ಕೋಲ್ಕತ್ತಾ: ಬಂಗಾಳ ವಿರುದ್ಧದ ಸಿ.ಕೆ.ನಾಯ್ಡು ಟ್ರೋಫಿ ಪಂದ್ಯದ ಹಿಂದಿನ ದಿನ ನಗರದ ಹೋಟೆಲ್‌ನ ಮಹಿಳಾ ಸಿಬ್ಬಂದಿಯೊಂದಿಗೆ ಅನುಚಿತವಾಗಿ ವರ್ತಿಸಿದ ಆರೋಪದ ಮೇಲೆ ಇಬ್ಬರು ದೆಹಲಿ ಅಂಡರ್-23 ಆಟಗಾರರನ್ನು ದೆಹಲಿ ಮತ್ತು ಜಿಲ್ಲಾ ಕ್ರಿಕೆಟ್ ಅಸೋಸಿಯೇಷನ್ (ಡಿಡಿಸಿಎ) ವಾಪಸ್ ಕರೆಸಿಕೊಂಡಿದೆ.
ಕುಲ್ದೀಪ್ ಯಾದವ್ ಮತ್ತು ಲಕ್ಷಯ್ ತಾರೆಜ ಎಂಬ ಇಬ್ಬರು ಕ್ರಿಕೆಟಿಗರ ಮೇಲೆ ಈ ಆರೋಪ ಕೇಳಿ ಬಂದಿದೆ. ಈ ಬಗ್ಗೆ ಮಾತನಾಡಿರುವ ಡಿಡಿಸಿಎ ಕಾರ್ಯದರ್ಶಿ ವಿನೋದ್ ತಿಹರಾ, ಘಟನೆ ನಡೆದಾಗ ನಾನು ಅಲ್ಲಿ ಇರಲಿಲ್ಲ, ಆದರೆ ಸಂಜಯ್ ಭರದ್ವಾಜ್ ಅಲ್ಲಿದ್ದರು. ಅವರು ದೆಹಲಿಗೆ ಹಿಂದಿರುಗಿದ ನಂತರ ಏನಾಗಿದೆ ಎಂದು ತಿಳಿಯಲಿದೆ. ಸದ್ಯ ಇಬ್ಬರು ಕ್ರಿಕೆಟಿಗರನ್ನ ವಾಪಸ್ ಕರೆಸಿಕೊಳ್ಳಲಾಗಿದ್ದು, ಈ ವಿಷಯವನ್ನು ಶಿಸ್ತು ಸಮಿತಿಯು ಪರಿಶೀಲಿಸಲಿದೆ ಎಂದಿದ್ದಾರೆ.
ಈ ಬಗ್ಗೆ ಮಾತನಾಡಿರುವ ಮತ್ತೊಬ್ಬ ಅಧಿಕಾರಿ, ಹೋಟೆಲ್ನಲ್ಲಿ ಮಹಿಳೆಯರೊಂದಿಗೆ ಇಬ್ಬರು ಆಟಗಾರರು ಅನುಚಿತವಾಗಿ ವರ್ತಿಸಿದ್ದಾರೆ ಎಂದು ಹೇಳಲಾಗುತ್ತಿದೆ. ಆಟಗಾರರು ಕಾರಿಡಾರ್‌ನಲ್ಲಿ ಜೋರಾಗಿ ಮಾತನಾಡುತ್ತಿದ್ದರು. ತಮಾಷೆಗಾಗಿ ಒಂದೆರಡು ರೂಮ್ಗಳ ಬಾಗಿಲುಗಳನ್ನು ತಟ್ಟಿದ್ದಾರೆ. ಇದಕ್ಕಿಂತ ಹೆಚ್ಚೇನು ನಡೆದಿಲ್ಲ. ತನಿಖೆ ನಡೆದ ನಂತರ ಆಟಗಾರರನ್ನು ದೀರ್ಘಕಾಲದವರೆಗೆ ಅಮಾನತುಗೊಳಿಸಬಹುದು ಎಂದಿದ್ದಾರೆ.
