ಆಗ್ರಾ(ಯು.ಪಿ): ಸೇನೆಯಲ್ಲಿ ಕಾರ್ಯ ನಿರ್ವಹಿಸಿ ನಿವೃತ್ತರಾಗಿರುವ ಧ್ರುವ್ ಚಂದ್ ಜುರೆಲ್ ಅವರ ತಂದೆ, ತಮ್ಮ ಮಗ ಕೂಡಾ ಸೇನೆಯಲ್ಲಿ ಅಧಿಕಾರಿಯಾಗಬೇಕೆಂಬ ಆಸೆ ಹೊಂದಿದ್ದರು. ಅದೇ ರೀತಿ ಅವರನ್ನು ಬೆಳೆಸಿದ್ದರು. ಆದ್ರೆ ಇಂದು ಧ್ರುವ್ ಭಾರತದ ಅಂಡರ್ 19 ಕ್ರಿಕೆಟ್ ತಂಡಕ್ಕೆ ನಾಯಕನಾಗಿದ್ದಾರೆ.
ಧ್ರುವ್ಗೆ ತನ್ನ 9ನೇ ವಯಸ್ಸಿನಲ್ಲೇ ಕ್ರಿಕೆಟ್ನತ್ತ ಆಸಕ್ತಿ ಮೂಡಿತು. ಆತನ ಆಟ ನೋಡಿದ ಜನ ಕೂಡಾ ಆತನನ್ನು ಪ್ರೋತ್ಸಾಹಿಸಿದರು.
ಕ್ರಿಕೆಟ್ ಕುರಿತು ಧ್ರುವ್ನ ಆಸಕ್ತಿ ಗಮನಿಸಿದ ತಂದೆ, ಆತನಿಗೆ ಸೂಕ್ತ ತರಬೇತಿ ಕೊಡಿಸಿದರು. ಬಳಿಕ ಕ್ರಿಕೆಟ್ ಅಕಾಡೆಮಿ ಸೇರಿದ್ದ ಧ್ರುವ್ ಚಂದ್ ಜುರೆಲ್ ಉತ್ತಮ ಕ್ರಿಕೆಟ್ ಆಟಗಾರನಾಗಿ ಬೆಳೆದು ನಿಂತರು. ತಮ್ಮ ಮಗನನ್ನು ಸೇನೆಗೆ ಸೇರಿಸಬೇಕೆಂಬ ಆಸೆ ಹೊಂದಿದ್ದ ತಂದೆ-ತಾಯಿ ಇದೀಗ ಆತನನ್ನು ಕ್ರಿಕೆಟರ್ ಆಗಿ ಕಾಣುತ್ತಿದ್ದಾರೆ.
ಅಂಡರ್ 19 ಏಷಿಯಾ ಕಪ್ನ ಭಾರತ ಕ್ರಿಕೆಟ್ ತಂಡಕ್ಕೆ ಧ್ರುವ್ ಅವರನ್ನು ಕ್ಯಾಪ್ಟನ್ ಆಗಿ ಬಿಸಿಸಿಐ ಆಯ್ಕೆ ಮಾಡಿದೆ. ಈಟಿವಿ ಭಾರತದೊಂದಿಗೆ ಮಾತನಾಡಿರುವ ಧ್ರುವ್ ತಂದೆ ನೇಮ್ ಸಿಂಗ್, ತಾಯಿ ರಜನಿ ಹಾಗೂ ಅಕ್ಕ ನೀರೂ ಈ ಕುರಿತು ಹರ್ಷ ವ್ಯಕ್ತಪಡಿಸಿದ್ದಾರೆ.
