ಮ್ಯಾಂಚೆಸ್ಟರ್: ಪಾಕಿಸ್ತಾನದ ಯುವ ಆಟಗಾರ ಬಾಬರ್ ಅಜಮ್ ಭಾರತದ ವಿರಾಟ್ ಕೊಹ್ಲಿ ಹಾಗೂ ಆಸ್ಟ್ರೇಲಿಯಾದ ಸ್ಟಿವ್ ಸ್ಮಿತ್ಗೆ ಸರಿಸಮನಾದ ಆಟಗಾರ ಎಂದು ಇಂಗ್ಲೆಂಡ್ ಮಾಜಿ ನಾಯಕ ನಾಸಿರ್ ಹುಸೇನ್ ಅಭಿಪ್ರಾಯ ಪಟ್ಟಿದ್ದಾರೆ.
ಇಂಗ್ಲೆಂಡ್ ವಿರುದ್ಧ ಬುಧವಾರ ಆರಂಭವಾದ ಮೊದಲ ಟೆಸ್ಟ್ನಲ್ಲಿ ಬಾಬರ್ ಆಜಮ್(69) ಆಕರ್ಷಕ ಅರ್ಧಶತಕ ಬಾರಿಸಿ ಮುನ್ನುಗ್ಗುತ್ತಿದ್ದಾರೆ. 25 ವರ್ಷದ ಬ್ಯಾಟ್ಸ್ಮನ್ ಆರಂಭದ ದಿನದಲ್ಲೇ ತಮ್ಮ 14 ನೇ ಅರ್ಧಶತಕ ಪೂರೈಸಿದ್ದಾರೆ.
2018ರಿಂದ ಅವರ ಬ್ಯಾಟಿಂಗ್ ಪ್ರದರ್ಶನ ಗಮನಿಸಿದರೆ ಎಲ್ಲ ಬ್ಯಾಟ್ಸ್ಮನ್ಗಳಿಗಿಂತ ಮುಂದಿದ್ದಾರೆ. ಈ ಕಾರಣದಿಂದ ನಾಸಿರ್ ಬಾಬರ್ ಕೂಡ ಕೊಹ್ಲಿ, ರೂಟ್, ವಿಲಿಯಮ್ಸನ್ ಹಾಗೂ ಸ್ಮಿತ್ಗೆ ತಕ್ಕನಾದ ಪ್ರತಿಸ್ಪರ್ಧಿ ಎಂದು ಭಾವಿಸಿದ್ದಾರೆ.
ಪಾಕಿಸ್ತಾನ ತಂಡದ ಬಾಬರ್ ಅಜಮ್ರಂತಹ ಒಬ್ಬ ಅದ್ಭುತ ಬ್ಯಾಟ್ಸ್ಮನ್ ಪಡೆದುಕೊಂಡಿದೆ. ಇದು ಕೇವಲ ಅವರ ಅಂಕಿ ಅಂಶಗಳನ್ನು ನೋಡಿ ಹೇಳುತ್ತಿಲ್ಲ, ಅವರ ಆಡುವ ಶೈಲಿಯಿಂದ ಆತ ಎಂತಹ ಶ್ರೇಷ್ಠ ಬ್ಯಾಟ್ಸ್ಮನ್ ಎಂದು ಹೇಳಬಹುದು ಎಂದು ನಾಸಿರ್ ಸ್ಕೈ ಸ್ಪೋರ್ಟ್ಸ್ಗೆ ಬರೆದಿರುವ ಲೇಖನದಲ್ಲಿ ತಿಳಿಸಿದ್ದಾರೆ.
ನನ್ನ ಪ್ರಕಾರ ಪಾಕಿಸ್ತಾನ ಇಂಗ್ಲೆಂಡ್ ವಿರುದ್ಧ ಸರಣಿ ಗೆದ್ದರೆ ಅದರಕ್ಕೆ ಬಾಬರ್ ಅಜಮ್ ಪಾಲು ಸಾಕಷ್ಟಿರುತ್ತದೆ. ಆತ ಉತ್ತಮವಾಗಿ ಆಡಿದರೆ ಈ ಸರಣಿಯನ್ನು ನಾವು ನೋಡುವುದಕ್ಕೆ ಅರ್ಹವಾಗಿರುತ್ತದೆ. ಆತ ನಿಜಕ್ಕೂ ಗನ್ ಪ್ಲೇಯರ್ ಎಂದು ಬಣ್ಣಿಸಿದ್ದಾರೆ.
ಕ್ರಿಕೆಟ್ ಪ್ರತಿಸ್ಪರ್ಧಿಗಳ ಲಿಸ್ಟ್ನಲ್ಲಿ ಇನ್ನು ನಾಲ್ವರು ಬ್ಯಾಟ್ಸ್ಮನ್ಗಳು ಮಾತ್ರ ಇದ್ದಾರೆ. ಆದರೆ ಬಾಬರ್ ಆಟ ನೋಡಿದ ಮೇಲೂ ಶ್ರೇಷ್ಠ 4 ರಲ್ಲೇ ಚರ್ಚೆ ಮುಂದುವರಿದರೆ ನಾಚಿಕೆಯಾಗುತ್ತದೆ. ಏಕೆಂದರೆ ಬಾಬರ್ ಕೂಡ ಪ್ರತಿಸ್ಪರ್ಧಿಯಾಗಿದ್ದಾರೆ. ಮುಂದೆ ಕ್ರಿಕೆಟ್ ಜಗತ್ತಿನ ಚರ್ಚೆಯಲ್ಲಿ ಕೊಹ್ಲಿ, ಸ್ಮಿತ್, ರೂಟ್ ಹಾಗೂ ವಿಲಿಯಮ್ಸನ್ ಜೊತೆಗೆ ಬಾಬರ್ ಕೂಡ ಇರಬೇಕು ಎಂದು ಅವರು ಆಗ್ರಹಪಡಿಸಿದ್ದಾರೆ.
