ಕಾಬೂಲ್ : ಕಾರು ಬಾಂಬ್ ಸ್ಫೋಟದಲ್ಲಿ ಆಫ್ಘಾನಿಸ್ತಾನದ ಅಂತಾರಾಷ್ಟ್ರೀಯ ಕ್ರಿಕೆಟ್ ಅಂಪೈರ್ ಬಿಸ್ಮಿಲ್ಲಾ ಜಾನ್ ಶಿನ್ವಾರಿ ದುರಂತ ಸಾವು ಕಂಡಿದ್ದಾರೆ.
ಮೊನ್ನೆ ನಡೆದ ಕಾರು ಅಪಘಾಕ್ಕೊಳಗಾಗಿ ಆರಂಭಿಕ ಬ್ಯಾಟ್ಸ್ಮನ್ ನಜೀಬ್ ತಾರಕೈ ಕೋಮಾಕ್ಕೆ ತೆರಳಿದ್ದರು. ಈ ಕಹಿ ಘಟನೆ ಮಾಸುವ ಮುನ್ನವೇ ಆಫ್ಘನ್ ಕ್ರಿಕೆಟ್ನಲ್ಲಿ ಶಿನ್ವಾರಿ ಸಾವು ಆಘಾತ ತಂದಿದೆ. ಆಫ್ಘಾನಿಸ್ತಾನದ ನಂಗರ್ಹಾರ್ ಪ್ರಾಂತ್ಯದಲ್ಲಿ ಶನಿವಾರ ಮಧ್ಯಾಹ್ನ 12:20ಕ್ಕೆ ಸ್ಫೋಟ ಸಂಭವಿಸಿದೆ ಎಂದು ಆಫ್ಘಾನಿಸ್ತಾನ ಕ್ರಿಕೆಟ್ ಮಂಡಳಿಯ ಮಾಜಿ ಮಾಧ್ಯಮ ವಕ್ತಾರ ಮೊಹ್ಮದ್ ಇಬ್ರಾಹಿಂ ಟ್ವೀಟ್ ಮಾಡಿದ್ದಾರೆ.
ಘಟನೆಯಲ್ಲಿ ಶಿನ್ವಾರಿ ಸೇರಿ ಅವರ ಕುಟುಂಬದ 7 ಮಂದಿ ಕೂಡ ದುರಂತದಲ್ಲಿ ಅಸು ನೀಗಿದ್ದಾರೆ. 'ಕಾರು ಬಾಂಬ್ ಸ್ಫೋಟದಲ್ಲಿ ಬಿಸ್ಮಿಲ್ಲಾ ಜಾನ್ ಶಿನ್ವಾರಿ ಹಾಗೂ ಅವರ ಕುಟುಂಬದ ಏಳು ಮಂದಿ ಸಾವನ್ನಪ್ಪಿದ್ದಾರೆ. ಈ ಅಪಘಾತದಲ್ಲಿ ಒಟ್ಟು 15 ಜನರು ಮೃತಪಟ್ಟಿದ್ದು, 40 ಜನ ಗಾಯಗೊಂಡಿದ್ದಾರೆ' ಎಂದು ಇಬ್ರಾಹಿಂ ಟ್ವೀಟ್ ಮಾಡಿದ್ದಾರೆ.
ಶಿನ್ವಾರಿ 11 ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಸೇವೆ ಸಲ್ಲಿಸಿದ್ದಾರೆ. ಇದರಲ್ಲಿ 5 ಏಕದಿನ ಪಂದ್ಯಗಳು ಮತ್ತು 6 ಟಿ20 ಪಂದ್ಯಗಳು ಸೇರಿವೆ.