ಕಾರ್ಗಿಲ್ ಯುದ್ಧದಲ್ಲಿ ಹೋರಾಡಿದ್ದ ಸೈನಿಕನ ಮಗ ಧ್ರುವ್:
ಧ್ರುವ್ ತಂದೆ ಸೇನೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಕಾರ್ಗಿಲ್ ಯುದ್ಧದಲ್ಲಿಯೂ ಹೋರಾಡಿದ್ದರು. ತಮ್ಮ ಮಗನೂ ಸೇನೆಗೆ ಸೇರಬೇಕೆಂಬ ಆಸೆ ಹೊಂದಿದ್ದರು. ಹಾಗಾಗಿ ಆರ್ಮಿ ಸ್ಕೂಲ್ನಲ್ಲಿ ಮಗನಿಗೆ ವಿದ್ಯಾಭ್ಯಾಸ ಕೊಡಿಸಿದ್ದರು. ಆದ್ರೆ ರಜಾದಿನಗಳಲ್ಲಿ ಕ್ರಿಕೆಟ್ ಆಡಲು ಪ್ರಾರಂಭಿಸಿದ್ದ ಧ್ರುವ್ಗೆ ಕ್ರಿಕೆಟ್ನಲ್ಲಿ ಆಸಕ್ತಿ ಮೂಡಿತ್ತು. ಆದರೂ ಶಿಕ್ಷಣ ಹಾಗೂ ಕ್ರಿಕೆಟ್ ಎರಡನ್ನೂ ಸರಿದೂಗಿಸಿಕೊಂಡು, ಕ್ರಿಕೆಟ್ ಅಭ್ಯಾಸ ನಡೆಸಿದರು. ಇದೀಗ ಅಂಡರ್ 19 ಏಷ್ಯಾ ಕಪ್ನ ಭಾರತ ಕ್ರಿಕೆಟ್ ತಂಡಕ್ಕೆ ನಾಯಕನಾಗಿ ಧ್ರುವ್ ಆಯ್ಕೆಯಾಗಿರುವುದು ಖುಷಿ ನೀಡಿದೆ. ಸೈನಿಕರು ದೇಶದ ಗಡಿಯಲ್ಲಿ ದೇಶಸೇವೆ ಸಲ್ಲಿಸಿದರೆ, ತಮ್ಮ ಮಗ ಕ್ರಿಕೆಟ್ ಮೂಲಕ ದೇಶದ ಸೇವೆ ಮಾಡುತ್ತಿದ್ದಾನೆ ಎಂದು ತಂದೆ ನೇಮ್ ಸಿಂಗ್ ಸಂತಸ ವ್ಯಕ್ತಪಡಿಸಿದ್ದಾರೆ.
ಧೋನಿ ಪ್ರೇರಣೆ:
ಕ್ರಿಕೆಟ್ನಲ್ಲಿ ಧ್ರುವ್ನ ಆಸಕ್ತಿ ನೋಡಿ ನಾನು ಕೂಡ ಪ್ರೋತ್ಸಾಹಿಸಿದೆ. ಧ್ರುವ್ ಧೋನಿಯಂತಯೇ ಆಡುತ್ತಿದ್ದಾನೆ. ಅಂಡರ್ 19 ಕ್ರಿಕೆಟ್ ತಂಡಕ್ಕೆ ಧ್ರುವ್ ನಾಯಕನಾಗಿರುವುದು ಖುಷಿಯಾಗಿದೆ ಎನ್ನುತ್ತಾರೆ ಅವರ ತಾಯಿ ರಜನಿ.
ಇನ್ನು ಧ್ರುವ್ ಮನೆಯಲ್ಲಿ ಕ್ರಿಕೆಟ್ ಕುರಿತು ಹೆಚ್ಚು ಮಾತನಾಡದಿದ್ದರೂ, ಮೈದಾನದಲ್ಲಿ ಉತ್ತಮವಾಗಿ ಆಡುತ್ತಾನೆ. ಎಂ. ಎಸ್. ಧೋನಿಯ ನಾಯಕತ್ವ ಗುಣಗಳು ಧ್ರುವ್ನಲ್ಲಿವೆ. ಧೋನಿಯೇ ಆತನ ಪ್ರೇರಣೆ ಎಂದು ಧ್ರುವ್ ಅಕ್ಕ ನೀರೂ ಹೇಳುತ್ತಾರೆ.
