ನವದೆಹಲಿ: ಆಗಸ್ಟ್ 18 ರಿಂದ ಕೆರಿಬಿಯನ್ ಪ್ರೀಮಿಯರ್ ಲೀಗ್ (ಸಿಪಿಎಲ್ 2020) ಆರಂಭಗೊಳ್ಳಲಿದೆ. ಕೋವಿಡ್ -19 ನಂತರ ನಡೆಯುವ ಮೊದಲ ಪ್ರಮುಖ ಟಿ 20 ಲೀಗ್ ಇದಾಗಿದೆ. 33 ಪಂದ್ಯಗಳ ಟೂರ್ನಿಯನ್ನು ಟ್ರಿನಿಡಾಡ್ ಮತ್ತು ಟೊಬಾಗೊ ಸ್ಟೇಡಿಯಂನಲ್ಲಿ ನಡೆಸಲು ನಿರ್ಧರಿಸಲಾಗಿದೆ. ಈ ಎರಡು ಕ್ರೀಡಾಂಗಣಗಳಲ್ಲಿ ಇಡೀ ಕ್ರೀಡಾಕೂಟವನ್ನ ಆಯೋಜಿಸಲಾಗಿದೆ.
ಸಿಪಿಎಲ್ - 2020 ರ ಮೊದಲ ಪಂದ್ಯ ಕಳೆದ ವರ್ಷದ ರನ್ನರ್ ಅಪ್ ಆಗಿದ್ದ ಗಯಾನಾ ಅಮೆಜಾನ್ ವಾರಿಯರ್ಸ್ ಹಾಗೂ ಟ್ರಿನ್ಬಾಗೊ ನೈಟ್ ರೈಡರ್ಸ್ ನಡುವೆ ನಡೆಯಲಿದೆ. ಈ ಟೂರ್ನಿಯಲ್ಲಿ ಈ ಬಾರಿ ಈ ಐದು ಆಟಗಾರರ ಮೇಲೆ ಹೆಚ್ಚಿನ ನಿರೀಕ್ಷೆ ಇಡಲಾಗಿದೆ.
ಕ್ರಿಸ್ ಲಿನ್ (ಸೇಂಟ್ ಕಿಟ್ಸ್ ಆ್ಯಂಡ್ ನೆವಿಸ್ ಪೆಟ್ರಾ ವೋಡ್ಸ್ )
![ಕ್ರಿಸ್ ಲಿನ್](https://etvbharatimages.akamaized.net/etvbharat/prod-images/lynn_1108newsroom_1597107415_109.jpg)
ಟಿ-20 ಕ್ರಿಕೆಟ್ನಲ್ಲಿ ಅಪಯಾಯಕಾರಿ ಬ್ಯಾಟ್ಸ್ಮನ್ ಎಂದು ಗುರುತಿಸಿಕೊಂಡಿರುವ ಲಿನ್ ಈ ಬಾರಿ ಮತ್ತೆ ಸಿಪಿಎಲ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಕ್ರಿಸ್ ಲಿನ್ ಈ ಹಿಂದೆ ಜಮೈಕಾ ತಲ್ಲವಾಸ್, ಗಯಾನಾ ಅಮೆಜಾನ್ ವಾರಿಯರ್ಸ್ ಮತ್ತು ಟ್ರಿನ್ಬಾಗೊ ನೈಟ್ ರೈಡರ್ಸ್ ತಂಡದಲ್ಲಿ ಕಾಣಿಸಿಕೊಂಡಿದ್ದರು. ಈ ವರ್ಷದ ಒಂದು ರೀತಿಯ ವರ್ಚುವಲ್ ಸಿಪಿಎಲ್ 2020 ಡ್ರಾಫ್ಟ್ನಲ್ಲಿ ತಂಡಕ್ಕೆ ಮಾರಾಟವಾದ ನಂತರ ಈ ಬಾರಿ ಲಿನ್ ಸೇಂಟ್ ಕಿಟ್ಸ್ ಆ್ಯಂಡ್ ನೆವಿಸ್ ಪೆಟ್ರಾ ವೋಡ್ಸ್ ತಂಡದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಆಸ್ಟ್ರೇಲಿಯಾದ ಈ ಬ್ಯಾಟ್ಸ್ಮನ್ ಟಿ 20 ಗಳಲ್ಲಿ 144.15 ರ ಮಾರಕ ಸ್ಟ್ರೈಕ್ ರೇಟ್ ಹೊಂದಿದ್ದಾರೆ. ಯಾವುದೇ ಪರಿಸ್ಥಿತಿಯಲ್ಲಿ ತಂಡಕ್ಕೆ ಜಯ ತಂದುಕೊಡುವ ಸಾಮರ್ಥ್ಯ ಹೊಂದಿದ್ದಾರೆ.
