ಮುಂಬೈ: ಮಹಾಮಾರಿ ಕೊರೊನಾ ವೈರಸ್ ಇಡೀ ವಿಶ್ವದ ಮೇಲೆ ಕರಿನೆರಳು ಬೀರಿದ್ದು, ಇದರಿಂದ ಎಲ್ಲಾ ವಲಯಗಳು ಸಂಪೂರ್ಣವಾಗಿ ಬಂದ್ ಆಗಿವೆ. ಕ್ರೀಡಾ ಲೋಕದ ಮೇಲೂ ಕೊರೊನಾ ಪರಿಣಾಮ ಬೀರಿದೆ. ಅದೇ ಕಾರಣಕ್ಕಾಗಿ ಮುಂಬರುವ ಕೆಲವೊಂದು ಕ್ರೀಡಾ ಚಟುವಟಿಕೆ ಮುಂದೂಡಿಕೆಯಾಗಿದ್ದು, ಕೆಲವೊಂದು ಟೂರ್ನಿ ರದ್ದುಗೊಂಡಿವೆ.
ವಿಶ್ವದ ಶ್ರೀಮಂತ ಕ್ರೀಡೆ ಎನಿಸಿಕೊಂಡಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ ಕೂಡ ಈಗಾಗಲೇ ಮುಂದೂಡಿಕೆಯಾಗಿದ್ದು, ಏಪ್ರಿಲ್ 13ರಂದು ಇದು ನಡೆಯುವುದರ ಕುರಿತು ಮಹತ್ವದ ನಿರ್ಧಾರ ಹೊರ ಬೀಳಲಿದೆ. ಒಂದು ವೇಳೆ ಇದು ರದ್ದುಗೊಂಡರೆ ಕೆಲ ಪ್ರಮುಖ ಪ್ಲೇಯರ್ಸ್ಗಳ ಕ್ರಿಕೆಟ್ ಬದುಕು ಬಹುತೇಕ ಅಂತ್ಯಗೊಳ್ಳಲಿದೆ.
ಈಗಾಗಲೇ ಆಯ್ಕೆ ಸಮಿತಿ ಹೇಳಿರುವ ಪ್ರಕಾರ ಒಂದು ವೇಳೆ ಐಪಿಎಲ್ನಲ್ಲಿ ಧೋನಿ ಅದ್ಭುತವಾಗಿ ಪ್ರದರ್ಶನ ನೀಡಿದರೆ ಅವರಿಗೆ ಖಂಡಿತವಾಗಿ ಟೀಂ ಇಂಡಿಯಾ ತಂಡದಲ್ಲಿ ಸ್ಥಾನ ಸಿಗಲಿದೆ ಎಂದಿದೆ. ಆದರೆ ಇದೀಗ ಈ ಟೂರ್ನಿ ನಡೆಯುವುದೇ ಡೌಟ್ ಎನ್ನಲಾಗ್ತಿದೆ.
ಧೋನಿ ಜತೆಗೆ ಕೇರಳದ ವಿಕೆಟ್ ಕೀಪರ್, ಬ್ಯಾಟ್ಸಮನ್ ಸಂಜು ಸ್ಯಾಮ್ಸನ್ ಹಾಗೂ ಆಲ್ರೌಂಡರ್ ಕೃನಾಲ್ ಪಾಂಡ್ಯ ಕ್ರಿಕೆಟ್ ಭವಿಷ್ಯ ಕೂಡ ಅಡಕತ್ತರಿಯಲ್ಲಿ ಸಿಲುಕಿದ್ದು, ಅವರು ಟೀಂ ಇಂಡಿಯಾ ಸೇರಿಕೊಳ್ಳಬೇಕಾದರೆ ಐಪಿಎಲ್ನಲ್ಲಿ ಉತ್ತಮ ಪ್ರದರ್ಶನ ನೀಡಬೇಕಾದ ಅನಿವಾರ್ಯತೆ ಎದುರಾಗಿದೆ. ಆದರೆ ಟೂರ್ನಿ ರದ್ದುಗೊಂಡರೆ ಇವರ ಭವಿಷ್ಯ ಡೋಲಾಯಮಾನವಾಗಲಿದೆ ಎನ್ನಲಾಗುತ್ತಿದೆ.
ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಉತ್ತಮ ಪ್ರದರ್ಶನ ನೀಡುವ ಪ್ಲೇಯರ್ಸ್ ಟಿ-20 ವಿಶ್ವಕಪ್ನಲ್ಲಿ ಅವಕಾಶ ಪಡೆದುಕೊಳ್ಳುವುದು ಬಹುತೇಕ ಕನ್ಫರ್ಮ್ ಆಗಿತ್ತು. ಇದೀಗ ಆಯ್ಕೆ ಸಮಿತಿ ಯಾವ ಆಧಾರದ ಮೇಲೆ ಕ್ರಮ ಕೈಗೊಳ್ಳಲಿದೆ ಎಂಬುದು ಕಾದು ನೋಡಬೇಕು.
