ಢಾಕಾ: ಎಡಗೈ ಸ್ಪಿನ್ನರ್ ಅಬ್ದುರ್ ರಜಾಕ್ ಅವರನ್ನು ರಾಷ್ಟ್ರೀಯ ಆಯ್ಕೆ ಸಮಿತಿಗೆ ಬಾಂಗ್ಲಾದೇಶ ಕ್ರಿಕೆಟ್ ಬೋರ್ಡ್ ನೇಮಿಸಿದೆ. ಗುರುವಾರ ನಡೆದ ವರ್ಚುವಲ್ ಸಭೆಯಲ್ಲಿ ಬಿಸಿಬಿ ನಿರ್ದೇಶಕರು ಈ ನಿರ್ಧಾರ ತೆಗೆದುಕೊಂಡರು.
ಬಿಸಿಬಿಯ ಆಯ್ಕೆ ಸಮಿತಿಯಲ್ಲಿ ಮಿನ್ಹಾಜುಲ್ ಅಬೆದಿನ್ ಮತ್ತು ಹಬೀಬುಲ್ ಬಶರ್ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇದೀಗ ಮೂರನೇ ಸದಸ್ಯರಾಗಿ ಅಬ್ದುರ್ ರಜಾಕ್ ನೇಮಕವಾಗಿದ್ದಾರೆ.
ರಜಾಕ್ ಪ್ರಸ್ತುತ ಸ್ಪರ್ಧಾತ್ಮಕ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿಲ್ಲ. ಆದರೂ ಹೊಸ ಜವಾಬ್ದಾರಿಯನ್ನು ತೆಗೆದುಕೊಳ್ಳಲು ಎದುರು ನೋಡುತ್ತಿರುವುದಾಗಿ ಹೇಳಿದ್ದಾರೆ.
'ನಾನು ನನ್ನ ದೇಶಿಯ ಕ್ರಿಕೆಟ್ಗೆ ಶೀಘ್ರದಲ್ಲೇ ವಿದಾಯ ಘೋಷಿಸಲಿದ್ದೇನೆ. ಬಿಸಿಬಿ ಈಗಷ್ಟೇ ಆಯ್ಕೆ ಸಮಿತಿಗೆ ಸದಸ್ಯನನ್ನಾಗಿ ನೇಮಕ ಮಾಡಿರುವುದಾಗಿ ತಿಳಿಸಿದೆ' ಎಂದು ರಜಾಕ್ ಹೇಳಿದ್ದಾರೆ.
