಭಾರತದ ಎಂಎಸ್ ಧೋನಿಯಾಗಿದ್ದಾರೆ.
ಟಿವಿ ನಿರೂಪಕಿ ಮಡೋನಾ ಟಿಕ್ಸೀರಾ ಅವರೊಂದಿಗೆ ನಡೆಸಿದ ಇನ್ಸ್ಟಾಗ್ರಾಂ ಲೈವ್ ಸಂವಾದದಲ್ಲಿ ಗಿಲ್ಕ್ರಿಸ್ಟ್ಗೆ ಮಡೋನಾ, ಧೋನಿ, ದಕ್ಷಿಣ ಆಫ್ರಿಕಾ ಮಾರ್ಕ್ ಬೌಷರ್, ಶ್ರೀಲಂಕಾದ ಕುಮಾರ್ ಸಂಗಕ್ಕಾರ, ಕಿವೀಸ್ನ ಬ್ರೆಂಡನ್ ಮೆಕಲಮ್ ಇವರಲ್ಲಿ ಯಾರು ಅತ್ಯುತ್ತಮ ವಿಕೆಟ್ ಕೀಪರ್ ಎಂದು ಪ್ರಶ್ನಿಸಿದ್ದಕ್ಕೆ ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಎಂಎಸ್ ಧೋನಿಯನ್ನು ಹೆಸರಿಸಿದ್ದಾರೆ.
ನಾನು ಬಹಳಷ್ಟು ಭಾರತೀಯರ ಬೆಂಬಲದೊಂದಿಗೆ ಒಬ್ಬ ಭಾರತೀಯನ ಬಗ್ಗೆ ಮಾತನಾಡುತ್ತಿದ್ದೇನೆ ಎಂದು ಅರ್ಥಮಾಡಿಕೊಂಡಿದ್ದೇನೆ. ಆದ್ದರಿಂದ ಸಹಜವಾಗಿ ಧೋನಿ ಸಂಗಕ್ಕಾರ, ಬ್ರೆಂಡನ್ ಮೆಕಲಮ್ಗಿಂತ ಅತ್ಯುತ್ತಮ ವಿಕೆಟ್ ಕೀಪರ್ ಆಗಿದ್ದಾರೆ ಎಂದು ಅವರು ಉತ್ತರಿಸಿದ್ದಾರೆ.
ಭಾರತಕ್ಕೆ ಧೋನಿ ಕೊಡುಗೆ ಸಾಕಷ್ಟಿದೆ. ಅವರ ವೃತ್ತಿ ಜೀವನದ ಬೆಳೆವಣಿಗೆಯನ್ನು ನೋಡಲು ಇಷ್ಟಪಡುತ್ತೇನೆ. ಧೋನಿ ಒಬ್ಬ ಅದ್ಭುತ ಶೈಲಿಯ ಕ್ರಿಕೆಟ್ ಹುಟ್ಟುಹಾಕಿದರು. ಅದನ್ನು ಎಲ್ಲರೂ ಇಷ್ಟ ಪಟ್ಟರು ಹಾಗೂ ಅನುಸರಿಸಲು ಮುಂದಾದರು. ಅವರು ಕ್ರಿಕೆಟ್ನಲ್ಲಿ ತಮ್ಮನ್ನು ತಾವೂ ನಿರ್ವಹಿಸಿಕೊಂಡ ರೀತಿ ಅದ್ಭುತವಾದದ್ದು ಎಂದು ಗಿಲ್ಕ್ರಿಸ್ಟ್ ಬಣ್ಣಿಸಿದ್ದಾರೆ.
ಇನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಬಲಿ ಪಡೆದ ದಾಖಲೆ ದಕ್ಷಿಣ ಆಫ್ರಿಕಾದ ಮಾರ್ಕ್ ಬೌಷರ್ ಹೆಸರಿನಲ್ಲಿದೆ. ಅವರು ಒಟ್ಟಾರೆ ವೃತ್ತಿ ಜೀವನದಲ್ಲಿ 998 ಮಂದಿಯನ್ನು ಪೆವಿಲಿಯನ್ಗಟ್ಟಿದ್ದಾರೆ. 2ನೇ ಸ್ಥಾನದಲ್ಲಿ ಗಿಲ್ಕ್ರಿಸ್ಟ್ ಇದ್ದು, 905 ಬಲಿ ಪಡೆದಿದ್ದಾರೆ. ಮೂರನೇ ಸ್ಥಾನದಲ್ಲಿ ಎಂಎಸ್ ಧೋನಿ ಇದ್ದಾರೆ. ಅವರು 829 ಬಲಿ ಪಡೆದಿದ್ದಾರೆ. ಆದರೆ, ಸ್ಟಂಪಿಂಗ್ ವಿಚಾರದಲ್ಲಿ ಧೋನಿ ಎಲ್ಲ ವಿಕೆಟ್ ಕೀಪರ್ಗಿಂತಲೂ ಭಾರಿ ಮುಂದಿದ್ದಾರೆ. ಧೋನಿ ಒಟ್ಟಾರೆ 195 ಸ್ಟಂಪ್ ಔಟ್ ಮಾಡಿದ್ದಾರೆ. ಧೋನಿ ಬಿಟ್ಟರೆ ಸಂಗಕ್ಕಾರ(139) ಹಾಗೂ ಕಲುವಿತರಣ್(101) ಹೆಚ್ಚು ಸ್ಟಂಪಿಂಗ್ ಮಾಡಿರುವ ವಿಕೆಟ್ ಕೀಪರ್ಗಳಾಗಿದ್ದಾರೆ.
