ಸಿಡ್ನಿ: ಆಸ್ಟ್ರೇಲಿಯಾ ವಿರುದ್ಧದ ಮೊದಲೆರಡು ಟೆಸ್ಟ್ ಪಂದ್ಯಗಳಲ್ಲಿ ಸದಾ ಹೊಸ ವಿಷಯ ಕಲಿಯಲು ಬಯಸುವ ಆಶ್ವಿನ್ ಮತ್ತು ಹೆಚ್ಚು ಸುಧಾರಿತ ಬ್ಯಾಟ್ಸಮನ್ ಆಗಿ ಮಾರ್ಪಡುತ್ತಿರುವ ಜಡೇಜಾ ಭಾರತ ಪರ ನಿಂತಿರುವುದು ನಮಗೆ ಹೆಚ್ಚಿನ ಬಲ ತಂದುಕೊಟ್ಟಿದೆ ಎಂದು ಟೀಮ್ ಇಂಡಿಯಾ ನಾಯಕ ರಹಾನೆ ತಿಳಿಸಿದ್ದಾರೆ.
ರವಿಚಂದ್ರನ್ ಅಶ್ವಿನ್ ಪ್ರಸ್ತುತ ಸರಣಿಯ ಗರಿಷ್ಠ ವಿಕೆಟ್ ಪಡೆದ ಬೌಲರ್ ಆಗಿದ್ದಾರೆ. ಇನ್ನು ಜಡೇಜಾ ಎರಡನೇ ಟೆಸ್ಟ್ನಲ್ಲಿ ಅರ್ಧಶತಕ ಸಿಡಿಸಿ ನಾಯಕ ರಹಾನೆ ಜೊತೆಗೆ ಶತಕದ ಜೊತೆಯಾಟ ನಡೆಸಿ ಭಾರತ 8 ವಿಕೆಟ್ಗಳ ಜಯ ಸಾಧಿಸಲು ನೆರವಾಗಿದ್ದರು.
ಅವರು (ಅಶ್ವಿನ್) ಯಾವಾಗಲು ಹೊಸ ವಿಷಯಗಳನ್ನು ಕಲಿಯಲು ಎದುರು ನೋಡುತ್ತಿರುತ್ತಾರೆ. ಅವರು ಹೊಸ ಕೌಶಲ್ಯಗಳನ್ನು ಹೊಂದಿದ್ದಾರೆ. ಆದರೂ ಹೊಸದನ್ನು ಕಲಿಯುವ ಅವರ ಉತ್ಸಾಹ ಅವರನ್ನು ಮತ್ತಷ್ಟು ಅತ್ಯುತ್ತಮರನ್ನಾಗಿ ಮಾಡಿದೆ. ಅವರು ಮುಂದಿನ ಎರಡು ಟೆಸ್ಟ್ಗಳಲ್ಲೂ ಇದೇ ಪ್ರದರ್ಶನವನ್ನು ಮುಂದುವರೆಸಲಿದ್ದಾರೆ ಎಂಬ ವಿಶ್ವಾಸವಿದೆ ಎಂದು ರಹಾನೆ ಗುರುವಾರ ಮೂರನೇ ಟೆಸ್ಟ್ಗೂ ಮುನ್ನ ನಡೆದ ಸುದ್ದಿಗೋಷ್ಠಿಯಲ್ಲಿ ಅಶ್ವಿನ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಇದೇ ಸಂದರ್ಭದಲ್ಲಿ ಜಡೇಜಾರ ಬ್ಯಾಟಿಂಗ್ ಕೌಶಲ್ಯದ ಸುಧಾರಣೆ ಬಗ್ಗೆಯೂ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ರವೀಂದ್ರ ಜಡೇಜಾ ಅವರು ಬ್ಯಾಟ್ಸ್ಮನ್ ಆಗಿ ಪ್ರಗತಿ ಕಾಣುತ್ತಿದ್ದಾರೆ, ಇದು ತಂಡದ ದೃಷ್ಠಿಕೋನದಿಂದ ಬಹುದೊಡ್ಡ ಅಂಶವಾಗಿದೆ ಎಂದು ರಹಾನೆ ಹೇಳಿದ್ದಾರೆ.
ನಿಮ್ಮ 7ನೇ ಕ್ರಮಾಂಕದ ಬ್ಯಾಟ್ಸ್ಮನ್ ಕೂಡ ಬ್ಯಾಟ್ ಮೂಲಕ ಉಪಯುಕ್ತ ರನ್ ಕೊಡುಗೆ ನೀಡಿದರೆ ಉತ್ತಮ ಮೊತ್ತ ದಾಖಲಿಸಿಲು ತುಂಬಾ ಸುಲಭವಾಗುತ್ತದೆ. ಅದರಲ್ಲೂ ಅವರು ಫೀಲ್ಡಿಂಗ್ನಲ್ಲಿ ಅದ್ಭುತ ಕ್ಯಾಚ್ ಪಡೆದಿರುವುದನ್ನು ಖಂಡಿತಾ ನೀವು ನೋಡಿರಬಹುದು. ಹಾಗಾಗಿ ಅವರು ತಂಡದಲ್ಲಿರುವುದು ತುಂಬಾ ನೆರವಾಗಲಿದೆ ಎಂದು ಜಡೇಜಾ ಬಗ್ಗೆ ರಹಾನೆ ಗುಣಗಾನ ಮಾಡಿದ್ದಾರೆ.
ಇದನ್ನು ಓದಿ:ಹುಕ್ ಮತ್ತು ಫುಲ್ ಶಾಟ್ ಹೊಡೆಯುವುದರಲ್ಲಿ ರೋಹಿತ್ಗಿಂತ ಉತ್ತಮರಿಲ್ಲ: ಕೊಹ್ಲಿ ಬಾಲ್ಯದ ಕೋಚ್