ಓಶೇನ್ ಥಾಮಸ್ (ಜಮೈಕಾ ತಲ್ಲವಾಸ್)
![ಓಶೇನ್ ಥಾಮಸ್](https://etvbharatimages.akamaized.net/etvbharat/prod-images/oshane_1108newsroom_1597107415_449.jpg)
ಈ ಸೀಸನ್ನಲ್ಲಿ ಜಮೈಕಾ ತಲ್ಲವಾಸ್ ಉಳಿಸಿಕೊಂಡ 5 ಆಟಗಾರರಲ್ಲಿ 23 ವರ್ಷದ ಓಶೇನ್ ಥಾಮಸ್ ಸೇರಿದ್ದಾರೆ. 2017 ರಲ್ಲಿ ಸಿಪಿಎಲ್ ಗೆ ಕಾಲಿಟ್ಟ ಥಾಮಸ್ 2018ರ ಆವೃತ್ತಿಯಲ್ಲಿ 10 ಪಂದ್ಯಗಳಲ್ಲಿ 18 ವಿಕೆಟ್ ಪಡೆದು ಆ ಸೀಸನ್ ನಲ್ಲಿ ಎರಡನೇ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಎನಿಸಿಕೊಂಡರು. ಈ ವರ್ಷ ಕಾರು ಅಪಘಾತದಲ್ಲಿ ಸಿಲುಕಿ ಗಂಭೀರ ಗಾಯದಿಂದ ಪಾರಾಗಿದ್ದರು. ಈ ಬಾರಿಯ ಟೂರ್ನಿಯಲ್ಲಿ ಇವರ ಮೇಲೆ ತಂಡ ಹೆಚ್ಚಿನ ನಿರೀಕ್ಷೆ ಇಟ್ಟುಕೊಂಡಿದೆ.
ಜೇಸನ್ ಹೋಲ್ಡರ್ (ಬಾರ್ಬಡೋಸ್ ಟ್ರೈಡೆಂಟ್)
![ಜೇಸನ್ ಹೋಲ್ಡರ್](https://etvbharatimages.akamaized.net/etvbharat/prod-images/jason-holder_1108newsroom_1597107415_151.jpg)
ವೆಸ್ಟ್ ಇಂಡೀಸ್ ಕ್ರಿಕೆಟ್ನ ಅದ್ಭುತ ಆಲ್ ರೌಂಡರ್. ಬ್ಯಾಟಿಂಗ್ ಮತ್ತು ಬೌಲಿಂಗ್ನಲ್ಲಿ ತಮ್ಮ ಸಾಮರ್ಥ್ಯ ಏನು ಎಂಬುದನ್ನ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ತೋರಿಸಿದ್ದಾರೆ. 28 ರ ಹರೆಯದ ಜೇಸನ್ ಹೋಲ್ಡರ್ ಬಾರ್ಬಡೋಸ್ ಟ್ರೈಡೆಂಟ್ ತಂಡದ ಪ್ರಬಲ ಅಸ್ತ್ರವಾಗಿದ್ದಾರೆ.
