ಮೆಲ್ಬೋರ್ನ್ : ಕೋವಿಡ್-19 ಭೀತಿಯಿಂದ ಈ ವರ್ಷದ ಕೊನೆಯಲ್ಲಿ ಭಾರತ ಕ್ರಿಕೆಟ್ ತಂಡ ಆಸ್ಟ್ರೇಲಿಯಾ ಪ್ರವಾಸ ಕೈಗೊಳ್ಳಲು ಸಾಧ್ಯವಾಗದಿದ್ರೆ, ಇದರಿಂದಾಗುವ ನಷ್ಟವನ್ನ ತುಂಬುವುದಕ್ಕಾಗಿ ಆಸ್ಟ್ರೇಲಿಯಾ ಕ್ರಿಕೆಟ್ ಮಂಡಳಿ 50 ಮಿಲಿಯನ್ ಅಮೆರಿಕನ್ ಡಾಲರ್( ₹ 380 ಕೋಟಿ )ಸಾಲ ಪಡೆದಿದೆ.
ಆಸ್ಟ್ರೇಲಿಯಾದ ದಿನಪತ್ರಿಕೆ ವರದಿಯ ಪ್ರಕಾರ ಕಾಮನ್ವೆಲ್ತ್ ಬ್ಯಾಂಕ್ನಿಂದ ಕ್ರಿಕೆಟ್ ಆಸ್ಟ್ರೇಲಿಯಾ ₹380 ಕೋಟಿ ಮೊತ್ತದ ಸಾಲವನ್ನು ಪಡೆದುಕೊಂಡಿದೆ. ಆರ್ಥಿಕ ಬಿಕ್ಕಟ್ಟಿನಿಂದಾಗಿ ಕಳೆದ ತಿಂಗಳು ತನ್ನ ಶೇ .80 ರಷ್ಟು ಸಿಬ್ಬಂದಿಯನ್ನು ಕೆಲಸದಿಂದ ತೆಗೆದು ಹಾಕುವ ಆಡಳಿತ ಮಂಡಳಿಯ ನಿರ್ಧಾರ ಹೊಸ ಪ್ರಶ್ನೆಗಳನ್ನು ಹುಟ್ಟುಹಾಕಿತ್ತು.
ಆಸ್ಟ್ರೇಲಿಯಾ ಕ್ರಿಕೆಟ್ ಮಂಡಳಿಯಲ್ಲಿ 200ಕ್ಕೂ ಹೆಚ್ಚು ಮಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಜೂನ್ ಅಂತ್ಯದವರೆಗೆ ಶೇ.20ರಷ್ಟು ವೇತನವನ್ನು ಕಡಿತಗೊಳಿಸಿದ್ದರು. ಅಗಸ್ಟ್ ವೇಳೆ ಮಂಡಳಿಯ ಹಣವೆಲ್ಲಾ ಕಾಲಿಯಾಗಬಹದು ಎಂಬ ಭಯದಿಂದ ವೇತನ ಕಡಿತ ನಿರ್ಧಾರ ತೆಗೆದುಕೊಳ್ಳಲಾಗಿತ್ತು. ಈ ನಿರ್ಧಾರದಿಂದ ಆಸ್ಟ್ರೇಲಿಯಾ ಕ್ರಿಕೆಟ್ ಬೋರ್ಡ್ 3 ಮಿಲಿಯನ್ ಯುಎಸ್ಡಿ(22.7 ಕೋಟಿ ರೂ) ಹಣ ಉಳಿತಾಯ ಮಾಡಿತ್ತು. ಇದೀಗ ಮುಂಜಾಗ್ರತಾ ಕ್ರಮವಾಗಿ ಮಂಡಳಿ 50 ಮಿಲಿಯನ್ ಯುಎಸ್ಡಿ(380 ಕೋಟಿ) ಸಾಲ ಪಡೆದುಕೊಂಡಿದೆ.
ಸಿಎ ಸಿಇಒ ಕೆವಿನ್ ರಾಬರ್ಟ್ ಸ್ವತಃ ಶೇ80ರಷ್ಟನ್ನು ಮಾತ್ರ ವೇತನ ಪಡೆಯುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಕ್ರಿಕೆಟ್ ಅಸೋಸಿಯೇಷನ್ ಜೊತೆಗೆ ಮಾತುಕತೆ ನಡೆಸಿ ಶೇ.20 ರಷ್ಟಿರುವ ಕಡಿತವನ್ನು 25ಕ್ಕೆ ಏರಿಸುವ ಚಿಂತನೆ ನಡೆಸಿದ್ದಾರೆ. ಆಸ್ಟ್ರೇಲಿಯಾ ಕ್ರಿಕೆಟ್ ಮಂಡಳಿ ಕೋವಿಡ್-19 ಹಿನ್ನೆಲೆ 300 ಮಿಲಿಯನ್ ಆಸ್ಟ್ರೇಲಿಯನ್ ಡಾಲರ್ ಮೊತ್ತ ಕಳೆದುಕೊಂಡಿದೆ. ಭಾರತ ಡಿಸೆಂಬರ್ನಲ್ಲಿ ಆಸ್ಟ್ರೇಲಿಯಾ ಪ್ರವಾಸ ಕೈಗೊಂಡರೆ ಹಣವಿಲ್ಲದೆ ನರಳಾಡುತ್ತಿರುವ ಸಿಎ ಬೋರ್ಡ್ಗೆ ಪರಿಹಾರ ಸಿಕ್ಕಂತಾಗುತ್ತದೆ.