ರಾಸ್ ಟೇಲರ್ (ಗಯಾನಾ ಅಮೆಜಾನ್ ವಾರಿಯರ್ಸ್)
![ರಾಸ್ ಟೇಲರ್](https://etvbharatimages.akamaized.net/etvbharat/prod-images/ross-taylor_1108newsroom_1597107415_128.jpg)
ಸಿಪಿಎಲ್ನ ಅತ್ಯಂತ ಅನುಭವಿ ಆಟಗಾರರಲ್ಲಿ ಒಬ್ಬರಾದ ರಾಸ್ ಟೇಲರ್ ಕಳೆದ ವರ್ಷ ಸಿಪಿಎಲ್ನಿಂದ ವಿರಾಮ ತೆಗೆದುಕೊಂಡಿದ್ದರು. ಈಗ ಮತ್ತೆ ಗಯಾನಾ ಅಮೆಜಾನ್ ವಾರಿಯರ್ಸ್ ತಂಡಕ್ಕೆ ಮರಳಿದ್ದಾರೆ. ಎಲ್ಲಾ ಮಾದರಿಯ ಕ್ರಿಕೆಟ್ನಲ್ಲಿ ಅಗಾಧ ಅನುಭವ ಹೊಂದಿರುವ ಟೇಲರ್ ತಂಡಕ್ಕೆ ತಮ್ಮ ಅನುಭವದ ಮೂಲಕ ನೇರವಾಗುವುದರಲ್ಲಿ ಸಂಶಯವೆ ಇಲ್ಲಾ. ಸಿಪಿಎಲ್ ನಲ್ಲಿ ಟೇಲರ್ ನಾಲ್ಕು ಸೀಸನ್ ಆಡಿದ್ದು 31.5 ಸರಾಸರಿಯಲ್ಲಿ, 36 ಪಂದ್ಯಗಳಿಂದ 724 ರನ್ ಗಳಿಸಿದ್ದಾರೆ.
ಪ್ರವೀಣ್ ತಾಂಬೆ (ಟ್ರಿನ್ಬಾಗೊ ನೈಟ್ ರೈಡರ್ಸ್)
![ಪ್ರವೀಣ್ ತಾಂಬೆ](https://etvbharatimages.akamaized.net/etvbharat/prod-images/pravin-tambe_1108newsroom_1597107415_318.jpg)
ಭಾರತೀಯ ಮೂಲದ 48 ನೇ ವಯಸ್ಸಿನ ಲೆಗ್ ಸ್ಪಿನ್ನರ್ ಪ್ರವೀಣ್ ತಾಂಬೆ ಈ ಬಾರಿ ಮೊದಲ ಬಾರಿಗೆ ಸಿಪಿಎಲ್ನಲ್ಲಿ ಆಡಲಿದ್ದಾರೆ. ಸಿಪಿಎಲ್ ಒಪ್ಪಂದವನ್ನು ಪಡೆದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೂ ತಾಂಬೆ ಪಾತ್ರರಾಗಿದ್ದಾರೆ. 2013 ರಿಂದ ಐಪಿಎಲ್ನಲ್ಲಿ ಆಡಿದ್ದ ತಾಂಬೆ ಉತ್ತಮ ಪ್ರದರ್ಶನ ನೀಡಿದ್ದರು. ಈ ಹಿಂದೆ ನಡೆದ ಟಿ-10 ಲೀಗ್ನಲ್ಲಿ ಐದು ವಿಕೆಟ್ ಪಡೆದು ಸಾಧನೆ ಮಾಡಿದ್ದ, ಪ್ರವೀಣ್ ತಾಂಬೆ ಮೇಲೆ ಈ ಬಾರಿ ಸಿಪಿಎಲ್ನಲ್ಲಿ ಹೆಚ್ಚಿನ ನಿರೀಕ್ಷೆ ಇದೆ.